I Lahore muri Pakistan, umukobwa witwa Sana Javed w’imyaka 18, yabuze mu kwezi kwa Kamena mu Mujyi wa Lahore, nyuma y’amezi atanu, tariki ya 14 Ugushyingo 2024 aratabarwa agaruka mu rugo nyuma yo gushyingirwa ku ngufu no guhindurwa idini.
Sana Javed, umukobwa wa Javed Masih, umushoferi w’Umugatolika utuye i Lahore, yaburiwe irengero tariki ya 9 Kamena 2024, amaze kuganira n’umugore w’umusilamukazi ku rubuga rwa WhatsApp witwa Hafsa.
Hafsa yamwohereje amafaranga, amwoshya kuza mu Mujyi wa Dera Ismail Khan mu Ntara ya Khyber Pakhtunkhwa, akomeza urugendo yerekeza mu cyaro cya kure muri Balochistan.
Ahageze, yarafatiriwe, bamwambura telefoni ye, bamutegeka guhindura idini akinjira mu idini ya Islam no gushyingiranwa n’umusaza wari umuvandimwe wa Hafsa.
Nyuma yo kubura umukobwa we, Javed Masih yamenyekanishije ibyabaye kuri polisi, ariko dosiye ye iratakara. Hashize igihe, yahawe amakuru n’umwarimu w’Umukristo wo muri Balochistan witwa Waseem, ko umukobwa we ari muri icyo cyaro.
Abifashijwemo n’itsinda ry’abanyamategeko b’Abakristo n’umuyobozi w’umunyapolitiki w’Umusilamu muri Balochistan, polisi yajyanye n’umuryango wa Sana Javed kumugarura i Lahore.
Sana Javed yavuze ko yasengaga asaba Imana ngo imutabare, kandi ngo igitabo cya Zaburi hamwe n’indirimbo zo mu rusengero byakomeje umutima we muri ibyo bihe by’agahinda.
Komite y’Uburenganzira bwa Muntu y’Umuryango w’Abibumbye ku itariki ya 7 Ugushyingo 2024, yasabye Leta ya Pakistan gufata ingamba zikomeye zo guhashya ikibazo cy’ishimutwa, ikibazo cyo guhindurirwa idini ku ngufu n’icyo gushyingira abakobwa ku ngufu, cyane cyane abaturuka mu madini afite abayoboke bake. Yanasabye ko abakora ibi bikorwa babiryozwa mu buryo bukomeye.
Pakistan iri ku mwanya wa karindwi mu bihugu bigoye cyane kubamo ku Bakristo, nk’uko raporo ya Open Doors 2024 World Watch List ibigaragaza.
Isoko: Christian Daily International–Morning Star News
Sana Javed (hagati) ari kumwe n’ababyeyi be b’Abakristo nyuma yo gutabarwa agakurwa ku Musilamu wari wamugize umugore ku ngufu
