Umuvugizi w’Urwego rw’Igihugu rw’Ubugenzacyaha yatangaje ko Nzizera yatawe muri yombi tariki 5 Kamena 2024 akurikiranweho ibyaha birimo gukoresha inyandiko itavugisha ukuri no kwihesha ikintu cy’undi hakoreshejwe uburiganya.

Ibyaha Nzizera Aimable akurikiranweho bifitanye isano n’imitangire y’amasoko ya sosiyete yitwa Amarebe Investiment Ltd akaba yarabikoze mu Ukwakira 2023.

Nzizera akurikiranweho ibyaha birimo guhimba, guhindura inyandiko cyangwa gukoresha inyandiko mpimbano, icyaha giteganwa n’ingingo ya 276 y’Itegeko nimero 68/2018 ryo kuwa 30 Kanama 2018 riteganya ibyaha n’ibihano muri rusange.

Uhamijwe n’Urukiko iki cyaha ahanishwa igifungo kitari munsi y’imyaka itanu ariko kitarenze imyaka irindwi n’ihazabu itari munsi ya miliyoni 3 Frw ariko atarenze miliyoni 5 Frw cyangwa kimwe gusa muri ibyo bihano.

Nzizera ariko kandi akurikiranweho icyaha cyo kwihesha ikintu cy’undi hakoreshejwe uburiganya gihanwa n’ingingo ya 174 y’itegeko nimero 68/2018 ryo ku wa 30 Kanama 2018 riteganya ibyaha n’ibihano muri rusange.

Uhamijwe n’Urukiko iki cyaha ahanishwa igifungo kitari munsi y’imyaka ibiri ariko kitarenze imyaka itatu n’ihazabu itari munsi ya miliyoni 3 Frw ariko itarenze miliyoni 5 Frw.

Dr Murangira yavuze ko bibutsa Abaturarwanda kwirinda ibyaha ibyo ari byo byose. Ati “Ukora ibyaha wese akoresha amayeri yose akeka ko atazatahurwa aribeshya. Urwego rw’Ubugenzacyaha RIB, Abagenzacyaha bafite ubushake, ubumenyi, ubushobozi ndetse n’ubufatanye n’abaturage bwo gutahura no kugenza ibyaha ababikora bakeka ko bitazamenyeka. Inama twabagira ni iyo guca ukubiri n’icyaha naho ubundi bazafatwa bashyikirizwe Ubutabera.”

Iri rushanwa ryatangiriye i Rusizi mu ntangiriro za Werurwe 2024, rimaze iminsi rihagaze mu buryo bwatunguranye cyane ko ku wa 18 Gicurasi 2024 ari bwo ibikorwa byo gushakisha abanyempano mu turere dutandukanye byagombaga kurangirira mu Mujyi wa Kigali.

Byari byitezwe ko abanyempano bagombaga gutoranywa muri buri Karere bagombaga guhurizwa mu cyiciro cya ’Pre- Selection’ hagatoranywamo 10 bagombaga guhita binjira mu mwiherero.

Byari byatangajwe ko uwa mbere azahembwa miliyoni 3 Frw akanongerwa amasezerano y’umwaka afashwa mu bijyanye n’umuziki, uwa kabiri agahabwa miliyoni 2 Frw mu gihe uwa gatatu we azahabwa miliyoni 1 Frw.

Ni ku nshuro ya kabiri iri rushanwa ryari rigiye kuba kuko ryatangiye mu 2022 rihuriramo abahanzi banyuranye barimo Israel Mbonyi waryegukanye agahabwa miliyoni 7 Frw, Aline Gahongayire wabaye uwa kabiri ahabwa miliyoni 2 Frw, Gisubizo Ministries yabaye iya gatatu ihabwa miliyoni 1 Frw na Rasta Jay wahawe ibihumbi 500 Frw nk’Umuhanzi uri kuzamuka neza.

Ku nshuro ya kabiri, iri rushanwa ryari ryahinduye umuvuno kuko ryavuye mu byamamare ahubwo rijya mu gufasha abanyempano bakiri bato ribasanze aho batuye. Bamaze kuzenguruka Intara zose bashakisha abanyempano bashya, hari hatahiwe i Kigali.

Nzizera Aimable (uwa 3 uhereye iburyo) ubwo yashyikirizaga Israel Mbonyi igihembo yegukanye ahize abandi bose

Src: IGIHE