Ibitekerezo by’indirimbo akenshi biva ahantu hatunguranye nk’uko byabaye ku muririmbyi w’indirimbo zihimbaza Imana ukomoka mu Rwanda, Gloire Nkundayesu, uzwi nka Gloire ATS (A Toi Seigneur).
Kuri uyu muhanzi uba muri Kanada, impanuka yo mu gikoni yoroheje yabaye intandaro yo kuvuka kw’indirimbo ikomeye yise Child of God .
Album ye nshya yise Child of God – Enfant de Dieu, yashyizwe ahagaragara ku wa 7 Ugushyingo 2024, irimo indirimbo yitiranwa na yo, Child of God. Iyi ndirimbo ifite amateka yihariye kandi yuzuyemo ukwizera gukomeye, yakomotse ku mpanuka yatumye Gloire yitekerezaho nk’umwana w’Imana.
Nk’uko yabitangaje kuri YouTube ye, Gloire yagize ati: “Ni inkuru ndende yatangiriye mu biruhuko nge n’umuryango wange twagize mu mpera za Kamena 2024. Turiyo nagiye muri Walmart (isoko) ngura imbuto n’icyuma gito mbishyira mu gikapu cyanjye.
Twarishimye cyane uwo munsi wose, ariko umukobwa wanjye ambwira ko ashaka ikintu cyo kurya mbere yo gusubira aho twari twacumbitse. Nageze mu gikapu nkuramo icunga, ntangira kurikata. Mu buryo ntazi, narebye hirya, mu gukata nikata urutoki ruto (agahera). Narakomeretse cyane.”
Impanuka n’Ibyakurikiyeho
Aho yakomeretse, n’ubwo byagaragaraga nk’ibyoroheje, byaje gukomera kurushaho. Gloire yagiye ku muganga (emergency), amwohereza ku ivuriro, ku ivuriro na bo bamwohereza ku muganga w’inzobere wize kubaga, kugira ngo asubize ku murongo imyakura yari yangiritse. N’ubwo yabazwe, akavurwa neza, Gloire yagize ati: “N’ubu sinumva urutoki rwange rumeze neza.”
Kubera ko ari umucuranzi, iki kibazo cyabaye imbogamizi ikomeye. Yategetswe kumara ibyumweru bitatu adacuranga. “Umuganga yambwiye ko nshobora kongera gukoresha urutoki nyuma y’ibyumweru bitatu, ariko sinifuzaga kumara ukwezi kose nta gikoresho ncuranga. Ni yo mpamvu natangiye gucuranga Piano nubwo ntari umuhanga cyane muri byo,” ni ko yabisobanuye.
N’ubwo avuga ko ubumenyi bwe kuri Piano buri hagati cyangwa ku rwego rw’abatangizi, yakoresheje icyo gihe (cyo gukomereka) mu gusenga no kwegerana n’Imana. “Iyo ndi gucuranga, biba ari uburyo bumfasha gusenga. Iyo nkanda inota, mba ndi gusenga icyarimwe,” ni ko yakomeje avuga.
Itangira ry’Indirimbo Child of God
Mu gihe kimwe, muri ibyo bihe byo gusenga no gucuranga Piano, Gloire yahumurijwe n’Ijambo ry’Imana riboneka muri Yohana 1:12 rigira riti: “Icyakora abamwemeye bose bakizera izina rye, yabahaye ubushobozi bwo kuba abana b’Imana.” Yahereye aho agira ati: "Uwo mwanya numvise ijwi imbere muri njye rivuga ngo ‘Reba, n’ubwo wakomeretse, ukundwa n’Imana.’”
Ibi byamwibukije ukwizera kwa Yobu mu gihe cy’ibigeragezo bikomeye. “Yobu, aho Satani yashakaga ko ahakana Imana, we yakomeje kwizera. Mu buzima busanzwe, tugira ibibazo n’ibigeragezo, ariko ntibikuraho ishusho yacu (identity). Icyo nzi cyo ni uko ndi umwana w’Imana.”
Avuga ku byiyumviro bye, Gloire yaravuze ati: “Nacuranze Piano, nsenga, ndetse nsoma igitabo cya Yohana, maze melodi (injyana) itangira kunza mu bitekerezo. Ntiyari imeze neza ako kanya, ariko natangiye gushyira mu ndirimbo (ncuranga) ibyo numvaga muri njye.”
Uru rwego rw’ihishurirwa ry’Imana rwatumye havuka indirimbo Child of God , ihamya ishusho (identity) y’abizera muri Kristo, n’ubwo baba bahura n’ibibazo, bakibuka ko ari abana b’Imana.
Ubuzima bwa Gloire ATS: Guhimbaza no Kwizera
Urugendo rwa muzika rwa Gloire rwatangiriye iwabo mu Karere ka Musanze, mu Rwanda, aho yaririmbaga mu ishuri ry’abana ku cyumweru, akaza no kwinjira muri Korali Intumwa. Akiri mu masomo y’ubwubatsi bw’amashanyarazi i Beijing mu Bushinwa mu 2008, yanditse indirimbo ye ya mbere, ari na yo yabaye intangiriro y’urugendo rwe rwo kuririmba.
Ubu atuye muri Quebec, muri Kanada. Gloire ashyira mu gaciro, akubahiriza inshingano ze ntihagire ikigongana n’ikindi, zaba izo kuba ari umugabo, izo kuba umubyeyi w’abana batatu, n’umwuga we nk’injeniyeri, hamwe n’urukundo akunda kuririmba indirimbo zihimbaza Imana.
Album ye ya mbere n’iya kabiri zanditswe mu Kinyarwanda, zirimo indirimbo nka Ntakiri mu Mva, Data Arakora , na Icyubahiro n’Ikuzo.
Album Child of God – Enfant de Dieu
Iyi album nshya igizwe n’indirimbo 10, zigabanyijwe mu bice bibiri:
• Indirimbo z’Icyongereza:
1. Love Letter
2. Child of God
3. Free
• Indirimbo z’Igifaransa:
1. Lettre d’amour
2. Roi Jésus
3. Enfant de Dieu
4. En toi seul
5. Libéré
6. Vainqueur
7. Un feu nouveau
Gloire yagize ati: “Iyi album ni urugendo rw’ukwizera, rwo gushima, guhimbaza, no guha Imana icyubahiro.”
Ibitaramo n’Imishinga Afite
Mu rwego rwo kumenyekanisha album, Gloire yakoze ibitaramo ku wa 19 Ukwakira no ku wa 9 Ugushyingo 2024, mu gihe igitaramo cya gatatu giteganyijwe mu Kuboza. Igitaramo cyihariye cyo kumurika album kizaba mu ntangiriro za 2025 i Quebec City.
Ubuhamya Burangwamo Ukwizera
Uretse ubuhanga bwe mu miririmbire, Gloire azwiho gucuranga gitari by’ibanze (bass). Indirimbo ze zamenyekanye nk’indirimbo zifite ubutumwa butanga icyizere, gukomera kw’Imana, no guhamya urukundo rw’Imana.
Binyuze muri Child of God – Enfant de Dieu, Gloire ahamagarira abamwumva kwemera ishusho (identity) yabo muri Kristo, gushakira imbaraga mu rukundo rwe no mu gukomera ku Mana mu gihe cy’ibigeragezo. Yagize ati: “Ikintu cyaba cyose, dukundwa n’Imana. Ibyo ni byo ndimo, nizera, kandi ni iby’umuntu wese wemera Imana (turi abana b’Imana).”
Urugendo rwa Gloire ATS, rwavuye ku mpanuka yo mu gikoni rukagera ku ndirimbo yatumye benshi bakomera mu kwizera kwabo, ruhamya imbaraga z’ubuzima bushingiye ku Mana no ku rukundo rwayo rutajegajega.
Ryoherwa n’indirimbo Child of God
Atuye muri Kanada we n’umuryango we
Gloire Nkundayesu aka Gloire ATS
