Bamwe bamumenye mu ndirimbo "Imana ibirimo", abandi mu ndirimbo "Biremera". Ni kenshi abakunzi be bakomeje kumubwira ko bifuza kumubona yavuye mu buseribateri ariko noneho biragaragaye ko amaherezo y’inzira ari mu nzu.

Uyu muramyi uzwiho kuba umuhanga mu kwandika indirimbo, agiye gutera ishoti ubuseribateri nyuma y’uko atangije umushinga w’ubukwe.

Ni umushinga watangiriye mu karere ka Bugesera ku itorero rya ADEPR Nyamata, uza gukomereza ku itorero rya ADEPR Sgeem aho Eric biremera abarizwa.

Kuwa 21/04/2024 byari ibyishimo ubwo Pastor Bwate David iyobora itorero rya ADEPR Sgeem yarangaga abageni barimo Eric Biremera.

Ubwo yamuhamagara havuze amashyi y’urufaya doreko uyu muramyi akunzwe kubi n’abakristo ba sgeem. Uyu Mushumba uzwiho gusetsa akaba yagize ati: "N’ubwo twakwitaga ’Biremera’ ariko byari bitaremera kuko wari wenyine, ubu nibwo byemeye."

Nyuma yo kwerekanwa mu rusengero Eric biremera na Ange basangiye n’inshuti zabo.

Aganira na Paradise, Biremera yavuze ko ashima Imana ko isohoje isezerano nyuma y’igihe kinini asenga Imana ayibaza aho urubavu rwe ruri bikaba birangiye imwerekeje mu karere ka Bugesera.

Yavuze ko Ange ari umukobwa w’imico myiza wiyubaha Kandi ukunda Imana n’abantu bayo bikaba bihwanye n’inzozi zo mu bwana bwe.

Ange nawe ubwo yaganiraga na Paradise.rw yavuze ko ashima Imana kuba imuhaye umugabo mwiza nka Biremera uzwiho kwitonda no gucisha makeya akaba anakijijwe.

Yagize ati: "Kuri ubu ndashima Imana ko isohoje isezerano,yajyaga imbwira ko nzatura i Kigali simenye inzira bizanyuramo, hakaza abasore b’i Kigali hagira untereta Imana iti si uwo".

Yongeyeho ko Imana yaje kumukura mu rujijo imubwira ko izamuha umusore w’umuhanzi rero bikaba birangiye imuhaye Biremera bakaba baremeranyije ko bazabana akaramata.

Uyu musangiro ukaba witabiriwe na bamwe mu bahanzi barimo Vincent utuye ku Ruyenzi, Gashirabake Edouard uzwi ku izina rya Manager na Bernadette Musabe ubarizwa mu itorero rya ADEPR Kove wakunzwe mu ndirimbo zirimo "Iyaba mfite amababa".

Aba bose bakaba bifurije aba bombi kuzagira ubukwe bwiza ndetse n’urugo rw’umugisha bakaba biyemeje no kuzabashyigikira.

Imiryango y’aba bombi nayo yari yabaherekeje. Mu bafashe ijambo bose icyo bahuriyeho ni uko Eric Cyamika yakoreye Imana neza bakaba biteguye kuzamushyigikira mu gihe umuryango wa Ange nawo wahurizaga ku kuba yarubashye Imana akanayitegereza.

Paradise izabagezaho itariki y’ubukwe bw’aba bombi.

Eric Cyamika na Ange bagiye kuduha amazi