Itsinda rikaba n’umuryango wa Rene Patrick na Tracy baririmba indirimbo zo kuramya no guhimbaza Imana, muri izi ntangiriro z’ukwezi kwa Gashyantare 2024 ku itariki ya mbere, basohoye indirimbo bise Niryubahwe, bakaba ari bo ba mbere babikoze muri uku kwezi.
Iri bavuga ngo Niryubahwe, ni izina Yesu, kuko baririmba bati: “Nta rindi zina mu Isi no mu Ijuru, nta n’irizabaho tuboneramo agakiza atari Yesu. Hejuru y’amazina yose, hejuru y’abakomeye, Yesu Kristo ni we Mwami w’abami, ingoma ye ni iy’ibihe byose.”
Ahanini muri iyi ndirimbo, bagaruka ku izina Yesu baririmba ko ari ryo ribonerwamo agakiza, kandi ko nta handi wakabonera hatari muri ryo. Ibyo bigomba gutuma ryubahwa ku Isi hose cyangwa kugera ku mpera z’Isi, rikubahwa ibihe byose.
Mu buryo bw’amajwi (audio), iyi ndirimbo Niryubahwe yatunganyijwe na Sammy Pro, amashusho yayo ayoborwa na Musinga (Video Director), akosorwa na Brilliance (Video Editor), gusa ikozwe buryo bwa live.
Iyi ndirimbo si yo yonyine uyu muryango ukoranye, kuko bakoranye iya mbere yitwa Jehovah yasohotse mu mwaka ushize wa 2023, ku itariki 2 Nzeri, ikaba ari na yo ndirimbo yabo yakunzwe cyane, ikanarebwa inshuro nyinshi ku muyoboro wabo wa YouTube.
Mu buzima busanzwe, Rene Patrick yari umuhanzi uririmba wenyine, aza kwinjiza umugore we mu mwuga wo kuririmba indirimbo zo kuramya no guhimbaza Imana, nyuma y’igihe kibarirwa mu myaka 2 bashyingiranywe, ku itariki 4 Ukuboza 2021.
Umugore we Tracy Agasaro, asanzwe ari umunyamakuru kuri radiyo ya kabiri ya Radiyo y’Igihugu RBA izwi nka KC2, ubu akaba abifatanya no kuririmbana n’umugabo we nyuma yo kurushinga, ariko mbere yo gutangira kuririmbana bajyanaga mu bitaramo, ariko nta ndirimbo bahuriyeho bafite.
Aba ni bamwe mu miryango yihaye intego yo kuririmbana indirimbo zo kuramya no guhimbaza Imana barimo Papi Claver na Dorcas, Ben na Chance, James na Daniella, Zabron Ndikumukiza na Mugisha Deborah, Manzi Nelson na Irakiza Eunice, Amanda Fung na Kavutse Olivier, Fabrice Nzeyimana na Maya Nzeyimana n’abandi babana nk’umugabo n’umugore bakanaririmbana.
Ku ruhande rwa Rene Patrick, uretse izi ndirimbo ebyiri yakoranye n’umugore we Agasaro Tracy, asanzwe azwi mu ndirimbo nyinshi zakunzwe zirimo Arankunda (Umunsi ku wundi), Ku bw’imbabazi zawe, Ntuhinduka, Ni Byiza n’izindi.
Rene Patrick yinjije mu muziki Tracy Agasaro
Bamaze imyaka irenga ibiri bashyingiranywe
Batumirwa mu bitaramo bitandukanye
RYOHERWA N’INDIRIMBO NSHYA YA RENE & TRACY
