Mu mateka y’isi, hari abayobozi b’ibihugu bagaragaje ubwitange n’ubuhanga bwo gusana ibihugu byabo byari byarazahajwe n’intambara, ubukene n’amacakubiri. Muri Bibiliya, Nehemiya ni umwe muri abo bayobozi, wasubiye i Yerusalemu agasana inkuta z’umurwa w’Imana warasenywe.

Mu Rwanda, nyuma ya Jenoside yakorewe Abatutsi mu 1994, Perezida Paul Kagame yagaragaje ubushishozi n’ubwitange mu kubaka Igihugu cyari cyarashenywe, agishyira ku murongo w’iterambere, ubumwe n’ubwiyunge.

1. Ubumwe n’Ubudaheranwa

Nyuma ya Jenoside yakorewe Abatutsi, u Rwanda rwari mu icuraburindi ry’amacakubiri n’urwango. Nk’uko Nehemiya yitangiye gusana Yerusalemu, Perezida Kagame yafashe iya mbere mu kwimakaza ubumwe n’ubudaheranwa mu Banyarwanda. Yashyizeho Komisiyo y’Ubumwe n’Ubwiyunge, ashyiraho gahunda zo gusana imitima y’Abanyarwanda, harimo n’ubutabera bwunga binyuze muri Gacaca.

2. Iterambere ry’Ubukungu

Uko Nehemiya yateje imbere Yerusalemu, ni ko Perezida Kagame yashyize imbere iterambere ry’ubukungu bw’u Rwanda. Yatangije gahunda ya Vision 2020, ikurikirwa na Vision 2050, zigamije guteza imbere ubukungu, imibereho myiza n’ikoranabuhanga. U Rwanda rwageze ku musaruro mwinshi mu bukungu, aho ubukene bwagabanutse, kandi serivisi z’ubuzima n’uburezi zateye imbere.(Wikipedia)

3. Imiyoborere myiza n’Uburinganire

Perezida Kagame yashyize imbere imiyoborere ishingiye ku buringanire. U Rwanda ruri mu bihugu bifite umubare munini w’abagore mu nzego zifata ibyemezo, harimo Inteko Ishinga Amategeko. Ibi byatumye u Rwanda ruba icyitegererezo mu guteza imbere uburinganire ku isi.

Nk’uko Nehemiya yagaragaje ubwitange n’ubuyobozi bwiza mu gusana Yerusalemu, Perezida Paul Kagame yagaragaje ubushishozi, ubwitange n’ubuyobozi bufite icyerekezo mu gusana u Rwanda.

Yashyize imbere ubumwe n’ubudaherarwa, iterambere ry’ubukungu, n’imiyoborere myiza ishingiye ku buringanire. U Rwanda rwabaye icyitegererezo ku isi mu kwiyubaka no guteza imbere abaturage barwo.

Ijambo ry’Imana riherekeza iyi nkuru riri muri— Nehemiya 4:6