Mu rwego rwo gukomeza umurimo w’Imana mu muziki wa Gospeli, Penuel Choir yo mu itorero rya ADEPR Rukurazo iherutse gusohora indirimbo nshya yise “Dukubita Hasi”. Iyi ndirimbo ifite ubutumwa bwimbitse bushingiye ku Ijambo ry’Imana kandi igamije gukangurira abizera Kristo kwibuka imbaraga bakesha Umwuka Wera mu rugamba rw’umwuka.

Amateka ya Korali Penuel

Chorale Penuel yatangijwe mu mwaka wa 2000 nk’ihuriro ry’abanyeshuri, nyuma igenda ikura iba chorale yitwa Penuel. Iyi korali ikorera umurimo w’Imana mu itorero rya ADEPR, rikorera mu i Remera mu Mujyi wa Kigali, mu Itorero rya Rukurazo. Umuyobozi w’iyi korali ni Komezusenge Samuel.

Icyo Indirimbo “Dukubita Hasi” ivugaho

Indirimbo “Dukubita Hasi” ishingiye ku gitabo cya 2 Abakorinto 10:3-5, ahagira hati:
“Nubwo tugenda dufite umubiri w’umuntu ntiturwana mu buryo bw’abantu, kuko intwaro z’intambara yacu atari iz’abantu, ahubwo imbere y’Imana zigira imbaraga zo gusenya ibihome no kubikubita hasi. Dukubita hasi impaka n’ikintu cyose kishyiriye hejuru kurwanya kumenya Imana, dufata mpiri ibitekerezwa mu mitima byose ngo tubigomōrere Kristo.”

Uyu murongo ni wo washyizeho urufatiro rwa nyuma rw’indirimbo, ikibanda ku butware bw’umwuka no ku ntsinzi iri mu kwizera.

Ubutumwa nyamukuru

Indirimbo ibwira abizera Kristo n’abayumva bose ko itorero rifite imbaraga zo hejuru y’ibindi byose, ziruta n’iz’umwijima n’ibitero by’umwanzi.
• Abizera bakwiriye kumva ko nubwo bafite imibiri y’abantu, batarwana ku rwego rwa muntu, ahubwo barwanisha imbaraga z’ijuru.
• Indirimbo iributsa ko Umwuka bahawe atari uw’ubwoba, ahubwo ari Umwuka w’intsinzi muri Yesu Kristo.

• Iyo umuntu yemera Yesu nk’Umwami n’Umukiza, ahita ahabwa imbaraga zishobora gutsinda ibigeragezo byose n’ibinyoma by’umwanzi Satani.
• Ibi byongera icyizere ku bizera, bibibutsa ko bafite ubutware buri hejuru y’imbaraga zose z’isi n’umwijima.

Inyigisho ku bizera n’abatarizera
• Abizera Kristo bahawe ubutumwa bukomeye bwo kudacika intege, kuko ari abatsinzi iteka ryose.
• Abatarizera Kristo barasabwa gutekereza ku gukira kwabo no kwizera Umwana w’Imana Yesu Kristo kugira ngo babone agakiza n’umunezero bitangwa no kuba abana b’Imana.

Indirimbo “Dukubita Hasi” ya Penuel Choir itanga ubutumwa bukomeye mu bihe by’ubu aho Abakristo bahura n’ibigeragezo byinshi. Iyi ndirimbo ishimangira ko kubaho mu buryo bw’umwuka no kugendana Mana ari byo bizana intsinzi y’ukuri.

Reba indirimbo nshya ya Penuel Choir - Dukubita Hasi kuri YouTube:

Abagize Penuel Choir biyemeje kugeza ubutumwa bwiza ku mpera z’isi binyuze mu ndirimbo