Shalom choir ya ADEPR Nyarugenge yakoze igikorwa cy’urukundo yise ‘Shalom Gospel Festival Supporting Single Mothers’, akaba ari igikorwa cy’umunsi wa kabiri mu bikorwa byose bizakorwa muri ‘Shalom Gospel Festival’.
Kuri uyu wa Kane tariki 14 Nzeri 2023, hakomeje umunsi wa kabiri wa Shalom Gospel Festival, ivugabutumwa rya Korali Shalom ku bufatanye na ADEPR, ururembo rwa Kigali. Ni igikorwa cyaranzwe no gushyigikira ababyeyi b’abagore barera abana ku giti cyabo.
Aba babyeyi batoranijwe mu madini atandukanye, bahabwa amahugurwa yo kudoda, ariko kuri ubu barahabwa imashini zo kudoda zisaga 47. Aba babyeyi 47 bagize itsinda ryitwa ‘Urumuri’ bashyikirijwe imashini zo kudoda na Shalom Choir, ku bufatanye n’Ururembo rwa Kigali.
Umuyobozi w’Ururembo rwa Kigali, Rev. Valentin RURANGWA, yasobanuye ko iki gikorwa cyakozwe hashingiwe ku ntego y’itorero rya ADEPR ari yo "Guhindura ubuzima bw’abantu mu buryo bwuzuye, mu buzima no mu mwuka, hifashishijwe ubutumwa bwa Kristu."
Yakomeje asaba itsinda ’Urumuri’ kuzabyaza ibi bikoresho bahawe umusaruro, kugira ngo binababere intangiriro y’ubukire.
Iki gikorwa ni cyo kibanziriza icya nyuma muri iri vugabutumwa ‘Shalom Gospel Festival’ rizasozwa mu gitaramo gikomeye giteganyijwe ku Cyumweru, itariki 17 Nzeri 2023, muri BK Arena, aho abazitabira bazataramirwa na Shalom Choir ndetse na Israel Mbonyi. Kwinjira ni ubuntu.
Shalom choir ubwo yaganiraga n’abanyamakuru muri BK Arena
