Elino yifashishije amagambo atangaje akubiyemo ukwizera kudacogora, agaragaza ko nta kindi cyiza uretse kuba Yesu ari we mbaraga z’ubuzima bwe.

"Habwa icyubahiro Yesu" – Isengesho rihamye riri mu ndirimbo
Indirimbo itangira ivuga amagambo aha Yesu Kristo icyubahiro:
"Habwa icyubahiro Yesu, none n’ibihe bidashira uri uwo gushimirwa."

Iyi ni intero y’umutima wa buri Mukristo wizeye ko Yesu ari we wenyine ukwiye ishimwe ryose. Binyuze mu mirimo ye itangaje, yatanze amahoro, ubuntu n’ubugingo buhoraho.

Elino akomeza agira ati: "Amahoro ndirimba n’ubuntu butangaje, nabihawe umunsi menya Kristo."

Aya magambo agaragaza ihinduka rikomeye mu buzima bw’umuntu iyo amenyanye na Kristo. Muri Yesu, habamo amahoro aruta ayo isi itanga, habamo ubuntu butangaje butuma umuntu atakibara ibyahise ahubwo akemera guhangwa bushya n’Imana.

"Kuva namumenya, ntiyigeze ampemukira" – Kwizera kudashidikanywaho
Hari igihe abantu bahura n’ibibazo bikomeye bagatangira gushidikanya niba Imana ibari hafi. Nyamara, Elino ahamya adashidikanya ko Yesu atigeze amutererana.

Ati: "Kuva namumenya, ntiyigeze ampemukira. Ibyo mbivuze naba mbeshye."

Uyu murongo ni ubuhamya bukomeye bw’uko Yesu ahora ari indahemuka ku bamwiringiye. Yibutsa ko uko byagenda kose, mu byiza no mu bikomeye, Yesu ahorana n’abamwiringira, atabatererana habe na rimwe.

Elino akomeza avuga ko igihe cyose Yesu yamubereye umurinzi n’inshuti nyakuri: "Mvuze ko Yesu yantereranye naba mbaye nk’abandi bose."

Aya magambo agaragaza ukwizera kudakuka, no kwemera ko Yesu adatererana abe nk’uko bamwe bashobora gutekereza. Benshi bakunze kubona ingorane bakavuga ko Imana yabibagiwe, ariko iyi ndirimbo ishimangira ko Yesu ahora ariho kandi yita ku be.

"Nari umwana w’ikirara, ibyo sinabihakana" – Impuhwe z’Imana zihindura ubuzima

Nk’uko Bibiliya ibivuga mu Luka 15:11-32 mu mugani w’umwana w’ikirara, Elino na we yemeza ko yigeze kuba mu buzima bumeze nk’ubw’ikirara.

Ati: "Nyamara urebye ku mateka, nari uwo kugirirwa umujinya. Nari umwana w’ikirara, ibyo sinabihakana."

Aha ni ho ubutumwa bwiza bugaragarira neza, kuko Bibiliya yerekana ko Imana idashaka ko hagira n’umwe urimbuka, ahubwo ishaka ko bose bamenya ukuri bakihana (2 Petero 3:9).

Binyuze mu rukundo rwayo rutagereranywa, Imana yahinduye ubuzima bwa Elino, nk’uko yakiriye umwana w’ikirara mu mugani wa Yesu. "Ankuruza umurunga w’urukundo, angira ishyanga rikomeye cyane."

Iyi ni impano y’Imana ku muntu wese wemera kwakira agakiza. Imana ifite ubushobozi bwo gukura umuntu mu buzima bubi, ikamuha icyubahiro n’agaciro nk’umwana wayo.

"N’iyo napfa, ibyiringiro byange ni Yesu" – Isezerano ry’iteka
Umurongo w’ingenzi w’iyi ndirimbo ni uwo kwiringira Yesu n’iyo byaba bikomeye:
"Nisunze Umukiza ukomeye, nyuzwe n’ubucuti bwo mu ijuru. N’iyo napfa, ibyiringiro byange ni Yesu."

Aha ni ho ubutumwa bukomeye bw’iyi ndirimbo buherereye. Nubwo abantu bose bazasiga isi, Umukristo afite ibyiringiro bihamye by’ubugingo buhoraho muri Kristo. Iri ni isezerano rirenze, kuko abizeye Yesu batapfa ngo barimbuke, ahubwo babeshwaho no kubana na we mu bwami bw’Imana.

Mu Abaroma 8:38-39, Pawulo yavuze yuko urupfu cyangwa ubuzima, cyangwa abamarayika, cyangwa ibiriho, cyangwa ibizaza, cyangwa iby’ubushobozi, cyangwa uburebure, cyangwa ubujyakuzimu, cyangwa ikindi kiremwa cyose, bidashobora kudutandukanya n’urukundo rw’Imana ruri muri Kristo Yesu Umwami wacu.

Elino yashyize ahagaragara ubutumwa bw’ihumure, yibutsa abantu ko ibyiringiro byacu bidashingiye ku by’isi, ahubwo bishingiye kuri Yesu, waducunguye adakoresheje ifeza cyangwa izahabu, ahubwo aducungura n’amaraso ye y’igiciro cyinshi.

Mu gihe uraba uyumva uzirikane ibi:
Indirimbo "N’iyo Napfa" ni impano ikomeye Elino yahaye abakunzi b’umuziki wa Gospel. Yibutsa buri wese ko ibyiringiro by’ukuri biri muri Kristo, ko n’iyo isi n’abantu batakwemera, Yesu we ahora ariho, akaba umurinzi w’ubugingo bwacu.

Nuyumva, uributswa ko uko byagenda kose, ukwiye kwizera Imana, kuko ari yo soko y’amahoro n’ubugingo buhoraho. Ni indirimbo ihumuriza, ikagaragaza uko Imana ikunda abayizera, ikanabibutsa ko n’iyo iby’isi byashira, Yesu ahora ari ibyiringiro byacu.

Kuri ubu, iyi ndirimbo iboneka ku muyoboro wa YouTube wa Elino n’ahandi hacururizwa umuziki wa Gospel. Abakunzi b’iyi ndirimbo bayakiranye ibyishimo, bayishimira ubutumwa bwayo bukomeye bwo kwizera no kwiringira Imana.

"N’iyo napfa, ibyiringiro byange ni Yesu!"
Niba ubuhamya fatanya na Elino kuramya

Wowe ni iki cyagushimishije muri iyi ndirimbo?

Aba bose bari mu mashusho y’indirimbo