Isezerano risohoye rijya rivamo gushima tukuzura umunezero tukanezererwa Imana. Kuri ubu amashimwe ni menshi mu rugo rwa John Muhereza na Tumusiime Juliet nyuma yo kwibaruka umwana wa Kabiri bise "Abewe Jesper Blessing". Ni umwana wifuzwaho gutera ikirenge mu cy’umwami Dawidi.
Kuwa Gatatu tariki ya 12 Ugushyingo 2025 ni bwo uyu muryango wasangizaga abakunzi bawo amafoto y’umwana w’umuhungu wavutse nyuma y’urugendo rutoroshye rwo gutwita.
Aya mafoto akaba yaraherekeshejwe ubutumwa bw’amashimwe mva mutima ashima Imana yarinze Juliet ikanamuha umwana muzima.
Kuri Instagram, Tumusiime Juliet yifashishije ifoto imugaragaza atwite apfukamye yambaye ikanzu itukura, ayiherekesha ubutumwa bwanditse mu rurimi rw’Icyongereza agira ati: “Praise be to the God and Father of our Lord Jesus Christ, who has blessed us in Christ with every spiritual blessing in the heavenly realms.”
Ni jambo ry’Imana riboneka muri Abefeso 1:3 hagira hati: “Imana y’Umwami wacu Yesu Kristo, ari nayo Se ishimwe, kuko yaduhereye muri Kristo imigisha yose y’umwuka yo mu ijuru.”
Aganira na Paradise, Tumusiime Juliet yagaragaje imvamutima zo kwakira ubuheta mu muryango. Ati: “Uburyo twakiriyemo ubuheta bwacu birenze ibyiyumviro by’abantu, ibyishimo birenze uko umuntu yabivugamo, gusa hashimwe Imana itanga abana kuko ari wo munezero w’ababyeyi mu isi.”
Ku byerekeranye n’ubusobanuro bw’uwo mugisha ku muryango, yagize ati: “Simfite ijambo rimwe ryabisobanura, gusa ni umunezero urenze ku muryango.” Yakomeje ati: “Ni iby’agaciro gakomeye ku muryango (umunezero, ubuzima, ubutunzi, ubutumwa muri we).”
Ubwo yabazwaga umuntu wo muri Bibiliya wafatwa nk’icyitegererezo cy’uyu mwana, yavuze ko Umwami Dawidi ari we uyu muryango wahitamo nk’icyitegererezo cy’uyu mwana.
Ibyamamare byifatanyije n’uyu muryango kwakira uyu mwana w’ubuheta
Mu basamiye hejuru iyi nkuru nziza harimo umuramyi Tonzi ukubutse mu gihugu cy’u Bubiligi. Tonzi uzwiho kudapfukirana amarangamutima ye yagize ati: “Congratulations, Nimwonkwe tubahaye impundu.”
Ubu butumwa bwa Tonzi bukaba bwahuriranye n’ubwa Sharon Gatete muka Chryso wagize ati: “Congz mama” n’agatima ngo “bi.”
Julius William Niyitegeka uzwi nka Julius Chita uzwi cyane mu myidagaduro, na we yatanze ubutumwa bw’ishimwe kuri Juliet, nawe wahise amushimira.
Divine Nyinawumuntu umuramyi uririmba mu itsinda rya Kingdom of God Ministries akaba anaherutse gusohora indirimbo “Hozana,” ni umwe mu bishimiye kwakira uyu mwana.
Yifashishije ifoto y’uyu mubyeyi ayishyira kuri status ye agira ati: “Ineza y’umuntu ni yo imutera gukundwa, iteka mpora nzirikana ineza yawe. Urugendo rwanjye rwa muzika washyizeho amatafari menshi.” Yunzemo ko yishimiye kwakira uyu mwana kandi ko azaba umunyabuntu, umunyamigisha nk’ababyeyi be.
Umunyamakuru Tman [Mupende Gideon] yanditse ku rukuta rwe rwa Instagram ati: "Big congratulations to Juliet & John on welcoming your second born. To God be the glory". Ugenekereje mu kinyarwanda, yanditse ati: "Ishimwe rikomeye kuri Juliet & John ku kwibaruka umwana wabo wa kabiri — Imana ihabwe icyubahiro cyose!"
Tumusiime Juliet yamamaye kuri Televiziyo Rwanda mu kiganiro cy’iyobokamana "RTV Sunday Live" yakoranye n’abarimo Ronnie, DJ Shawn ndetse na Becky.
Tariki ya 21 Kanama 2021 ni bwo Juliet yasezeranye kubana akaramata na John Muhereza, umunyamakuru w’imwe muri televiziyo yo muri Kenya.
Ni mu birori by’akataraboneka byabereye mu rusengero rwa EPR Kabuga (gusezerana imbere y’Imana) mu gihe tariki ya 26 Gicurasi aba bombi bari barahamije intego y’urukundo rwabo imbere y’amategeko.
Hari hagamijwe gushimangira ibyabaye tariki ya 06/12/2020, umunsi wa mbere Muhereza yambikaga Juliet impeta y’urukundo amutunguye mu birori byabereye mu Kiyovu kuri Suis Hotel.
Iyi tariki ikaba amateka mu buzima bwa Juliet dore ko bwari ubwa mbere ashyizwemo impeta y’urukundo n’umusore bari bamaranye imyaka itanu babana mu munyenga w’urukundo.
Ubukwe bw’aba bombi bwitabiriwe n’ibyamamare nka Uwase Delphine uzwi nka Soleil muri filime y’uruhererekane ya Bamenya Series, akaba ari no mu bambariye Juliet; Murenzi Emmanuel uzwi nka Emelito wakoreye Isibo TV; Sharon Gatete; Becky bakoranye igihe kirekire muri Sunday Live; Pastor Mucyo Diana wari Marreine wa Juliet n’abandi.
Tumusiime Juliet ni umwe mu banyamakuru bakunzwe, aho benshi bamufata nk’urugero rwiza rutsindagiye kandi rucugushije mu kugira umutima mwiza wa zahabu ushyigikira abahanzi akanabafasha kugera ku nzozi zabo.
Ni umukristo wo mu mutima wageze ku musaraba, ibi bigahamishwa n’imbuto z’abihannye yerera abantu batandukanye. Ikindi, ni umuramyi dore ko mu bihe bitandukanye yasohoye indirimbo nka “Sinzaceceka,” “Tera intambwe imwe,” “Waba usize iki” n’izindi.
Ubwo Juliet yari akuriwe
Umuryango wa John na Juliet ukomeje kwaguka, ishimwe ni ryose ku Mana
REBA INDIRIMBO "SINZACECEKA" YA JULIET TUMUSIIME
