Minisiteri y’Urubyiruko n’Iterambere ry’Ubuhanzi (MoYA) ku bufatanye na Banki Itsura Amajyambere (BRD), batangije ikigega gifasha urubyiruko n’abahanzi kubona inguzanyo ihendutse
MoYA na BRD batangaje gahunda nshya igamije gufasha urubyiruko n’abahanzi barimo n’abaririmba indirimbo zo kuramya no guhimbaza Imana, kubona inguzanyo ku buryo bworoshye, hagamijwe guteza imbere imishinga yabo no kubafasha kwiteza imbere mu bukungu.
Iki kigega cyashyizweho na Leta gitanga amahirwe atandukanye ku rubyiruko n’abahanzi, harimo kuba usaba inguzanyo asabwa ingwate itarenze 10% by’agaciro k’inguzanyo, mu gihe inyungu (interest rate) iri kuri 9%, bikaba biri hasi ugereranyije n’izisanzwe ku isoko.
Ikindi kintu cy’ingenzi ni uko uwafashe inguzanyo akayishyura neza, ahabwa inkunga ingana na 10% by’inguzanyo yafashe, bikamufasha kurushaho gukomeza ibikorwa bye. Kwishyura iyo nguzanyo bitangira nyuma y’amezi atatu uyifashe, kandi igihe cyo kuyishyura kiri hagati y’amezi 6 n’imyaka itanu.
Abifuza kungukira kuri iyi gahunda basabwa kuba ari urubyiruko ruri hagati y’imyaka 18 na 30, cyangwa se abahanzi batagomba kuba muri iyo ntera y’imyaka. Bagomba kuba bafite umushinga usanzwe ukora kandi wanditse mu buryo bwemewe n’amategeko, harimo kugira nimero y’umusoreshwa (TIN) n’ipatante.
Nanone, usaba inguzanyo agomba kuba afite konte ikoreshwa mu bucuruzi bwe imaze nibura umwaka, kandi agatanga inyandiko zigaragaza uko umushinga uhagaze, uko uzunguka ndetse n’uko uzakomera mu gihe kiri imbere. Bagomba kandi kwerekana uko bazishyura inguzanyo basabye.
Ababisaba kandi basabwa kuba barigeze gukorana n’ibigo bitanga amahugurwa mu by’ubucuruzi, aho kuba bafite icyemezo cy’uko bahuguwe bifatwa nk’inyongera nziza.
Kwiyandikisha bikorwa hifashishijwe link iri ku rubuga rwa Minisiteri y’Urubyiruko n’Iterambere ry’Ubuhanzi ndetse no ku mbuga nkoranyambaga zayo. Igihe ntarengwa cyo kwiyandikisha ni ku wa 30 Gicurasi 2026.
Nyuma yo kwakira ibisabwa, urutonde rw’abujuje ibisabwa ruzashyikirizwa BRD kugira ngo hakorwe isesengura ryimbitse mbere y’uko bahabwa inguzanyo.
Iyi gahunda igamije gufasha urubyiruko n’abahanzi kubona ubushobozi bwo guteza imbere imishinga yabo mu buryo burambye, ibaha amahirwe yo kugera ku mari ku nyungu nto no mu buryo bworoshye.
Ni intambwe ikomeye mu gushyigikira iterambere ry’urubyiruko no guteza imbere ubuhanzi n’ubucuruzi mu Rwanda.
