LifeWay Worship Team imaze imyaka 5 mu murimo wo kuramya Imana muri Amerika yateguye igitaramo yise “Overflow Nights of Worship” kizaba ku Cyumweru tariki 15 Kamena 2025.
LifeWay Worship Team ni itsinda ry’abaramyi bakorera muri LifeWay Free Methodist Church, iherereye mu Mujyi wa Indianapolis, muri Indiana – Leta Zunze Ubumwe z’Amerika, iyobowe na Rev. Isaac Bujambi.
Igitaramoi bateguye gifite intego yo guhuza amatorero atandukanye yo muri Indiana mu kuramya Imana mu bumwe.
Uretse kuramya no guhimbaza Imana, bazanakoramo live recording y’indirimbo z’itsinda, zizajya hanze mu minsi iri imbere nk’uko Fiston Bujambi yabitangarije Paradise.
Muri iki gitaramo, batumiye abaramyi n’abakozi b’Imana barimo:
• Nkomezi Alexis
• Apostle Huduma
• N’abandi baramyi batandukanye bo muri leta ya Indiana.
Iri tsinda ryatangiye umurimo mu mwaka wa 2020, rigamije kwamamaza ubutumwa bwiza binyuze mu ndirimbo zo kuramya no guhimbaza Imana.
Mu myaka itanu ishize, bakoze ibikorwa byinshi birimo ingendo mu bihugu bitandukanye byo muri Leta Zunze Ubumwe za Amerika, aho bahurira n’Abakristo batandukanye bagasangira ibihe by’amasengesho n’indirimbo.
Ibikorwa byaranze LifeWay Worship Team mu bihe byashize
Muri iyo myaka, LifeWay Worship Team yateguye ibitaramo byinshi bikomeye, aho bakoranye n’abahanzi b’inararibonye mu muziki wa Gospel barimo:
• Christina Shusho (Tanzania)
• Apollinaire Habonimana (Burundi)
• Aimé Uwimana (Rwanda)
• N’abandi bahanzi benshi bo muri diaspora nyarwanda n’Abanyafurika baba muri Amerika.
Binyuze muri ibi bitaramo, bagiye bubaka ubumwe n’amatorero atandukanye, banatanga ubusabane mu mwuka binyuze mu kuramya no guhimbaza Imana.
Imibereho y’umuziki wa Gospel muri iki gihe
Fiston Bujambi avuga ko umuziki wa Gospel uri gutera imbere kurusha uko byari bimeze mbere. Yagize ati: “Ubu biroroshye kugeza ku abantu ubutumwa binyuze ku mbuga nkoranyambaga nka YouTube, Instagram, TikTok… bitandukanye no hambere aho wasabwaga kunyura kuri Radio gusa.”
Yongeraho ko iyi "Online platform" yatumye abahanzi ba Gospel benshi barushaho kumenyekana no ku rwego mpuzamahanga.
LifeWay Worship Team ikomeje umurimo w’Imana ku bufatanye n’abandi, igamije kugeza indirimbo zubaka ku mitima y’abantu benshi mu isi hose.
LifeWay Worship Team imaze imyaka 5 mu murimo wo kuramya Imana muri Amerika ikomeje kumvikana mu ndirimbo zubaka! Ntuzacikwe n’igitaramo.
