Abaturage benshi bagaragaje kutishimira uburyo amatora yakozwe n’ukuntu abatavuga rumwe n’ubutegetsi birukanwe ku rutonde rw’abakandida.

Amashusho yakwirakwijwe ku mbuga nkoranyambaga yagaragaje abaturage barimo batera amabuye abapolisi, ibinyabiziga, ndetse n’ibirindiro by’abashinzwe umutekano birasenywa.

Uretse ibyo, urubuga NetBlocks rwemeje ko internet yahagaritswe mu gihugu hose, ivuga ko habaye “ihagarikwa rya murandasi mu gihugu hose,” ibintu benshi bafashe nk’uburyo bwo guhisha amakuru y’ibibera mu gihugu.

Perezida Samia Suluhu Hassan, waje ku butegetsi mu 2021 asimbuye nyakwigendera John Pombe Magufuli, yari ahanganye n’abakandida baturuka mu mashyaka mato, nyuma y’uko abatavuga rumwe na leta b’abanyamashyaka nka Chadema na ACT-Wazalendo birukanwe mu matora.

Abo batavuga rumwe n’ubutegetsi bavugaga ko bari bakomeje guhigwa, gufungwa cyangwa gushimutwa mu gihe cyose cyabanjirije amatora.

Umwe mu basesenguzi b’ibya politiki, Deus Valentine, yavuze ko “Tanzania itazongera kuba uko yari isanzwe nyuma y’aya matora,” ashimangira ko igihugu cyinjiye mu bihe bishya byo “gukaza igitugu kurusha mbere, bitaba hakabaho kurenga ku butegetsi bwitwaza igitugu.”

Perezida Samia, ukomoka muri Zanzibar kandi usengera muri Islam, yakomeje gusaba abaturage kwirinda imvururu no gushyira imbere amahoro, avuga ko gahunda ye ari “ukubaka ubukungu bushingiye ku baturage.”

Nyamara, imyigaragambyo yagaragaye hirya no hino yerekanye ko abaturage benshi batishimiye uburyo igihugu cyabo gikomeje kuyoborwa n’ishyaka CCM rimaze imyaka irenga 60 ku butegetsi.

Mu gihe Tanzania yari yiteguye amatora y’umukuru w’igihugu, igihugu cyagize impagarara n’akavuyo kagaragaza ubushyamirane bwa politiki hagati y’amashyaka n’abayoboke bayo.

Mu mijyi nka Dar es Salaam, Mwanza na Arusha, hari habaye imyigaragambyo y’abaturage bashinja Komisiyo y’Amatora kubogama no kudasobanura neza uburyo amajwi yabazwe. Abashinzwe umutekano batabaye byihuse, bituma habaho gukomeretsanya, gufatwa kwa bamwe, n’iyicarubozo ryavuzwe n’abanyamategeko.

Perezida Samia Suluhu Hassan, uzwiho kuba umwe mu bayobozi b’abagore bubashywe muri Afurika, yashimangiye ko amatora yakozwe mu mucyo, anasaba abaturage kwihangana no kugirira icyizere inzego z’ubutabera.

Samia, usengera mu idini ya Islam, yagaragaje ko ashingiye ku ndangagaciro z’amahoro, ubumwe n’ukwemera, yibutsa ko ubuyobozi budakwiriye kuba intandaro y’amacakubiri. Mu ijambo rye, yavuze ati:

“Tanzania ni igihugu cy’amahoro; guharanira ubutegetsi ntibikwiriye kurenga imbibi z’ubumuntu n’ubworoherane.”

Ibi byatumye bamwe mu bayobozi b’amadini, cyane cyane abo mu idini ya Islam n’Abakristo, basaba ko habaho ibiganiro by’ubutabera kugira ngo amatora yabayeho azabe urufunguzo rw’iterambere aho kuba intandaro y’ubwumvikane buke.

Nubwo Tanzania iri mu bihe bikomeye by’amatora, icyizere kiracyariho ko ubuyobozi bwa Perezida Samia Suluhu Hassan buzashobora kugarura ituze no gushyiraho uburyo bushya bwo kubahiriza uburenganzira bwa buri wese.

Icyo benshi bategereje ni uko Tanzania izakomeza kuba icyitegererezo cy’ubumwe n’amahoro muri Afurika y’Iburasirazuba, nubwo inzira ijya ku mahoro isaba ubutwari n’ubwitonzi.

Abana banyura ku cyapa cyamamaza Hassan muri Arusha

Abaturage bari ku murongo mu gihe cyo gutora, kuri station ya Dar es Salaam, ku wa Gatatu

Samia Suluhu Hassan mu kwiyamamaza muri Iringa, muri uku kwezi

Abagize ishyaka ACT-Wazalendo bashyigikiye Samia ku Cyumweru muri Zanzibar