"Dushimiye Imana iduhaye umwepiskopi mushya wa Diyosezi ya Kibungo, Nyiricyubahiro Musenyeri JMV Twagirayezu. Tumwifurije ubutumwa bwiza" Ni ubutumwa Antoine Karidinali Kambanda yanditse kuri Twitter kuri uyu wa Gatandatu.

Kuri uyu wa Gatandatu tariki 01 Mata 2023, muri Diosezi ya Kibungo habereye ibirori byo guha inkoni y’ubushumba Musenyeri Jean Marie Vianney Twagirayezu uherutse kugirwa na Papa Fransisiko umwepisikopi wa Diyosezi Gatorika ya Kibungo.

Myr Alixis Habiyambere, umwepiskopi wa Nyundo uri mu Kiruhuko na Myr Tadeyo Ntihinyurwa Arikiyepiskopi wa Kigali uri mu Kiruhuko na Myr Smaragde Mbonyintege umwepiskopi wa Kabgayi bitabiriye ibirori by’itangwa ry’ubwepiskopi muri Diyosezi ya Kibungo.

Umwepiskopi wacyuye igihe wa Diyosezi ya Goma, muri Repubulika Iharanira Demokarasi ya Kongo,Myr Faustin Ngabu, hamwe n’abasaseridoti baturutse muri iyi diyosezi bitabiriye umuhango wo kwimika umwepiskopi mushya wa Kibungo.

Myr Jean Marie Vianney Twagirayezu amaze guhabwa inkoni y’ubushumba yatambagiye mu bakristu abaha umugisha nk’uko tubicyesha Kinyamatek, ikinyamakuru cyandika cy’Inama y’Abepiskopi Gatolika mu Rwanda.

Ni ibirori byabereye mu karere ka Ngoma, bikaba byabanjirijwe n’umutambagiro w’abihaye Imana, imbaga y’abakirisitu n’abayobozi banyuranye, ikomereza ku gitambo cya misa cyatuwe na Antoine Karidinali Kambanda, arikepisikopi wa Kigali akaba yari anasanzwe ari umuyobozi wa Diosezi ya Kibungo.

Myr Anaclet Mwumvaneza, Umwepiskopi wa Nyundo yashyikirije Myr Jean Marie Vianney Twagirayezu impano zitandukanye yagenewe na Diyosezi ya Nyundo avukamo. Avuga kandi ko Nyundo yishimiye kwitura Kibungo yayihaye umwepiskopi wayo wa mbere ari we Myr Aloys Bigirumwami.

Muri ibi birori hagaragayemo gusomera imbaga y’abakirisitu ibaruwa ya Papa igira Musenyeri Jean Marie Vianney Twagirayezu umushumba wa Diyosezi ya Kibungo, kumusiga amavuta y’umugisha, kumuha ingofero n’inkoni by’ubushumba no kumusabira imigisha.

Ni umuhango kandi witabiriwe na Minisitiri w’Ubutegetsi bw’Igihugu, Jean Claude Musabyimana.

Musenyeri Jean Marie Vianney Twagirayezu wahawe inkoni y’ubushumba, yavutse ku ya 21 Nyakanga 1960, avukira mu Karere ka Rutsiro, akaba yari umunyamabanga mukuru w’umuryango Caritas-Rwanda.

Mu ijambo rye yijeje abakirisitu ba Diosezi ya Kibungo ubufatanye mu guteza imbere imibereho myiza n’imibanire myiza. Amaze kwimikwa nk’umwepiskopi wa Kibungo abayobozi n’abo mu muryango bateguwe bamugaragarije ibyishimo.

Tariki ya 20 Gashyantare 2023 ni bwo Nyirubutungane Papa Fransisco yamutoreye kuba Umwepisikopi bwite wa Diyosezi ya Kibungo. Diyosezi Gatorika ya Kibungo ni imwe muri diyosezi gatorika 9.

Igizwe n’amaparuwasi 20 akorera mu turere twa Ngoma, Kirehe, Kayonza, igice kinini cya Rwamagana n’agace gato ka Gatsibo nk’uko bitangazwa na RBA. Yashinzwe mu mwaka w’1968.

Abasaseridoti ba Diyosezi bayobotse umwepiskopi bahawe aho yari atetse mu ntebe y’ubuyobozi bw’iyi diyosezi.

Minisitiri w’Ubutegetsi bw’Igihugu, Jean Claude Musabyimana, ni we uhagarariye Leta y’u Rwanda mu muhango wo kwimika umwepiskopi mushya wa Kibungo.

Amaze kwimikwa nk’umwepiskopi wa Kibungo abayobozi n’abo mu muryango bateguwe bamugaragarije ibyishimo