Umuvugabutumwa w’umunyamerika Paula White-Cain, uzwi cyane ku ruhare rwe mu ivugabutumwa mpuzamahanga no kuba umujyanama w’imbere mu bya roho wa Perezida wa Leta Zunze Ubumwe za Amerika, Donald Trump, yageze muri Uganda ku mugoroba wo kuri uyu wa Gatanu yakirwa mu buryo bw’ikirenga na Pastor Robert Kayanja, umushumba mukuru w’itorero Miracle Centre Cathedral.

Ubwo yageraga ku kibuga cy’indege mpuzamahanga cya Entebbe, yakiriwe n’abakirisitu batandukanye, abayobozi b’amatorero n’abashumba b’inararibonye bari baje kumuha ikaze no gushyigikira uruzinduko rwe rufite intego yo kuzamura ukwizera no gukomeza umurimo w’Imana muri Uganda.

Pastor Robert Kayanja, wamamaye mu bikorwa by’ivugabutumwa rikora ibitangaza no guteza imbere ibikorwa by’isanamitima, yavuze ko ubutumwa Evangeliste Paula White-Cain yigisha ari ingenzi cyane ku gisekuru cy’iki gihe.

Ati: “Twakiriye umukozi w’Imana ukomeye. Ubutumwa bwe bwafashije amahanga menshi, kandi tuzi neza ko Imana yamuzanye muri Uganda ku mpamvu zayo. Hari ikintu gishya Imana igiye gukora mu gihugu cyacu binyuze muri uru ruzinduko.”

Uru ruzinduko rufite gahunda nyinshi zishingiye ku ivugabutumwa

Paula White-Cain azitabira ibikorwa binyuranye birimo: Ibiterane by’ivugabutumwa bigamije kuzamura ukwizera no kuremera imitima; Amahugurwa ku bayobozi b’amatorero, byibanda ku miyoborere ishingiye ku ndangagaciro za Gikristo;

Inama n’ibiganiro byihariye bigamije gushishikariza abakirisitu kuba urumuri mu muryango n’igihugu ndetse n’amasengesho ashingiye ku kuri kwa Bibiliya no ku kuzamura umurimo w’Imana muri Afurika y’Iburasirazuba.

Ibi bikorwa bigiye kumara iminsi itatu, bikazitabirwa n’abantu ibihumbi baturutse mu bice bitandukanye bya Uganda no mu bihugu bihana imbibi.

Abari baje kumwakira bavuze ko uru ruzinduko ruje mu gihe igihugu gikeneye ubutumwa bw’umunezero n’ihumure, nyuma y’ibihe bitandukanye by’akarengane, ubukene n’imihangayiko y’abaturage.

Paula White-Cain, uzwiho ubutumwa bwibanda ku gukomeza ukwizera, kugirira impuhwe abandi no kubaho mu mugambi w’Imana, yavuze ko yishimiye cyane kuba muri Uganda, igihugu yise “ubutaka bw’umurage w’Imana n’abantu bafite umutima woroheje wakira ijambo ry’Imana byimbitse.”

“Uganda iri mu gihe cy’impinduka z’umwuka”

Mu ijambo rye ryo kwakira abari bamutegereje, Evangeliste White-Cain yagize ati:
“Ndumva Imana igiye gukora ikintu gikomeye muri Uganda. Iki gihugu gifite umurage ukomeye mu ivugabutumwa, kandi uyu ni umwanya wo kongera guhaguruka nk’itorero rimwe ryubakiye ku kuri kw’Imana.”

Uruzinduko rufatwa nk’imbarutso nshya y’ivugabutumwa mu karere

Abasesenguzi b’amadini bavuga ko uru ruzinduko rushobora gusiga impinduka nziza mu matorero atandukanye mu gihugu, cyane cyane mu: Gukomeza ubunityu bw’abakirisitu; Guteza imbere ibikorwa by’ubumuntu n’impuhwe; Gukangurira urubyiruko kurushaho kwitanga mu murimo w’Imana; Kuzamura ubuyobozi bw’itorero bushingiye ku ndangagaciro za Bibiliya.

Uru ruzinduko ruzakomeza kandi ubufatanye bukomeje gukura hagati y’amatorero ya Afurika n’Amerika, mu rwego rwo gusangira ubunararibonye n’ubutumwa bw’ihumure bugamije guteza imbere amahanga mu buryo bw’umwuka.

Mu gutangiza gahunda z’amasengesho n’ibiganiro bigamije gutegeka no kurema ejo hazaza (“Command the Future”), kuri uyu wa Gatanu, Perezida wa Repubulika ya Uganda, Yoweri Kaguta Museveni, yashimye umurimo ukomeje gukorwa na Pastor Robert Kayanja n’itsinda rye, avuga ko “bari kurema ubutunzi bufite imizi mu mbaraga z’Imana n’imishinga y’iterambere.”

Ibi yabivuze mu gihe Dr. Paula White-Cain wo muri Amerika usanzwe ari umujyanama mu bya roho wa Perezida Donald Trump — yari yitabiriye iki giterane gikomeye cyabereye i Kampala, aherekejwe n’umugabo we ndetse n’abakozi b’Imana barimo Drs. Paul na Becky Enenche na Pastor Moses Emuse.

Icyo giterane cyatangiranye isengesho ryo gufungura (“Opening Prayer”), rikomereza ku butumwa bwo gutegeka ibihe (“At the Command”) no kubaka ejo hazaza hishingiye ku kwizera no ku buyobozi bukura mu Mana (“The Future Conference”).

Perezida Museveni yagaragaye afata ifoto y’urwibutso hamwe na Dr. Paula White, itsinda ry’abakozi b’Imana n’abayobozi batandukanye, agaragaza ko igihugu cyishimira ibikorwa by’iyubakwa ry’imiryango n’iterambere rishingiye ku ndangagaciro z’ivugabutumwa.

Muri iki giterane cya “Command the Future Conference” cyabereye kuri Miracle Centre Cathedral i Rubaga uyu munsi, Pastor Robert Kayanja yashimye Perezida Yoweri Kaguta Museveni ku bw’uruhushya n’ubwisanzure yageneye Abakristo bavutse ubwa kabiri mu rwego rwo gusenga nta nkomyi.

Yagize ati: “Hari igihe twari tuzi ko turi amatorero yubakwaga mu rufunzo, nta cyizere cy’ejo hazaza. Ariko uyu munsi tubashije kubaka za Cathedral zigezweho, bitewe n’amahoro n’ubwisanzure mwaduhaye.”

Pastor Kayanja yanashimangiye ko ubuyobozi butanga umutekano n’ituze ari bwo bwafashije amatorero gufunguka, gukura no kugira uruhare mu iterambere ry’igihugu, haba mu mibereho, mu burezi no mu bikorwa by’ubutabazi bigirira abaturage akamaro.

Iki giterane cyagaragaye nk’igihe cy’ivugurura, ubufatanye, n’ukwerekana uruhare rw’itorero mu kubaka igihugu gifite icyerekezo cyiza nk’uko tubicyesha Channel44 Tv.

Evangeliste Dr. Paula White-Cain ari muri Uganda mu rugendo rw’ivugabutumwa

Perezida Museveni yitabiriye igiterane cyatumiwemo umujyanama wa Trump mu by’umwuka