Umuhanzi wa Gospel SEE Muzik yashyize hanze indirimbo nshya yise “Simbishaka (I Don’t Want It)”, ikubiyemo ubutumwa bwo kwiyegurira Imana no kwemera ubushake bwayo kuruta ibyifuzo bya muntu.
Muri iyi ndirimbo, SEE Muzik agaragaza uko abantu bakunze gukurikira inzozi, ibyifuzo n’ibyifuzo by’isi, ariko bakagera aho bibaza niba koko ibyo bakurikiye bihuye n’icyo Imana ibashakaho. Ubutumwa nyamukuru bw’iyi ndirimbo bushingiye ku isengesho rigira riti: “Mwami, niba atari ibyo ushaka, simbishaka.”
Amwe mu magambo y’ingenzi agaragara muri iyi ndirimbo ni aya: “Mwami, ndetse kwirwanirira, Icyo ushaka abe ari cyo nifuza.” Ndetse no mu nyikirizo yayo humvikanamo amagambo agira ati: “If it is not Your will Lord, I don’t want it, Niba atari ibyo ushaka, Simbishaka.”
Dore amagambo y’indirimbo yose asobanuye mu Kinyarwanda, umurongo ku murongo:
Verse 1
Nakomeje kureba kuri telefone ijoro ryose,
ariko numva nta buzima mfite,
ibyo biri kuntera guhangayika cyane.
Uyu munsi haza icyamamare cyangwa ikintu gishya kiri kuvugwa,
ejo kikaba cyamaze kwibagirana,
none se twahitamo iki?
Ndi kwiruka, ndi kwiruka gusa,
nkurikiye ibintu bihora bihindagurika, natakariye mu rusaku rw’isi.
Ndi gutakaza inzira yanjye,
Mwami, niba utari hano, sinshaka kuhaguma.
Pre-Chorus
Mwami, ndaretse kwirwanirira,
icyo ushaka abe ari cyo nifuza.
Chorus
Niba atari ubushake bwawe Mwami,
sinshaka kubigira ibyanjye.
Niba atari byo ushaka,
simbishaka.
Hook
Simbishaka...
Sinshaka kubigira ibyanjye...
Verse 2
Buri munsi ngira ibitekerezo n’inzozi nyinshi,
nkibaza niba byose biri muri gahunda yawe.
Birashoboka ko bimwe ari ibirangaza,
binkura kuri gahunda yawe nyamukuru.
None se nakora iki?
Ndi kwiruka, ndi kwiruka gusa,
nkurikiye ibintu bihora bihindagurika, natakariye mu rusaku rw’isi.
Ndi gutakaza inzira yanjye,
Mwami, niba utari hano, sinshaka kuhaguma.
SEE Muzik avuga ko iyi ndirimbo yayanditse nyuma yo kunyura mu bihe byari birimo urujijo n’ibibazo byinshi, bituma asenga asaba Imana kumuyobora no kumwereka ubushake bwayo. Ni indirimbo ishishikariza abantu kudashingira ubuzima bwabo gusa ku byifuzo byabo bwite, ahubwo bakabanza gushaka icyo Imana ibashakaho.
Indirimbo “Simbishaka” yasohotse ku wa 4 Kamena 2026, ikaba ikomeje kwakirwa neza n’abakunzi b’umuziki wa Gospel kubera ubutumwa bwayo bwibanda ku kwizera no kwiyegurira Imana.
"Simbishaka" ni kimwe mu bikorwa biri gutegura iserukiramuco rikomeye "Nuru Wave Festival" rigamije gufasha urubyiruko kuvumbura intego y’ubuzima bwabo, kubaka umuryango mugari ushingiye ku ndangagaciro nziza no guhura n’Imana binyuze mu muziki, ubuhanzi no kuramya.
SEE Muzik n’abari kumufasha gutegura "Nuru Wave Festival" bavuga ko atari igitaramo gusa, ahubwo ari urugendo rugamije gufasha urubyiruko kubaho ubuzima bufite intego, kwizera gukomeye no kugira uruhare rwiza mu guhindura sosiyete.
Iri serukiramuco rizabera i Kigali ku wa 16 Kanama 2026 kuri Mundi Center, rizahuza urubyiruko, abahanzi, abaramyi, abanyabugeni n’abandi banyempano mu gikorwa kizaba cyuzuyemo umuziki, ubuhanzi, ibiganiro byubaka, kuramya no gusangira ubuzima.
REBA INDIRIMBO SIMBISHAKA YA SEE MUZIK
