Indirimbo Buri Gihe ya Ange Nicole yagiye hanze kuri uyu wa 24 Gicurasi 2024, ikaba ari imwe mu ndirimbo zikomeje kwakirwa neza mu bantu bakunda indirimbo zo kuramya no guhimbaza Imana, ukurikije ibitekerezo bari kuyitangaho. Abenshi bahuriye ku kumushimira ku bw’indirimbo nziza no kumwifuriza umugisha uva ku Mana.

Mu kiganira yagiranye na Paradise, Ange Nicole yatangaje impamvu indirimbo ye ya kabiri yayise Buri Gihe. Yagize ati: “Buri Mukristo cyangwa buri muntu wese, akwiriye kujya ashimira Imana buri gihe, buri munota, kubera ko ibintu Imana iba yaradukoreye ari byinshi. Numvaga umuntu agomba gushimira Imana buri gihe.”

Indirimbo ya mbere Ange Nicole yashyize hanze ni iyitwa Ishobora Byose yasohotse mu mwaka ushize wa 2023, ari na wo yatangiriyemo gukora indirimbo ku giti cye. Yagize ati: “Hashize umwaka ntangiye gukora indirimbo zange bwite, ariko hari izindi nakoranye n’abandi mbere ndetse n’izi nsubiramo.”

Nk’uko abivuga, umuziki wo kuramya no guhimbaza Imana ni ibintu bimurimo, dore ko yatangiye kuririmba akiri umwana, muri Korari y’Abana yo ku Cyumweru (Sunday School, Ecole de Dimanche). Mu magambo ye abivuga agira ati: “Nakuze ndirimba muri Korari z’Abana, rero nakuze mbikunda, noneho nkura ndirimbana n’abandi baririmbyi bakuru, ndushaho kubikunda. Nakuze numva mbikunze, bindimo.”

Ku muyoboro we wa YouTube ‘Ange Nicole Official’ hariho izindi ndirimbo nyinshi z’abandi bahanzi yagiye asubiramo, mu rwego rwo gukomeza kuba hafi abakunzi b’indirimbo zihimbaza Imana. Abisobanura agira ati: “Hariho indirimbo nyinshi, hariho cover n’izisanzwe zo mu Gitabo.”

Niba nawe ukunda indirimbo zo kuramya no guhimbaza Imana, Ange Nicole uzamukunda kuko nta gahunda yo gutenguha abafana afite. Yagize ati: “Nge sinjya ndambira abantu, ni yo mpamvu njya ncishamo nkaririmba na ziriya zo guhimbaza Imana zo mu Gitabo cyangwa ngakora cover (kuzisubiramo).”

Nk’uko yakomeje abivuga, iyi ndirimbo Buri Gihe ikomeje gukundwa n’abatari bake si yo yanyuma ashyize hanze, ahubwo ateganya no kuzashyira izindi hanze, harimo no gukora ibitaramo Imana nimushoboza, nk’uko yabivuze agira ati: “Hari izindi ndirimbo ndi gutegura gusohora, kandi nteganya n’igitaramo. Ninsohora indi ndirimbo iri gutunganywa, ni bwo ntekereza ko natangira gukora ibitaramo.” Gusa byose aracyabitegura.

Yasoje asaba abamukurikira kurushaho kumushyigikira binyuze mu masengesho, cyane ko na Bibiliya idusaba gusenga dusabira abandi. Uwizeye Ange Nicole ni Umukristo mu Itorero rya Bethammi Fellowship Church, riherereye mu Mujyi wa Kigali

Gukorera Imana bimurimo, kandi ntajya atenguha abakunda indirimbo ziramya Imana na rimwe