Uwitonze Clementine "Tonzi" waraye amuritse album ya 10 yise "Mubwire", yavuze ko imyiteguro yo kwerekeza mu gitaramo kizabera mu gihugu cy’u Bubiligi ikomeje kugenda neza, asaba inshuti ze ziba ku mugabane w’u burayi kuzitabira igitaramo "Family Healing".
Umuryango Family Corner washinzwe na Ev. Eliane Niyonagira wateguye igitaramo cyiswe Family Healing. Iki gitaramo cy’umuryango cyatumiwemo abaramyi bambaye ubwiza bw’Imana n’umwambaro w’igikundiro. Bosco Nshuti na Tonzi biteguye kuzataramira abo muri iki gihugu.
Tonzi yavuze ko imyiteguro igeze kure
Tonzi yahamije amakuru yo kwitabira iki gitaramo. Yagize ati: “Tariki ya 11/10 natumiwe mu gitaramo cy’umuryango Family Healing. Imyiteguro iri kugenda neza, twizeye kandi twiteguye kugirirwa neza n’Uwiteka mu guhembuka kw’imiryango, urubyiruko gutsinda ibyabatsindaga. Tuzaganira byinshi kandi by’imbaraga.”
Yunzemo ko biteguye kuzataramira Imana. Tonzi ati: “Nyuma tuzataramira Imana tuyishima kandi tuyisaba gukomeza kubaka umuryango uhesha Imana icyubahiro. Icyo nabasezeranya, ahari ubwiza bw’Imana haba uguhindwa bashya muri Kristo.
Ndatumiye rwose abari mu bice bitandukanye muri diaspora bazabashaka kuza tuzagirana ibihe byiza. Barebe poster basome neza, barebe ibisabwa, bazaze bitegure neza. Nzishima kubabona kuko mpafite abantu benshi kandi bagenda bambwira ko turi kumwe. Bazaza, ndizera ko no ku ruhande rw’abadutumiye nabo bari tayari mu myiteguro.”
Family Corner: Igisobanuro cyo gutuza Roho nzima mu mubiri muzima
Intego ya Family Corner ni ukugarura ubusabane bw’Imana mu muryango. Mu kiganiro na Paradise, Ev. Eliane Niyonagira washinze uyu muryango yifashishije urugero ruboneka mu gitabo cy’Itangiriro, aho Imana yataramanaga n’umuryango wa Adam na Eva, ariko nyuma bwa busabane buza kuyoyoka bitewe n’icyaha (Itangiriro 3:8-10). Imana yaraje gusura inshuti zayo zijya kwihisha kuko zari zamaze gucumura.
Kuri ubu, Ev. Eliane ageze kure ategura Family Healing yatumiyemo Bosco Nshuti na Tonzi. Yavuze ko gutumira aba bahanzi, impamvu ya mbere ari uko iki giterane cyitwa Family Healing, aba bahanzi bakaba bafite indirimbo zomora imitima, harimo amagambo atuma umutima uruhuka cyane.
Yavuze zimwe mu ndirimbo zabo zifite amateka akomeye mu muryango we. Ati: “Nk’ivuga ngo ‘Nanjye ndi mu bo yanyuzeho mbabaye’, ‘Ndi muri Yesu Kristo’ za Bosco Nshuti ni na zo zatumye mumenya kuko narimo nca mu bikomeye ndwaje umwana Cancer. Icyo gihe ni bwo umutware wanjye twari tumaranye imyaka 14 yakiriye agakiza abonye imirimo y’Imana mu mwana wacu. Yakundaga kumva Bosco Nshuti na Aimée Frank, ni we watumye mbamenya.”
Ev. Eliane Niyonagira asanzwe ari umuhanzikazi mu muziki wa Gospel. Afite indirimbo ze bwite ndetse yabaye mu makorali atandukanye kuva akiri umwana, n’ubu aracyaririmba mu rusengero asengeramo.
Indirimbo ze “Witinya Yakobo” na “Ibihamya” ni zo ziri kuri YouTube. “Amashimwe” na “Ntiwandetse” ntabwo arazishyira kuri YouTube, ariko zirakoze mu majwi. Ati: “Mu muziki mfite gahunda yo gukomeza, nkanategura ibitaramo byo kuramya Imana kuko ubu ndimo kuririmbishwa n’amashimwe atanyemerera guceceka bitewe n’uburyo nabonye Imana.”
Tonzi ategerejwe i Burayi
