Constant Mutamba, Minisitiri w’Ubutabera wa Repubulika Iharanira Demokarasi ya Kongo, yasabye abayobozi b’amadini n’amatorero bakorera muri iki gihugu, gukusanyiriza amaturo ingabo za FARDC, n’Ihuriro ry’imitwe ya Wazalendo.
Inkuru dukesha Kigali Today, ivuga ko uyu munyamategeko yasobanuye ko aya maturo azakusanyirizwa mu masengesho yo kurwanya icyo yise ubushotoranyi bukorerwa igihugu cyabo, azaba tariki ya 9 Gashyantare 2025 agira ati: “Ubwitange bwihariye buzagenerwa FARDC na Wazalendo buzakusanywa. Umusaruro uzavamo uzakirwa, unakwirakwizwe na Komisiyo ihuriweho izashyirwaho, tariki 20 Gashyantare 2025.”
Minisitiri Mutamba yasabye Abakongomani kwitabira aya masengesho ku bwinshi, mu gihe abarwanyi b’umutwe witwaje intwaro wa M23 bakomeje kwambura ihuriro ry’ingabo za Leta ya RDC ibice byinshi mu Ntara ya Kivu y’Amajyaruguru na Kivu y’Amajyepfo.
Abarwanyi ba Wazalendo bari gukusanyirizwa inkunga, usanga baravuye mu mitwe yitwaje intwaro itandukanye, barimo abahoze barinda ibirombe bicukurwamo amabuye y’agaciro n’abandi bava impande zose.
Mu mikorere yayo bitewe n’uko buri mutwe uba ufite umuyobozi wayo, iri huriro nta muyobozi uzwi rigira ndetse n’abashobora kubyiyitirira baba bashaka inyungu z’amafaranga cyangwa ubudahangarwa bakura mu gukorana na FARDC.
Minisitiri Constant Mutamba asaba ko Abayobozi b’Amadini batanga amaturo agenewe Wazalendo
Ingabo za FRDC
Abayobozi b’Amadini muri RDC
