Umuramyi Christophe Ndayishimiye ufata Appolonaire nk’indorerwamo yireberamo yateguye igitaramo cy’akataraboneka cyiswe "Aca inzira" giteganyijwe kuwa 18 Gashyantare 2024.

Byakugora kubona ikindi gitaramo muri uku kwezi kwa Gashyantare dore ko usanga ibitaramo byinshi bishyirwa mu mpeshyi hamwe usanga byanahuriranye ugasanga hari n’ibyabuze ababyitabira, abahanzi bakajya batera bakaniyikiriza!!

Christophe Ndayishimiye we aganira na Paradise.rw yabajijwe icyatumye igitaramo cye gishyirwa mu kwezi kwa Gashyantare kurangwamo imvura nyinshi, asubiza ko we yarategereje "Go Ahead y’Imana" ndetse akaba yizeza abakunzi be ko uwo munsi nta mvura izagwa kandi abizeza ko umunsi w’igitaramo yizera ko uzarangwa n’ibyiza bateguriwe n’Ijuru.

Avuga ku byamamare bizitabira igitaramo cye, yavuze ko Prosper Nkomezi ari inshuti ye yo mu bwana dore ko banakoranye indirimbo yitwa "Uri Uwera" ikaba izanakorwa live ku munsi w’igitaramo.

Avuga kuri Jean Christian Irimbere, yavuze ko amufata nk’umuvandimwe we dore ko hari n’abazi ko bombi bavukana mu nda imwe bitewe n’Imishinga ya Gospel bakorana umunsi ku munsi. Yongeyeho ko akunze kuganira cyane na Bosco Nshuti ku ijambo ry’Imana.

Avuga ku mvano y’izina "Aca inzira", yagize ati: "Imvano y’iri zina, ni indirimbo yanjye yitwa "Aca inzira". Yagize ati: "Aca inzira ni indirimbo nahimbye biturutse ku ndirimbo Imana yampaye".

"Nari mu kibazo gikomeye mbona imbere yanjye nta gisubizo na mba mbona imbere yanjye, ni ikibazo nabonaga cyendaga kunyica, Imana imbera igisubizo, ndi muri iki kibazo Imana irambwira iti: "Nsha inzira ahatari inzira"! Niho izina rya "aca inzira ryavuye"!

Christophe wakuriye mu rusengero rwa Eglise Vivante, yatangarije Paradise.rw ko muri iki gitaramo hari impano itari amagambo azaha buri muntu wese uzitabira iki gitaramo.

Yasoje iki kiganiro asaba abakunzi ba Gospel kuzaza kwifatanya nawe muri iki gitaramo kizabera mu rusengero rwa "New life Bible Church" ruzwiho kumurikirwamo impano z’akataraboneka dore ko arirwo abaramyi Bosco Nshuti uzanaririmba muri iki gitaramo na Papi Clever usigaye afatanya umuziki na Dorcas, bamurikiwemo mu gitaramo cyabaye kuwa tariki 11 Ukuboza 2016.

Iki gitaramo cyizihirijwemo Isabukuru y’amavuko y’umuhanzi Dominic Ashimwe wuzuzaga imyaka 31. Benshi batunguwe no kubona aba baramyi Papi Clever na Bosco Nshuti bafataga nk’abagitangira aribo bitabajwe na Dominic Ashimwe!!! Dominic Ashimwe yubahwe!.

Ubwo bageraga kuri stage, benshi bashobora kuba barahise basaba Imana imbabazi mu mitima yabo ku bwo kwibeshya ku ndobanure zayo dore ko icyo gihe baririmbye abari aho bakuzura umwuka wera bagahaguruka bagakoma urufaya rw’amashyi, kandi uyu munsi tuvugana aba baramyi bakaba barafashe imitima ya benshi mpiri bakaba bari mu bakunzwe mu Rwanda no mu gace u Rwanda rubarizwamo.

Ni nako udakwiriye gushidikanya ku gitaramo cya Christophe Ndayishimiye kigiye kubera aho aba baramyi tuvuze haruguru bamurikiwe. Amatike yo kwinjira cya Christophe Ndayishimiye aboneka ahantu hatandukanye harimo i Nyarugenge (Camellia Chic), Camellia Gisimenti ndetse n’ahandi.

Ntukwiriye kubura mu gitaramo cya Christophe Ndayishimiye