Muri ibi bihe, ubuvuzi bugenda butera imbere; hari indwara zari zarananiranye ziri gukira hakoreshejwe modern therapy (ubuvuzi bugezweho), traditional therapy (ubuvuzi gakondo), counseling therapy (kuvuza ibiganiro), entertainment therapy (ubuvuzi bw’imyidagaduro) ndetse na religious therapy (ubuvuzi bw’imyizerere).

Abahanga mu by’ubuzima bwo mu mutwe basanga abakristo barwaye indwara z’imitekerereze bavuga ko imyidagaduro ari bwo buvuzi bugezweho muri iki kinyejana cya 21 bwabafasha.

Benshi bajya gusenga cyangwa mu bitaramo bya gospel bagataha bakize indwara zari zarababayeho akarande, batamenya ko gusirimba no kubyina indirimbo z’aya matsinda (Ministries eshanu tugiye kuvugaho) byabafashije gukira.

Tugiye kureba iyi miryango ya gikristo (Ministries) ifite uruhare runini mu kuvura abarwayi bari mu nsengero nyinshi no mu bitaramo bitandukanye, badakoresheje ibinini cyangwa inshinge, ahubwo kubera ibihangano byabo birimo amagambo meza n’amajwi aryoheye amatwi.

Ibi bikaba akarusho kuko uko biyerekana, bakoresheje umubyimba wabo imbere ku rubyiniro, biruhura ubwonko bwabo. Ministries zimwe tuvuga hano zifite icyita rusange zihuriyeho kuko zashatse gukorera uyu murimo mu nsengero zabo bakagongana n’abazishinze.

Byaturutse ku bwoba abashumba bayoboye insengero barebye uko izi korari zigaruriye imitima y’abayoboke babo, baje kwisanga babaye ibicibwa, ariko babitse cyangwa batwaye agaseke kazuyemo umuti womora ukavura inguma zo mu mitima y’abanyabyaha.

Dore izo minisiteri eshanu

1. Alarm Ministries Rwanda

Ni umuryango nyarwanda watangiye umurimo w’ivugabutumwa bakiri muri Restoration Church Kimisagara, nyuma baje gusohoka mu gihe hari inkubiri y’ihagarikwa ry’amakorari arimo Rehoboth na Musingi Choir.

Icyo gihe, Apostle Masasu Yosuwa, Umushumba mukuru wa Restoration Church Kimisagara, yashatse guhuriza hamwe abari muri izi korari, agize ngo abahurize mu itsinda ry’abaririmba (Worship Team).

Bamwe muri Rehoboth barabyanze, bahita basohoka kuko icyitwa Ministries, Apostle Masasu atashakaga kucyumva mu matwi ye, yikanga ko bazamuhirika ku buyobozi.

Hahise havuka itsinda rigizwe n’abahoze baririmba muri Rehoboth Choir bafata izina rya Rehoboth Ministries, yaje gukomokaho iyi Alarm Ministries.

Ubu ni bo bahumuriza imitima ya benshi binyuze mu bihangano byuzuyemo amagambo yomora ibikomere n’ibindi bikorwa birimo imirimo myiza nko gutanga ubwisungane mu kwivuza. Indirimbo za Alarm Ministries zikunzwe zirimo: Nzakurikira, Sinzigera Ngusiga, na Hariho Imana.

Reba indirimbo yabo yarebwe cyane, MUNGU NI YULE YULE By Alarm Ministries

2. True Promises Ministries Rwanda

Ni umuryango nyarwanda w’ivugabutumwa ugizwe n’abasore n’inkumi bafite imbaraga, basimbuka bakavuna sambwe byonyine, bikavura imvune n’intimba ziri mu mitima y’abatari bake. Mu buryo bw’umwuka, gutambira Imana mu mbaraga nyinshi byica abadayimoni benshi, bikarakaza satani. Dawidi yajyaga acuranga gusa, imyuka mibi igahunga.

Itsinda rya True Promises rimaze kuba ibyamamare, ku buryo abakunzi baryo iyo bamaze igihe batumva indimbo zabo bagira ikibazo. Baba bakumbuye kuribona aho bazataramira ngo biterere hejuru.

Indirimbo yatumye bamenyekana ni Mana Urera, itera umunezero uvanze n’ibyishimo bibakiza umujagararo (stress) bamaze igihe babana na wo. Indirimbo zabo zizwi ni Ni Wowe Mana, Turagushima, hamwe na Mana Urera. Iri tsinda, rifite umwihariko wo kuba nta Torero rishingiyeho kuva ryashingwa kugeza magingo aya.

Umwami Ni Mwiza Pe | True Promises | Indirimbo yabo yarebwe cyane kuri YouTube

3. Healing Worship Team Rwanda Ministries

Yatangiye ari Worship Team muri Power Church yayoborwaga na Pastor Mwungura, ubu abarizwa muri Leta Zunze Ubumwe za Amerika. Abasore n’inkumi na bo bigaruriye imitima ya benshi kugeza ubu ntibaracogora. Indirimbo zabo zizwi ni: Sinzava ku Mana, Nta cyo Nzaba, na Uri Byose Kuri Njye. Kuri ubu Paradise ifite amakuru ko kujya muri iyi Ministries nta dini/itorero bashingiraho, gusa si ko byahoze kera.

Atatimiza By Healing Worship Team ni yo yarebwe cyane! Yirebe

4. Sauti Hewani Ministries

Ni umuryango w’ivugabutumwa watangiye ari korali y’abaririmbyi bafite imbaraga muri Bethesda Holy Church, riyobowe na Bishop Rugamba Albert. Hari igihe yigeze kugira imyitwarire nk’iya Apostle Masasu akuraho amakorari yose abasaba gukora Worship Team, bamwe barabyemera, abandi barabyanga kubera icyo bari bavuganye n’Imana.

Sauti Hewani Ministries yari inkingi ya mwamba muri Bethesda Holy Church, yarasohotse ijya gukora nk’izindi Ministries twavuze hejuru, bakomeza kuririmba bagera ku kigero cyo gutumirwa hirya no hino mu ntara z’Igihugu no hanze yacyo, bigarurira imitima ya benshi.

Kubera ubwamamare no kuba yarahise itumbagira mu gihe gito, yahuriye n’umuhanzikazi Rose Muhando wo muri Tanzaniya mu giterane cyabereye mu Karere ka Ngoma, wakuruwe n’umwanditsi w’indirimbo witwa Rachel Rwibasira ufite ijwi nk’irye.

Sauti Hewani Ministries ubu ifite imishinga yo guteza imbere abababaye, ibaha ubufasha. Iyi Ministries yomoye ibikomere by’imiryango, yubatse ingo zifitanye amakimbirane mu ndirimbo yitwa Ijisho ry’Imana, ikaba ihagarariye izindi zose tutaretse Bwana wa Majeshi.

Indirimbo yabo yarebwe cyane muri SAUTI HEWANI MINISTRIES - IJISHO RY’IMANA yirebe kuri YouTube

5. Gisubizo Ministries Rwanda

Ifite umwihariko mu muziki, ikomoka i Bukavu muri RDC. Nyuma y’uko baje mu Rwanda, bakiriwe n’Itorero rya Pathmos of Faith Church ryayoborwaga na Bishop Nsabimana Bosco, uzwi nka Fire.

Gisubizo Ministries yaje kwigarurira imitima y’abatuye umurwa mukuru w’u Rwanda, Kigali, basa n’abanyuze kuri za zindi twitaga nkuru.

Nyuma yaje kuhava yerekeza muri Foursquare Church i Kimironko, iyobowe na Bishop Prof Masengo Fidele, kandi ntibaragoheka kugeza ubu kubera umuti bakoresha mu gukiza ibikomere bya benshi.

Gisubizo Ministries kugeza ubu bakorera uyu murimo mu Rwanda no mu bihugu bitandukanye. Indirimbo zabo zakunzwe harimo Nguhetse ku Mugongo na Amfitiye ndetse baherutse gukorana indirimbo na The Ben w’izina rikomeye mu muziki nyarwanda.

Reba iyitwa Nguhetse ku Mugongo yarebwe cyane kurusha izindi kuri YouTube