Itsinda ry’abaramyi Shalom Choir rikorera umurimo w’Imana mu itorero ADEPR Nyarugenge, ryasohoye indirimbo nshya ryise “Sinzarambarara” ikubiyemo ubutumwa bukomeye bwo kwihangana, kwizera, no kwiringira imbabazi z’Imana binyuze mu maraso ya Yesu Kristo.
Iyi ndirimbo ni igice kimwe cy’uruhererekane rw’ubutumwa Shalom Choir iri kugeza ku Banyarwanda biciye mu ndirimbo n’ibitaramo by’ivugabutumwa.
Mu kiganiro bagiranye na Paradise, Shalom Choir yasobanuye icyatumye bahimba iyi ndirimbo. Bavuze ko bashakaga gutanga ubutumwa bugira buti: "Ntibazarambarare nibagwa mu moshya, ahubwo bazikubite imbere y’Umukiza, azababarira."
Ni ubutumwa bugamije kwereka abantu ko nubwo bashobora kugwa mu byaha, imbabazi za Yesu zituma bongera guhaguruka no gukomeza urugendo rwo gukiranuka. Barashishikariza abantu kudacika intege mu rugendo rw’ukwizera, ahubwo bagahindukira bakihana, kuko amaraso ya Yesu agifite ubushobozi bwo gukiza no kubabarira.
Indirimbo “Sinzarambarara” yashyizwe hanze nyuma y’igitaramo gikomeye Shalom Choir yakoze ku wa 22-23 Werurwe 2025, bise “Shalom Worship Experience”.
Iki gitaramo cyabereye kuri ADEPR Nyarugenge, cyari kigamije gufasha abantu gusabana n’Imana binyuze mu kuramya no guhimbaza. Abitabiriye iki gitaramo bagaragaje ko cyabafashije mu buryo bw’umwuka, ndetse bamwe basaba ko cyakongera gutegurwa vuba.
Iyi korali yabihamirije Paradise igira iti: “Umusaruro twakuyemo ni uko abantu baramije Imana, bakabasha gushyikirana n’Umuremyi wabo, kandi abantu bakunze uburyo byakozwemo banadusaba kuzongera vuba. Intego yacu yagezweho cyane.”
Shalom Choir ni korali imaze imyaka irenga 39 ikorera umurimo w’Imana, izwi mu ndirimbo nka “Abami n’Abategetsi”, “Nyabihanga”, “Uravuga Bikaba” n’izindi.
Yaherukaga gukora igitaramo gikomeye muri BK Arena ku wa 17 Nzeri 2023, aho yabaye korali ya mbere yo muri ADEPR yabashije kuzuza iyi nyubako. Muri icyo gitaramo, abantu barenga 100 bakiriye agakiza, ndetse hatangijwe ku mugaragaro igikorwa cy’urukundo bise “Shalom Charity” kigamije gufasha abatishoboye.
Indirimbo “Sinzarambarara” ikomeje gukundwa cyane, aho abantu benshi bayisangiza ku mbuga nkoranyambaga, bayivugaho ko ibafasha kwegera Imana no kongera kwizera imbabazi zayo. Shalom Choir ikomeje urugendo rwayo rwo kwamamaza ubutumwa bwiza binyuze mu ndirimbo, ndetse ikaba ifite gahunda yo gushyira hanze izindi ndirimbo nshya mu minsi iri imbere.
Kuri ubu, ushobora kureba indirimbo “Sinzarambarara” kuri YouTube:
