Kwigira mu idini ushaka ni icyemezo gikomeye mu buzima bw’umuntu. Mu Rwanda, ADEPR (Association des Églises de Pentecôte au Rwanda) ni rimwe mu matorero akomeye kandi afite abayoboke benshi umuntu atakwicuza ayagiyemo.
Hari abantu benshi bahindura imyemerere yabo bagahitamo gukorera Imana bari muri ADEPR, bakabona impinduka nziza mu buzima bwabo. Guhindura imyemerere si icyemezo cyoroshye.
Gusa, ku bantu benshi bahisemo gukorera Imana bari muri ADEPR, bageze ku rwego rwo kugirana umubano ukomeye n’Imana, umuryango mwiza ushyigikirana mu byo kwizera, n’ubuzima bufite intego.
Dore impamvu 5 zatuma uticuza mu gihe wihisemo kwegera Imana wifatanyije na bo:
1. Ubutumwa Bwiza buhindura ubuzima
ADEPR izwiho kwamamaza ubutumwa bwiza butuma umuntu ahinduka mu mitekerereze no mu myitwarire.
Mu kiganiro na The New Times mu 2021, Rev. Canisius Nzabonimpa, wahoze ari umushumba muri ADEPR, akaba yaratabarutse tariki ya 23 Mutarama 2022, yavuze ko ubutumwa bwa ADEPR bugamije guhindura abantu mu buryo bw’umwuka n’ubuzima busanzwe, bigafasha abayoboke kugera ku ntego zabo z’umwuka no mu mibereho y’akazi n’iy’umuryango.
2. Umuryango w’abantu bafite ukwizera
Kwifatanya n’abayoboke ba ADEPR bituma umuntu abona umuryango w’abantu bafite ukwizera kumwe. Umuyobozi wa ADEPR mu Mujyi wa Kigali, mu wa 2019 yavuze ko abantu bashya binjira mu itorero bahabwa abajyanama n’abavandimwe babayobora mu by’imyizerere yabo, bagafashanya mu bihe bikomeye, kandi bigatuma bakura mu kwizera.
3. Amahirwe yo kwiyungura ubumenyi
ADEPR ifite amashuri, bityo ikaba isoko yo kwiyungura ubumenyi no gufasha abandi. Dr. Marie Claire Uwimana, inzobere mu by’ubuzima ikorera mu Rwanda, mu wa 2023, ku rubuga rwa Kigali Today, yahavugiye ko ibikorwa by’itorero birimo amashuri byafashije abanyamuryango kwiga no kwigisha abandi, bityo bakunguka ubumenyi n’ubunararibonye.
4. Kubera abandi urugero rwiza
Abayoboke ba ADEPR bagira uruhare mu muryango no mu Gihugu, bakerekana ko uburyo bwiza bwo gukorera Imana budatana no gufasha abandi.
Mu kiganiro n’ikinyamakuru InyaRwanda mu 2022, abayobozi ba ADEPR bavuze ko abanyamuryango bakora ibikorwa by’ubutabazi, bigatuma babera abandi urugero rwiza, haba ku muryango, mu baturanyi n’Igihugu muri rusange.
Ibikorwa byabo biba byiganjemo gufasha abaturage babarihira ubwisungane mu kwivuza, kubafasha mu kubona ibiribwa n’ahandi.
5. Guhuza inyigisho n’Ijambo ry’Imana
ADEPR ikomoka ku bamisioneri bo muri Suwede, kandi inyigisho zayo zishingiye ku Byanditswe Byera n’ubutumwa bwa Pentekote.
Nyakwigendera Rev. Canisius Nzabonimpa muri 2012 yabwiye Flickr.com ko inyigisho za ADEPR zishingiye ku nyandiko zera n’ubutumwa bwa Pentekote, bikaba umurongo wizewe wo gukura mu buryo bw’umwuka no kugera ku buzima bwuzuye.
Ingero zifatika ku byabaye:
Mahirwe Danny ni umukristo wo muri ADEPR Kinamba, atuye i Gasange, akaba umwe mu bahawe ubufasha n’itorero mu gikorwa cyo ku wa 26 Nyakanga 2025, akibihabwa yabwiye Paradise ati: “Twafashe ibyo kurya, turashimira Imana. Njye nta kazi nagiraga, mfite umuryango w’abantu 7, harimo abana 6 na madamu. Ubu bararya neza. Kandi nanishyuriwe mituweli.”
Uyu mugabo yerekanye uburyo ibikorwa by’itorero byamufashije, atari mu byo guhabwa ibiribwa gusa, ahubwo no kugira ubushobozi bwo kubona ubwisungane mu kwivuza, bikaba bizafasha umuryango we mu buzima bwa buri munsi.
Undi ni Uwayezu Maria, umukristokazi wo mu Itorero rya ADEPR Kinamba, umubyeyi w’abana babiri ubarera wenyine, atuye i Kagugu, mu Murenge wa Kinyinya.
Yagize ati:
“Nabayeho ndi imfubyi. Sinagiraga unyitaho, ariko Itorero rya ADEPR ryanyitayeho kuva nakira agakiza ku myaka 13. Mbikuye ku mutima, ndashimira Umwami Yesu wabakoresheje.”
Aya magambo agaragaza neza ko ADEPR itita gusa ku by’umwuka, ahubwo ko inafasha abayoboke n’imiryango yabo mu mibereho ya buri munsi.
Ku wa 26 Nyakanga 2025, ADEPR Kinamba yakoze igikorwa cyo gufasha imiryango 34 kubona ibiribwa, harimo umuceri na kawunga by’ibiro 25 kuri buri muryango, amavuta yo guteka, hamwe na sositomate.
Bafashije kandi abantu barenga 300 kubona mituweli y’ubwisungane mu kwivuza, harimo abanyamuryango b’itorero, abaturanyi, n’Abakristo bo mu Itorero rya ADEPR Kabagari.
Mukundirehe Sylvan, Umuyobozi w’Umudugudu wa Rwibutso, yavuze ko iki gikorwa cyagize agaciro gakomeye mu mibereho y’abaturage, kuko gufasha abatishoboye kubona mituweli bigabanya imfu zituruka ku kutabona ubuvuzi mu gihe cy’ibibazo by’ubuzima.
Igikorwa cyose cyatanzweho amafaranga arenga 3,660,000 FRW, harimo ibiribwa, mituweli, n’ubundi bufasha. Abayoboke basanze ari igikorwa cy’ingenzi mu guhuza ubutumwa bwiza n’ibikorwa bifatika byo gufasha abandi mu mibereho yabo ya buri munsi.
Si ibi gusa bakora, kuko bubakira abakene, bagasura abarwayi mu bitaro, kandi byose bakabikorana n’ivugabutumwa. N’ubwo kwigisha ubutumwa bwiza bwa Yesu Kristo ari byo bashyira imbere, bibuka ko roho nzima itura mu mubiri muzima.
Abagize ADEPR bihatira kwera imbuto nziza, basoma Bibiliya, kandi bakaba intangarugero muri rubanda. Ikibazo gihurirwaho na bose bo mu madini n’amatorero yose, ni ukudatungana gusa, ariko baharanira gukora ibikiranuka.
Guhindura imyemerere ukizerera muri ADEPR si icyemezo cyo kwicuza. Ahubwo ni urugendo rwo gukura mu kwizera, kubona umuryango ushyigikira ukwizera, guhindura imibereho yawe no gufasha abandi.
Abantu benshi bamaze kugerageza iyi nzira bagahindura itorero, cyangwa bakaritangiriramo, bemeza ko ibyiza babonye birenze ibyo bari biteze.
