Umuryango Family Corner uzwi mu bikorwa bigamije kubaka umuryango wateguye "Women of Impact" mu rwego rwo kwerekana imbaraga z’umugore n’ubushobozi bwe.

Ubwo yaganiraga na Paradise, Ev Eliane Niyonagira washinze Family Corner akaba n’umuyobozi wawo yagarutse ku mbaraga z’umugore zabaye imvano yo gutegura iyi ’conference’ anavuga imvano y’izina "Women of impact".

Yahuje imvano y’iyi nsanganyamatsiko ndetse n’agaciro k’umugore ati: "Women of Impact ni umugore uzana impinduka, umugore wisobanukiwe, uzi identité ye atayirebeye mu byo abona cyangwa yumvana abandi. Twifuza kwereka umugore imbaraga ze, ubushobozi bwe ko bwabasha guhindura isi na société abashije kwisobanukirwa."

Ev Eliane Niyonagira yanagarutse ku busobanuro bw’ijambo "Stand and Shine" rikomeje kwifashishwa mu guhamagarira abantu kuzitabira iyi conference.

Yagize ati: "Stand and shine bivuze guhaguruka ukarabagirana, ubundi urugo rurimo umugore rurangwa no gucya, iyo umugabo ashatse umugore hari byinshi aza agahindura mu nzu bivuze ko umugore ni urumuri n’ubundi, ariko akenshi tumurika twicaye hari aho urumuri rwacu rutagera kuko tutaramenya neza neza aho itoroshi cyangwa itara ryacu ritaragera."

Muri iyi conference hateganyijwe ibiganiro bizatangwa n’abahanga mu bisata bitandukanye, hazatangwa ubuhamya, ndetse hazanamurikwa igitabo cyitwa "Women of Impact". Nyuma yaho hazabaho gusangira amafunguro (dîner).

Women Impact ni umunsi utegerejwe n’abantu benshi by’umwihariko abatuye mu gihugu cy’u Bubirigi aho iki gikorwa kizabera. Ni tariki ya 07 Werurwe 2026 mu gihugu cy’ u Bubirigi.

Hatumiwe abashyitsi barimo Pastor Eric Ruhagararabuhanga, Pastor Richard Munyamahoro inzobere mu nyigisho zigamije kubaka umuryango, Liliane Ingabire n’abandi.

Past Richard Munyamahoro ni umushumba mu itorero New Hope Christian Church mu Buholandi. Ni inzobere mu bujyanama ku nyigusho zo kubaka imiryango, mu ikoranabuhanga mu buhinzi ndetse na tewolojiya.

Ni umugabo wubatse dore ko yashakanye na Jack bakaba bafitanye abakobwa babiri. Ni umumisoyoneri ubimazwmo imyaka 20 akaba yarahamagariwe kwigisha, guhugura no gutanga ubujyanama.

Pastor Eric ategerejwe muri "Women of Impact" yateguwe na Family Corner

Ubuhamya no kumurika igitabo ni bimwe mu bizaranga "Women of Impact" yateguwe na Family Corner yashinzwe na Ev Eliane