Ni umunsi usize abanyempano batandatu babonye itike yo gukomeza mu cyiciro gikurikiyeho kizahuza intoranywa zizava muri zone esheshatu.

Muri aka karere ka Musanze hatoranyijwe abanyempano 6 ari bo Muhawenimana Divine wari wambaye No 1, Parfaite Nishimwe wari wambaye No 9 ya rutahizamu mukunda mu Bwongereza, Eric Igirimbabazi usengera mu itorero rya ADEPR na No 7 ya ba Cristiano Ronaldo;

Christian Muhire no 14, Ombeni Claude na Ngoga Serge warokokeye ku giceri nk’Amavubi yatwaye CECAFA mu 1999 dore ko yabanje kubona Yes 2 na No 1 ahabwa amahirwe ya nyuma nk’amwe The Ben yaririmbye, birangira yisanze mu banyamahirwe batandatu.

Imwe mu nkuru iri rushanwa risize i musozi ni isenyuka ry’itsinda ryitwa Praise and Worship Team. Ni itsinda ryari rigizwe na Uwase Noella na Muhawenimana Divine waririmbye ku ikubitiro akaza no kuboneka mu banyamahirwe 6 bazamanuka i Kigali baje kwishakamo umusimbura wa Israel Mbonyi.

Ubwo hahamagarwaga iri tsinda, benshi batunguwe no kubona Divine agaruka ku ruhimbi gufasha Uwase Noella. Aba bahanzi bagaragaje ko buri wese ashoboye ku giti cye, gusa mu miririmbire hagaragaragamo kudahuza.

Ibi byatumye Nelson Mucyo wari uhagarariye Akanama Nkemurampaka agira inama aba bahanzi ko bagomba gutandukana, Noella akaririmba ku giti cye. Iby’iri tsinda byarangiriye aho, sinjye wahera hahera Praise and Worship Team.

Gutandukana byabereye iramba Noella warokotse iki cyiciro n’ubwo atabashije kuza mu banyamahirwe batandatu. Uko Praise and Worship Team yasenyutse, buri umwe akaba agiye kujya aririmba ku giti cye ndetse hakaba hari icyizere ko bazagera kure, birasa n’isenyuka rya Dream Boys kuko yaba TMC na Platini buri umwee asigaye ari umuhanzi wigenga.

Amajonjora ya Rwanda Gospel Stars Live i Musanze, ni irushanwa ryitabiriwe n’umusaza witwa Munyaneza Antoine wabaye uwa gatatu mu irushanwa ryitwaga Apostle TV Got Talent wanahembwe ibihumbi manana atanu y’u Rwanda (500,000 Frw).

Iri rushanwa ryategurwaga na Nyandwi Jean De Dieu uba muri Amerika, ryavuzwemo amanyanga menshi nyuma y’uko benshi mu baryitabiriye bavugaga ko uyu Munyaneza Antoine yaba yarahembwe bitewe n’isano ashobora kuba afitanye na Claude wari umuhuzabikorwa w’iri rushanwa byaje no kumuviramo guhagarikwa.

Icyo gihe, Nyandwi Jean de Dieu yatangarije Paradise ko Claude atitwaye neza by’umwihariko ku bw’Imikoreshereze y’amafaranga yari agenewe iri rushanwa bimuviramo kumuhagarika.

Undi wigaragaje muri iri rushanwa ni umukobwa wiga mu mwaka wa 6 w’amashuli yisumbuye i Musanze ariko uvuka i Nyagatare witwa Umurerwa Nadia benshi basigaye bita "Umurizabageni" bitewe na Videwo ye iherutse gukwirakwizwa aririmba mu bukwe akariza ayo kwarika Tuyisenge Johnson na Umuhoza Adeline.

Uyu mukobwa uririmba mu njyana Gakondo yanyuze benshi bitewe n’uburyo yasobanuye ko yifuza gusigasira injyana Gakondo mu kuramya no guhimbaza Imana agatera ikirenge cya Josh Ishimwe. Nadia yabonetse mu banyempano 12, gusa ntiyabashije kuboneka mu banyamahirwe 6.

Umunyempano wavugishije benshi ni uwitwa Fabrice wari wambaye no 21. Uyu muririmbyi wahereye ku ndirimbo ye akaba yatangiye neza ubwo yaririmbaga neza indirimbo ye bwite, yemeza Akanama Nkemurampaka, Nelson Mucyo amwita murumuna wa Andry Bumuntu.

Niko byagenze no mu ndirimbo ya 2 yashimiwe imiririmbire, gusa aza gutaha nka nyina wa nzamba kuko ubwo yasabwaga guhindura injyana yagowe nabyo, bimuviramo kubura amahirwe.

Gusa iki cyemezo abanyamakuru benshi ntibacyumvise kimwe n’abagize akanama nkemurampaka kari kagizwe na Producer Camarade, Nelson Mucyo na Munezero Grace.

Bamwe mu banyamakuru ntibanyuzwe n’ubusobanuro bwatanzwe na Grace aho yavuze ko atabonye amahirwe yo gukomeza ku bwo kwizirika ku njyana imwe.

Abatavuze rumwe nawe bavugaga ko umuririmbyi atakabaye yimwa amahirwe yo gukomeza kubera injyana imwe dore ko mu miririmbire ye yagaragazaga kwigirira icyizere, ijwi ryiza no kuririmba neza mu njyana yahisemo.

Mu kiganiro n’itangazamakuru, abajijwe iki kibazo n’umunyamakuru Didace wa Yongwe TV, Nelson Mucyo yavuze ko kuba umuhanzi yahabwa amahirwe ya kabiri yo guhindura injyana ahanini biterwa n’uko abagize akanama nkemurampaka baba babanje kumva ijwi rye bakarihuza n’injyana uwo muririmbyi yaririmbamo akavamo umuririmbyi ukomeye.

Gusa muri rusange benshi bakomeje kwishimira imigendekere y’iri rushanwa ry’uyu mwaka dore ko umwaka ushize ryagiye rivugwamo byinshi bikwiye guhinduka.

Gusa kuri ubu gukorera mu bwisanzure ku bagize akanama nkemurampaka biri mu bitanga amahirwe y’imigendekere myiza mu gihe hatazabaho guteshuka ku bayobozi b’Iri rushanwa barangajwe imbere na Bwana Aimable Nzizera wakunze kugirana ibibazo n’abantu batandukanye mu irushanwa ryabanjirije iri.

Ku munsi wa mbere iri rushanwa ryabereye mu karere ka Rusizi ahahuriye abanyempano baturutse i Namasheke Ndetse na Rusizi. Nyuma yo kuva i Musanze, iri rushanwa rizakomereza i Rubavu kuwa 31/03/2024.

Bwana Aimable Nzizera Umuyobozi wa Rwanda Gospel Stars Live

Abanyempano 6 bazahagararira Amajyaruguru muri Rwanda Gospel Stars Live