Polisi y’u Rwanda yatangaje ko ku bufatanye n’inzego z’ibanze hamwe n’abaturage, yafashe abantu batanu bo mu Karere ka Muhanga, bakurikiranyweho kwambura abaturage amafaranga bakoresheje amayeri yo kubizeza imfashanyo no kubavura indwara n’amarozi.
Polisi yatangaje ko, abantu batanu barimo abagabo batatu n’abagore babiri, bafite hagati y’imyaka 36 na 53 y’amavuko, bafatiwe mu mudugudu wa Nyarucyamo, akagari ka Gahogo, mu murenge wa Nyamabuye, mu gitondo cyo ku wa Kane tariki 23 Mutarama 2025. Gufatwa kwabo kwaturutse ku makuru yatanzwe n’abaturage bakorewe ubwambuzi.
Umuvugizi wa Polisi mu Ntara y’Amajyepfo, Superintendent of Police (SP) Emmanuel Habiyaremye, yavuze ko iri tsinda ry’abantu bari batuye mu mujyi wa Kigali, ariko bakaba bakomoka mu Ntara zitandukanye, bashukaga abaturage bakabambura amafaranga bakoresheje uburyo bwa gihanga. Yavuze ko umugabo ukuriye iri tsinda, ufite imyaka 48, yabanzaga guhura n’umuntu bakamubwira ko afite ikibazo cy’amarozi, akamubeshya ko ashobora kumuvura agakira.
Yagize ati: “Twari dufite amakuru kuri iri tsinda ry’abantu bahuriye mu Mujyi wa Kigali ari naho batuye, ariko bakaba bakomoka mu Ntara zitandukanye, bagenda bashuka abaturage bakabambura utwabo bakoresheje amayeri atandukanye. Hamwe bagenda biyita abavuzi ba gihanga babivanga no gusenga bakabeshya ko berekwa, aho umugabo ukuriye iri tsinda ufite imyaka 48, abanza imbere agahura n’uwo bashaka kwambura akamusuhuza, hanyuma akamubwira ko afite ikibazo hari abantu bamuroze kandi ko ashobora kumuvura agakira.”
Yakomeje agira ati : “Mu gihe bakivugana haza bariya bakobwa babiri bakorana, bagahagarara ku ruhande nk’aho bataziranye, noneho wa mugabo agakomeza kuvuga amagambo menshi abwira wa wundi bashaka gutekera umutwe, ba bakobwa nabo bakagaragaza ko barozwe bakamwaka ubufasha bya nyirarureshwa, yavuga izina ry’uwabaroze bakiyamira bavuga bati; ndamuzi ni Nyogokuru, ni Masenge cyangwa ni umuturanyi.”
SP Habiyaremye yashimangiye ko iperereza ry’ibanze ryagaragaje ko iri tsinda ryabashije kwambura abaturage amafaranga menshi, harimo ibihumbi 50 Frw, ndetse hakaba hari n’abo bambuye amafaranga bakoresheje amayeri y’uko bashaka kubavura cyangwa kubaha imfashanyo. Yavuze ko umuyobozi w’iri tsinda yemeye ko bamaze kwambura abantu benshi mu bice bitandukanye by’igihugu, barimo Nyabugogo, Remera, Kabuga, ndetse n’ahandi mu Ntara zitandukanye.
Polisi y’u Rwanda yashishikarije abaturage kuba maso no kwirinda abantu bakoresha amayeri nk’aya agamije kubambura, ikibutsa ko ibyaha nk’ibi bihanishwa igifungo kiri hagati y’imyaka ibiri (2) n’itatu (3) n’ihazabu y’amafaranga atari munsi ya miliyoni eshatu (3.000.000 FRW) ariko atarenze miliyoni eshanu (5.000.000 FRW). Itegeko n°68/2018 ryo ku wa 30 Kanama 2018 rigena ibi byaha n’ibihano.
Polisi kandi yasabye abaturage gukomeza gukorana n’inzego z’umutekano mu kurwanya ubu buriganya, ndetse no kuba maso bakirinda guha amafaranga abantu babizeza ibintu bidashoboka.
