Paradise yakoranye ikiganiro n’umubyinnyi ukomeye muri Kaminuza y’u Rwanda, Ishami rya Huye, Ishimwe Elyseé uzwi nka Tiger the Great, ayitangariza uko asobanura Imana kuri we n’ibindi byinshi bimwerekeyeho.
Impamvu ari umubyinnyi ukomeye kandi uri mu ba mbere muri Kaminuza y’i Huye, ni uko ari mu bahembwe na Sosiyete icuruza telefone zigezweho ya Infinix ubwo yamurikaga telefone nshya ’Hot 50 series’ irimo ubwoko bubiri Hot 50i na Hot 50 pro plus, ikanatanga ibihembo ku babyinnyi bahize abandi, kandi itsinda ribyinamo Tiger the Great ryitwa ‘The Vibers Crew’ ni ryo ryabaye irya mbere.
Ikiganiro yagiranye na Paradise ku wa 15 Ugushyingo 2024 kirimo ibice bibiri: Uko afata Imana mu buzima bwe n’uko umwuga we wo kubyina uhagaze nubwo atari wo umutunze gusa.
Uko afata Imana mu buzima bwe:
Paradise: Wavutse ryari, uvukira he?
Tiger the Great: Navutse ku wa 2 Gashyantare 2002, Navukiye mu Karere ka Rubavu, mu Murenge wa Mahoro. Mvuka mu bana bane, ndi umwana wa gatatu.
Paradise: Wemera Imana mu buzima bwawe?
Tiger the Great: Imana ndayemera cyane, ndayemera pe!
Paradise: Imana uyifata ute mu buzima bwawe? Uyisobanura ute?
Tiger the Great: Imana nyifata nk’icyizere. Iyo ndi gukora ibintu bikanga cyangwa nkabona bigoye, mpita nishyiramo umutuzo nkavuga nti Imana iri bubikore. Iyo mbona ko ikintu kuri ngewe kitarashoboka mpita nishyiramo icyizere cy’uko Imana iri bubikore. Rero Imana nyifata nk’icyizere. Icyizere, ubuhungiro, umucunguzi, nka gutyo.
Paradise: Ujya ufata umwanya wo gusenga?
Tiger the Great: Yego. Njya mfata umwanya ngasenga, cyane iyo ndi mu bibazo cyangwa iyo ndi kwiyumvamo gusenga.
Paradise: Usenga kangahe ku munsi?
Tiger the Great: Nta bwo navuga ikigereranyo, ariko kubera ko buri munsi mba nyura mu bigeragezo n’iyo ngize imimerere mibi igoranye cyangwa nkagera mu myiza, mpita mfata akanya nkamera nk’utujeho gato nkabikorera mu mutima.
Paradise: Ufite aho usengera? Ni ukuvuga idini cyangwa itorero?
Tiger the Great: Idini ndarifite. Mba mu Itorero ry’Abakristo rizwi ku izina ry’Abafurere (Frères), impamvu nabahisemo ni uko bakunda kubwiriza cyane. Umwanya munini bawumara bari kubwiriza kandi ni cyo kintu kimfasha kurusha ibindi.
Paradise: Ni ryo dini ryonyine wabayemo? Haba hari irindi wigeze ubamo, wenda ukaribatizwamo?
Tiger the Great: Nabatijwe mu Baporotesitanti, gusa sinavuga ko nabavuyemo burundu, ahubwo ni uko nabonye ahari ibihuje n’ibyo nkunda (mu Bafurere), gusa n’ubu najyayo.
Paradise: Iryo dini ry’Abafurere ni ubwa mbere ndyumvise. Rikorera he?
Tiger the Great: Iri torero rikorera mu Mugi wa Kigali, ku Gisenyi n’i Musanze. Nge nsengera i Musanze, mu rusengero ruherereye ahitwa mu Ibereshi.
Ibijyanye n’umwuga akora wo kubyina:
Paradise: Watangiye kubyina ryari? Wabyiyumvisemo ute? Wamenye ryari ko uzi kubyina?
Tiger the Great: Kubyina nabitangiye ndi umwana, kuva kera numvaga kwicara ntari kubyina biri kumbangamira. Nabyiyumvisemo ntangira kubikora, haba ibirori ku ishuri abarimu bakanjyana kubyina. Nigaga mu mashuri abanza.
Paradise: Ukorera mu rihe tsinda ry’ababyinnyi?
Tiger the Great: Itsinda tubamo ribamo abantu 20, uretse ko bose badakorana umwete kimwe (bose ntibari active). Abakorana umwete ni bo dukorana ku rubyiniro. Twitwa “The Vibers Crew”
Paradise: Ko abagaragara ari batatu gusa se? Ni iki gituma muhuza uko muri batatu?
Tiger the Great: Kuba turi batatu gusa ni uko ari twe tubishyiramo umuhati. Igituma duhuza cyane ni uko babiri muri twe twiga Ubuhanzi (Modern Languages: Arts and Creative Industries) ni ukuvuga nge na Bahati (umukobwa babyinana), na ho undi witwa Karim akaba yiga itangazamakuru (Modern Languages: Journalism and Communication).
Paradise: Bibaye ngombwa ko ugaragara (ubyina) mu ndirimbo yamamaza Ubutumwa Bwiza wabikora?
Tiger the Great: Indirimbo zo kuramya no guhimbaza Imana? Nayikoraho. Umuntu ansabye kubyina mu ndirimbo ya Gospel nabikora nishimye kuko ndabishoboye kandi ndabikunda, zaba iza ama worship team n’izindi, zose nazibyina.
Paradise: Ko ubyina izisanzwe, hari iya Gospel wigeze ubyina?
Tiger the Great: Hari iyo nigeze gukora. Nakoze iya Mugisha Parfaite yitwa Umunyamugisha. Nayikoreye ibyo bita challenge.
Paradise: Ubyina ugamije iki? Ni kinyamwuga?
Tiger the Great: Natangiye kubyina nishimisha, ariko nyuma na nyuma nubwo ntavuga ko bintunze ariko mbikora nk’umwuga kuko bisigaye bimpa amafaranga. Ni nk’umwuga rero.
Paradise: Ni iki wagezeho mu kubyina kwawe?
Tiger the Great: Ikintu nagezeho cya mbere ni ukumenyana n’abantu benshi kandi ntari kubasha guhura na bo. Hari ibintu bikomeye nagezeho nko kwitabira amarushanwa nkayatsinda, urugero nk’ayo muri Infinix bari ku launching hot 50. Nakuyemo amafaranga menshi. Byari inzozi kugera kuri televiziyo, ariko kubyina byangejejeyo.
Igihe cyiza nagize ni igihe njya kuri RTV, mama akampamagara akabimbwira. Ikindi ni igihe nsindira amafaranga menshi muri Infinix mbikesha kubyina.
Paradise: Hari inkuru ya Paradise.rw wigeze usoma?
Tiger the Great: Mba muri group ya WhatsApp ya Paradise, buri link inyuzemo ndayisoma, uretse ko nkunda gusoma inkuru zo mu binyamakuru, rero iza Paradise na zo ndazisoma cyane.
Paradise: Mu babyinnyi bazwi ufana nde?
Tiger the Great: General Benda. Agira umurava kandi agahora yishimye (agira vibes).
Tiger the Great cyangwa Ishimwe Elyseé, ni umunyeshuri muri Kaminuza y’u Rwanda Ishami rya Huye. Yiga mu mwaka wa Gatatu mu Ishami ry’Indimi n’Ubuhanzi (Modern Languages: Arts and Creative Industries).
Ni umwe mu batsinze amarushanwa ya Infinix, mu bahawe ibihembo bya mbere mu gikorwa cyo kumurika iyi telefone nshya za Hot 50 series, cyabaye ku wa Gatandatu tariki ya 2 Ugushingo 2024, gikorerwa muri Kaminuza y’u Rwanda, Ishami rya Huye muri Main Auditorium.
Itsinda rye “The Vibers Crew” ni ryo ryabaye irya mbere. Ryahembwe 550,000 Frw.
Imbuga nkoranyambaga akoresha ni eshatu:
TikTok: TIGER THE GREAT
Instagram: tiger_the_great mcswain
Facebook: Tiger The Great mcswain
Kubyina ni kimwe n’akandi kazi kose katunga umuntu. Kuba abikora si ikimenyetso cyo kutaba Umukristo mwiza, kuko n’abandi Bakristo baba mu myuga itandukanye ibaha ibyo bakeneye. Nka Tiger the Great, mbere yo kubyina abanza gusenga.
Tiger the Great akunda Imana, akunda gesenga kandi abikora mbere ya buri gikorwa agiye gukora
Akunda kubyina cyane. Uko agaragara inyuma ni ibigendanye n’umwuga wo kubyina kuko utuma abantu bamamara, bagafatwa nk’abastars
We n’itsinda rye rya ’The Vibers Crew’ bahawe ibihembo bya mbere mu marushanwa ya Infinix
