Ihuriro ry’Amatorero y’Abapantekote muri Canada (Association des Églises de la Pentecôte au Canada – ADEPC) ryateguye igiterane gikomeye cy’ivugabutumwa kizahurirana n’umuhango wo kwimika abakozi b’Imana.
Iki giterane kizahuza abavugabutumwa, abaririmbyi n’Abakristo batandukanye mu rwego rwo gusenga Imana no gukomeza umurimo w’ubutumwa bwiza.
Mu bazitabira iki gikorwa harimo abahanzi b’umuziki wo kuramya no guhimbaza Imana Papi Clever na Dorcas, ndetse n’umushyitsi mukuru Rev. Pastor Usabwimana Samuel uzaturuka mu Bubiligi.
Nk’uko bigaragara ku itangazo ryashyizwe ahagaragara na ADEPC, iki gikorwa cyiswe "Conférence d’évangélisation et Ordination des Ouvriers", bisobanura inama y’ivugabutumwa no kwimika abakozi b’Imana.
Igiterane kizabera muri Mosaic Convention Center, iherereye kuri 2465 St. Laurent Blvd, Ottawa, ku wa Gatandatu tariki ya 18 Nyakanga 2026, guhera saa 10:00 kugeza saa 17:00.
Ku rupapuro rw’itangazo hagaragaraho umurongo wo muri Bibiliya wo mu Balewi 6:6, ugira uti: "Umuriro wake ku gicaniro urudaca, ntugasinzire."
Ni uko umuriro wo ku gicaniro ugomba guhora waka, ntuzime. Mu bazafasha muri iki gikorwa harimo: Pst. John Kamanzi, umwe mu bayobozi bagaragara ku itangazo; Papi Clever na Dorcas, bazaririmba indirimbo zo kuramya no guhimbaza Imana; Rév. Pst. Usabwimana Samuel (Belgique), watumiwe nk’umushyitsi uzava mu Bubiligi.
Amafoto ari kuri iri tangazo agaragaza kandi ibikorwa bitandukanye by’itorero, birimo korali, abakozi b’Imana ndetse n’ibikorwa byo guhimbaza no kuramya, bigaragaza ko abazitabira bazagira umwanya wo gusenga, kumva Ijambo ry’Imana no kwifatanya mu ndirimbo.
Abifuza gushyigikira iki gikorwa bashyiriweho uburyo bwo gutanga inkunga binyuze kuri PayPal cyangwa Interac e-Transfer bakoresheje aderesi ya imeyili [email protected].
Ku bazitabira hifashishijwe ikoranabuhanga rya Zoom, hatanzwe: ID de réunion: 551 032 7670, Mot de passe: 924906
Iki giterane cya ADEPC gitegerejwe kuba umwanya ukomeye wo guhura kw’Abakristo mu masengesho, ivugabutumwa no kwimika abakozi b’Imana.
Uretse ubutumwa buzatangwa na Rev. Pastor Usabwimana Samuel uzaba uturutse mu Bubiligi, abazacyitabira bazanahabwa umwanya wo kuramya Imana bifatanyije n’abaririmbyi Papi Clever na Dorcas.
Nk’uko bigaragara ku itangazo ryateguwe n’abateguye iki gikorwa, intego ni ugukomeza umurimo w’Imana no gushishikariza Abakristo gukomeza kuba indahemuka mu rugendo rwabo rwo kwizera.
