Ni amateka! Mu ntangiriro za Mutarama ya 2024 Abasangiza b’umwanya (dore ko amagambo ari ay’abagombozi) bakomeje kwicinya icyara. Buri wese mu barobanuwe (dore ko hari n’abatoranyijwe ndetse n’abihamagaye) yasengaga Imana ngo imuyobore inzira yo kuzayobora igitaramo cy’amateka cyiswe "Ewangelia Easter Celebration Concert".

Ibi byajyanaga no kwibaza umwifato yakwifata ndetse n’iduka ryamwambika mu gihe ubufindo bwamugwaho nk’uko bwaguye kuri Yohani umubatiza akajya mu rusengero rw’Uwiteka kosa imibavu (Luka 1:9).

Ni igitaramo giteganyijwe kuwa 31 Werurwe 2024 kikazabera mu nyubako ya BK ARENA kikaba gikomeje kuba isoko y’amakuru dore ko kuba ukomeye muri iki gisata utarakivugaho ufatwa nk’umugenzi wo ha mbere wajyaga mu ishyamba ry’inzitane atitwaje inkoni.

Iki gitaramo cyo kwizihiza Pasika cyateguwe n’Umuryango wa Bibilia mu Rwanda (BSR) hagamijwegukomeza gushyigikira ubukangurambaga bwiswe "Shyigikira Bibilia" mu kongera umubare wa Bibliya no kugabanya igiciro cyayo cyatumagiye cyane.

Impamvu nyamukuru yo gusigasira iki gitabo gitagatifu byaturutse ku kudohoka kwa benshi mu bashoragamo amafaranga kuri ubu batagikozwa umumaro w’ibyanditswe byera.

Bitewe n’uko kubura kwa Bibilia kwagira ingaruka ku madini ndetse n’amatorero atandukanye, iki gitaramo cyatumiwemo abahanzi ndetse n’amakorali baturuka mu madini menshi.

Iki gitaramo karundura cyatumiwemo James & Daniella, Christus Regnat, Alarm Ministries, Shalom Choir, Jehovah Jireh Choir. Kuri uru rutonde hiyongereyeho Israel Mbonyi uherutse kuzuza umubare w’abantu miriyoni bamukurikira kuri youtube (Subscribers).

Benshi mu bakunzi ba Gospel bahise bibaza niba Inyubako ya BK arena itazaba ntoya hakaba n’abatangiye kubaza impamvu iki gitaramo kitakabaye kibera muri Kigali Pele Stadium dore ko stade Amahoro irimo gusanwa no kongererwa ubushobozi. Benshi bakaba bakomeje guhwihwisa ko amatike ashobora gushira imburagihe.

Dore impamvu 5 Zigenderwaho zigaragaza ko amatike azashira imburagihe:

1.Ibitaramo 2 biheruka, Israel Mbonyi yujuje BK Arena: Israel Mbonyi ufatwa nk’ifarasi yiruka kurenza izindi mu muziki wa Gospel amaze gukorera ibitaramo 2 mu nyubako ya BK ARENA mu bitaramo bya Noheli bisoza umwaka. Mu gitaramo "Icyambu ive concert’’ cyasoje umwaka wa 2023 amatike yashize habura icyumweru ngo igitaramo kibe.

2.Kuba haratumiwe korali 4 zifite ibigwi n’ibirindiro muri Gospel: Ewangelia Easter Celebration izasusurutswa na Jehovah Jireh Choir, Christus Regnat, Shalom Choir ndetse n’itsinda rya Alarm Ministries. Guhuriza ku ruhimbi iyi mitwe y’abaririmbyi ni igikorwa benshi bafashe nk’ubushotoranyi bitewe n’ibigwi n’ibirindiro bya buri korali ndetse n’igikundiro.

3.Ni igitaramo kidashingiye ku idini, Intego ni ugushyigikira Bibilia: Hari ibitaramo byinshi bijya bitegurwa mu mboni z’idini runaka. Siko bimeze muri iki gitaramo dore ko abantu batandukanye babona iki gitaramo mu mboni z’ishyaka ry’umurimo w’Imana.

Kuba Bibilia isomwa n’abantu baturuka mu madini n’amatorero atandukanye bihuye n’intego y’iki gitaramo. Bivuze ko abantu ibihumbi n’ibihumbagiza bemera bibilia bategereje iki gitaramo.

4.Imitegurire yo mu rwego rwo hejuru: Umuryango wa Bibilia mu Rwanda (BSR) wakoresheje imbaraga nyinshi mu bukangurambaga bugamije gushyigikira Bibilia. Mu gusoza iki gikorwa hateguwe iki gitaramo kimwe mu byavuzwe bikomeye mu itangazamakuru.

5. Ibyamamare mu ngeri zose byambariye kwitabira iki gitaramo: Ibyamamare birimo abaramyi, abanyamakuru, abakina filimi n’abandi bakomeje kugaragaza ko bahangayikishijwe n’umwuma wo mu buryo bw’umwuka watera isi igihe Bibilia yaba ibaye ingume nk’intwar zo kurwanisha ku ngoma ya Sawuli.

Kuri ubu bamwe mu bakunzi ba Gospel batangiye guhwihwisa ko amatike yo kwinjira muri iki gitaramo yaba yarashize. Ibi byatumye Paradise.rw yegera Bwana Peace Nicodeme Nzahoyankuye umwe mu bari gutegura iki gitaramo aho yahumurije abibwiraga ko amatike yashize.

Nicodeme yavuze ko amatike atarashira gusa yongeraho ko bitazorohera ba bantu bateganya kugura amatike ku munsi w’igitaramo bitewe n’uko abashaka kwitabira iki gitaramo bakomeje kwiyongera.

Ntibisaba kugurisha akarima k’igikoni kugira ngo witabire iki gitaramo dore ko ku bihumbi bitanu (5,000 Frw) ubona tiket ikwemerera kuzicara ahasanzwe. Ni mu gihe mu myanya y’imbere wakwishyura ibihumbi icumi (10,000 Frw) ukicara ahisumbuye.

Ni uburyohe ku bantu biyumvamo ko batagikoresha Tap&Go kuko Imana yasohoje isezerano bakaba bemerewe kwicara muri VIP ku mafaranga 15,000 Frw. Ntawakwibagirwa abandi bantu batwara za modoka zitabonerana dore ko ku 20,000 Frw uziyicarira muri VVIP Ugacinya akadiho na Christus Choir mu gihe ba bandi bateye ishoti Dayimoni w’ubugugu bemerewe kwicara ku meza yabugenewe bakicara ari abantu 6 ku 200,000 yonyine.

Abifuza kugura amatike y’iki gitaramo bayagura hifashishijwe urubuga rwa WWW.TICKET.RW. Ushobora no kubona itike hatifashishijwe ikoranabuhanga dore ko amatike acururizwa ahantu hatandukanye mu mujyi wa Kigali nka Camelia-CHIC, Camelia-Makuza Peace Plaza,Camelia-Kisimenti, La Gardienne (Kiyovu);

Uncle’s Resto (Kicukiro), Sainte Famille Parish, Regina Pacis, Omega Church (Kagugu), Bethesda Holy Church, Four Square Gospel Church, Restoration Center (Masoro), Zion Tample (Gatenga), New Life Bible church (Kicukiro) na Eglise Vivante (Rebero). Ku bindi bisobanuro wahamagara 0788304142,07888809901 na 0787837802.

Israel Mbonyi mu bazaririmba mu gitaramo karundura cya Pasika

Israel Mbonyi ategerejwe muri BK Arena mu gitaramo cya Pasika