Umuvugabutumwa Semanza Jean Bosco ufite ubuhamya bw’uko yavutse mu bana barenze 40 ku mubyeyi umwe washatse abagore batatu, yatanze inyigisho ishishikaje y’uko Imana ihetse abantu bayo, arushaho gushimangira ko ari mu bafite Ijambo ry’Imana ryuzuye ihumure, dore ko yakomozaga kuri iyo nyigisho ivuga ku guhekwa n’Imana agaragaza ko na we yamuhetse mu muryango w’abana badahuje ababyeyi.

Abakristo b’Itorero Living word Temple by’umwihariko abo muri Paruwase ya Save yari yabakiriye muri iki giterane, bamugiriyeho umugisha babona ihumure ndetse abatuye Mugogwe barihana, bakira Yesu nk’Umwami n’Umukiza w’ubugingo bwabo.

Haririmbye amakorari abiri yo muri Paruwasi ya Save, ni ukuvuga Korari Ituze na Korari Philadelifia, na Sauti Hewani Ministries (Ijwi Riranguruye) yahuriye ku ruhimbi na Rose Muhando mu bitaramo Dana Morey yakoreye muri Kirehe.

Iyi Sauti Hewani Ministries imaze kubaka izina nyuma y’umwaka imaze itangiye ivugabutumwa mu buryo bwagutse, yagize inshuti uyu muvugabutumwa Semanza Jean Bosco, kubera ikibitsanyo cy’Imana ahetse, nyuma yo kubagezaho ubuhamya bwe mu nyigisho yatanze.

Rev. Rugamba Erneste uhagarariye iri torero Living Word Temple, ururembo rw’Intara y’Amajyepfo, mu kiganiro yagiranye na Paradise nyuma y’igiterane yavuze kuri Semanza agira ati: “Abakristo b’Itorero Living word Temple, Paruwase ya Save, bamusabye kuzagaruka n’ubutaha bakagirana ibihe byiza.”

Iki giterane cyari kibaye icya mbere kibereye mu Rurembo rw’Amajyepfo, cyari gifite umutwe uvuga ngo ‘Kubaka Umurimo’ ushingiye ku magambo aboneka muri Nehemiya 2: 18.

Iri torero Living Word Temple rifite icyicaro gikuru I Kigali, rikaba rigenda rigaba amashami hirya no hino, aya mbere akaba yaratangijwe mu Karere ka Gisagara (Save).

Semanza yibanze cyane ku bivugwa muri iyi mirongo

Abatuye Mugogwe bishimiye cyane Semanza bamusaba kuzasubira kubasura abashyiriye inyigisho nziza