Korali La Source ikorera umurimo w’Imana mu Karere ka Rubavu muri ADEPR Rubavu/Mbugangari, igiye gutaramira Kimisagara muri "Guhembuka Live Concert".
Korali La source ifite ivugabutumwa mu mujyi wa Kigali kuri ADEPR Kimisagara (Kove), ni igiterane cyatangiye ku wa 11 Ukuboza 2023 aho cyateguwe na Korali Abatoranijwe yo kuri iri torero.
Ni igiterane cyiswe "Guhembuka Live Concert" kikaba gifite intego iri mu byakozwe n’Intumwa 3:19 "Nuko mwihane muhindukire, ibyaha byanyu bihanagurwe ngo iminsi yo guhemburwa ibone uko iza ituruka ku Mwami Imana".
Cyatumiwemo abavugabutumwa batandukanye nka Rev.Past Claude, Ev.Nshizirungu na Ev. Jean Paul. Si abavugabutumwa gusa kuko kiri kwitabirwa n’amakorali atandukanye nka korali Fideliphia yo kuri iri torero, Abanyamugisha Choir nayo yo kuri iri torero.
Mu makorali y’abashyitsi dusangamo Sauni Choir yo kuri ADEPR Cyahafi, Simuruna Choir yo kuri ADEPR Kiyovu, Naziri Choir yo kuri ADEPR Nyakabanda, Abacunguwe yo kuri ADEPR Rutonde ndetse na La source Choir y’i Rubavu kuri ADEPR Mbugangari.
La Source ifite alubumu 2 aho iya mbere yagiye hanze mu mpera za 2016 bise “Tuzanye inkuru nziza“. Album ya kabiri bayisohoye mu mwaka wa 2019 bayita "Ntiwigeze udutererana", ikaba igizwe n’indirimbo 10.
Muri uyu mwaka bamaze gushyira hanze ibihangano bishya ndetse byanakunzwe nka "Ntacyantandukanya ","Mbona Malayika" ,"Ibihe", n’ibindi.
Mu gitondo cy’uyu wa Gatandatu tariki 15 Ukuboza 2023 nibwo La Source choir yaciye agahigo ko kugira indirimbo yabo ya mbere yarebwe cyane ikaba yujuje Miliyoni y’abamaze kuyireba. Ni indirimbo bise "Ntiwigeze udutererana".
Aka gahigo baciye karashyira La Source choir ku mwanya wa mbere mu buryo budasubirwaho mu makorali yo mu Ntara y’Iburengerazuba. La Source Choir yabwiye Paradise ko bari mu mashimwe akomeye, banashimira ababigizemo uruhare bose.
Aba baririmbyi b’i Gisenyi, bafashe agace gato k’iyi ndirimbo bagasangiza ababakurikira. Ni agace baririmbamo bati "Aho twagendaniye Yesu we ntigeze udutererana". Uko bayiririmba ni nako baba bagaragaza uburyo iyi ndirimbo yujuje Miliyoni kuri Youtube.
RYOHERWA N’INDIRIMBO "NTIWIGEZE UDUTERERANA" YA LA SOURCE CHOIR
La Source choir itegerejwe bikomeye i Kigali ku Kimisagara
