Bibiliya ni igitabo cy’umurage w’ukwemera cyuzuyemo amahame n’amateka y’ubuzima bw’abantu, aho kenshi hakomoza ku byabaye mbere kugira ngo abantu batibagirwa, ahubwo bigireho.

Hari aho Bibiliya isobanura ko kwibuka ibihe byashize bituma umuntu arushaho kumenya aho yavuye, ibyo yaciyemo, n’icyo agomba gukora ngo ejo hazaza harusheho kuba heza.

Nk’uko Abanyarwanda bibuka Jenoside yakorewe Abatutsi, ni uguhagarara ku kuri, guha icyubahiro abazize Jenoside, no kwiyemeza ko ibyabaye bitazongera kubaho.

Iri ni ihame rihuye neza n’iryigishwa mu byanditswe bya yera, aho kwibuka bifatwa nk’igikorwa cy’ubwenge, cy’urukundo, n’ubutabera.

Hari aho ibyanditswe byera bigaragaza ko Imana ubwayo yibuka isezerano yagiranye n’abantu, bityo abantu na bo bagasabwa kutibagirwa ineza n’ibikorwa by’imbonekarimwe bakogirwe n’abandi cyangwa ibihe bibi banyuzemo byabahaye amasomo akomeye.

Ibi bitwigisha ko kwibuka atari ukubaho mu gahinda, ahubwo ari uburyo bwo kubungabunga amateka, gutanga icyubahiro, no gukomeza inzira y’ubuzima n’icyizere, hamwe no gushimira abatabaye Abatutsi bicwaga.

Kwibuka kandi bifasha mu rugendo rwo gukira ibikomere. Hari aho Bibiliya igaragaza ko umuntu akwiriye gusubiza amaso inyuma, akibuka ibyo yabayemo, kugira ngo azagire umutima woroshye, ubabarira, kandi uharanira amahoro, aho kurangwa n’urwango n’ishyari. Ubu ni bwo buryo bwo kubaho busendereye, buharanira ubumwe n’ubwiyunge, nk’uko u Rwanda na rwo rwabyiyemeje.

Uretse ibyo, kwibuka binubaka umuryango nyawo. Bibiliya igaragaza ko kwibuka amateka y’umuryango bifasha mu guha icyerekezo abana n’abazavuka, kugira ngo na bo bamenye ibikwiriye gukundwa, ibyo bagomba kwirinda, n’icyo basabwa kubaka.

Ni na cyo Abanyarwanda barimo gukora muri ibi bihe byo #Kwibuka31 — kugira ngo Jenoside itazongera ukundi, ahubwo dutange umusanzu mu kubaka u Rwanda ruzira amacakubiri.

Kwibuka ni ishingiro ry’ukuri n’ubutabera. Iyo abantu bibuka ibihe by’akababaro nk’ibi, bashyiraho umurongo uhamye wo kurwanya ikibi, ingengabitekerezo mbi, n’ibikorwa byose byabangamira uburenganzira bwa muntu.

Ni na yo mpamvu mu myemerere ya gikirisitu, kwibuka bifatwa nk’intambwe yo guhesha icyubahiro imibereho, guha agaciro abapfuye no gusigasira amahoro.

Kwibuka Jenoside yakorewe Abatutsi ni igikorwa gifite ishingiro rikomeye — mu mategeko y’igihugu, mu ndangagaciro z’umuco nyarwanda, no mu mahame y’iyobokamana.

Ni igikorwa kigaragaza ubupfura, ubuhamya bw’ubutwari bwo kubaho nyuma y’icuraburindi, ndetse n’urugendo rwo gukomeza gufatanya nk’abavandimwe mu kubaka igihugu cyunze ubumwe.

Imirongo wasoma muri ibi bihe:

1. Kwibuka ibihe bikomeye byabaye, kugira ngo abantu bato bigireho
• Soma muri Yosuwa 4:6–7
Havuga ko hashyizweho ibimenyetso by’amabuye kugira ngo bizabe urwibutso, kandi abazabibona bakabaza ibyabaye, bazabisobanurirwe. Bitwigisha ko amateka agomba kwibukwa, akigishwa, kugira ngo atazibagirana.

2. Kwifatanya n’abababaye no kubarira agaciro
• Soma mu Baroma 12:15
Havuga ko dukwiye kurira hamwe n’abarira. Ibi bitwigisha ko kwibuka ari ugufatanya n’abarokotse Jenoside mu rugendo rwabo rwo gukira, kandi tukababera inkoramutima.

3. Kurwanya urwango n’inzika bikomoka ku kwirengagiza amateka
• Soma mu Migani 10:12
Havuga ko urukundo rupfukirana amakosa, ariko urwango rukazana amakimbirane. Ibi bitwigisha ko kwibuka bifasha kumenya inkomoko y’urwango kugira ngo tururandure, twubake urukundo n’ubumwe.

4. Gukomeza kuzirikana ububabare bw’abantu kugira ngo bitazasubira
• Soma muri Amosi 5:24
Havuga ko ubutabera bukwiye kugera hose nk’amazi, kandi ukuri kukaba nk’umugezi udakama. Ibi bitwereka ko kwibuka bifasha gushimangira ubutabera no kurwanya icyaha cyabayeho nka Jenoside.

Kwibuka Jenoside yakorewe Abatutsi si igikorwa cy’umuco gusa, ahubwo ni n’inshingano y’umutimanama, imyumvire, n’ukwemera. Uburyo Bibiliya ibigaragaza ni uko kwibuka ari igikorwa cy’ubwenge, ubumuntu, kikagaragaza imico y’Imana. Tugomba gukomeza kuvuga ukuri, kurwanya urwango, no guharanira ko amateka atazongera kwisubiramo.

#Kwibuka31