Umugore witwa Brenda W. Ragland wahoze ari umunyamabanga w’itorero ryo muri Louisa, Virginia, ashobora gufungwa imyaka 280 azira kwiba amaturo yo mu bwoko bwa kimwe mu icumi akoresheje application ya mudasobwa yitwa Cash App.
Iyi myaka ari kuyisabirwa nyuma yo gushinjwa icyaha cyo kwiba $670,000 [906,034,608 Frw]
mu itorero rye mu gihe cy’imyaka myinshi igera kuri 20 yamaze ari umwanditsi n’umubitsi waryo. Yayibye akoresheje application, ayavana kuri banki batabizi.
Ibi byamenyekanye ubwo abayobozi b’itorero babonaga ko amafaranga adahagije mu gihe bageragezaga gutanga umusanzu ku rindi torero. Abagize iri torero bari barizeye Ragland, bamushinga konte ya banki.
Mu kwiba amafaranga yo kuri banki yakoreshaga application ya Cash App abagize itorero ntibabimenye kuko batabyitagaho, aho bagiriye gutanga imfashanyo ku rindi torero ryari rigiye kugura inyubako nshya baba ari bwo basanga amafaranga bafite adahagije kandi bari bizeye ko ahari.
Nk’uko biri mu nkuru ducyesha Christian Post, ipereza ryagaragaje ko Ragland ari we wayibye kuko ari we wari uzi ibijyanye na konte ya banki y’itorero. Ryagaragaje kandi ko yinjizaga amaturo mu mufuka we akoresheje Cash App.
Abashinzwe iperereza bakeka ko amafaranga yose yibwe ashobora kuba ari menshi kurusha ayo batangaje, kuko basuzumye gusa ingengo y’imari yo mu myaka irindwi. Ibihano bizatangazwa ku itariki ya 27 Mutarama 2025.
Iyi ni yo application ya mudasobwa yakoresheje yitwa Cash App
