Umwe mu mpano nziza mu baririmbyi baramya bakanahimbaza Imana, Patrick Umutoni yatangiye kuririmba mu mwaka wa 2016, kuri ubu amaze gushyira hanze indirimbo 7 (Nkuramburiye amaboko, Dufite Imana, Amfite ku mutima, Nashize impumu, Ikara ryaka, Niwe & Amarembo).

Akaba afite intego yo kuyobora abantu kuri Kristo akoresheje impano Imana yamuhaye ababwira inkuru nziza y’agakiza ku bw’urukundo ruhebuje Kristo yakunze abantu kugeza ubwo yemeye kudupfira ngo tubone ubugingo buhoraho, kuramya no guhimbaza Imana iminsi yose niwo murage yumva yaha abazamukomokaho.

Indirimbo Amarembo yaje Patrick ari mu bibazo byinshi ndetse asa n’uwabuze igisubizo nyuma ahumurizwa n’uko hari ijuru ritabamo imibabaro nk’uko abitangaza.

Yagize ati: "Hari Umunsi umwe numvaga mbabaye cyane nari mfite ibibazo byo mu buzima busanzwe rwose numva ntanuwo nabiganiriza kuko ntagisubizo nari kubona k’Umuntu gusa Imana yaransanze irampumuriza inyibutsa ko imibabaro yo mu Isi idakwiye kugereranywa n’ubwiza bwo mu Ijuru numva ngize Iyerekwa ryo kwandika indirimbo Amarembo."

Patrick Umutoni akomeza avuga ko iryo humure yakuye ku Mana ariryo ryatumye yandika iyi ndirimbo Amarembo kugirango n’undi wese uzayumva azihanganire ibimugerageza kuko nyuma y’ubu buzima hari ubundi aho tuzaba tutababara.

Uyu muhanzi atangazako akomeje ibikorwa byo gukora indirimbo ziramya zikanahimbaza Imana kandi ko yumva Imana imushyize k’Umutima gukomeza guhumuriza abantu bayo abinyujije mu ndirimbo.

Patrick Umutoni, amaraso mashya mu muziki wa Gospel

RYOHERWA N’INDIRIMBO "AMAREMBO" YA PATRICK UMUTONI