Iyi ndirimbo yasohotse ku wa 24 Gicurasi 2024. Ni indirimbo y’ubuhanuzi igaruka ku buzima bwa Nowa, ndetse ikanatanga inama yo kumwigana. Mu kiganiro Elsa Cruz yagiranye na Paradise, yabigarutseho agira ati: “Iyi ni Indirimbo y’Ubuhanuzi. Ni ubutumwa nahawe nyuma yo kubona abantu benshi bihana bagendeye ku byo kamere zabo zirarikiye.”

Yakomeje agira ati: “Mbihuza n’ukuntu Imana yahaye Nowa amabwiriza y’ukuntu agomba kwimukira mu nkuge, ikamuha uko izaba imeze, igiti igomba kubazwamo, metero izaba ifite n’ayandi mabwiriza azagenderaho.”

Abihuza n’igihe turimo, aboneraho no gutanga ubutumwa agira ati: “Natwe muri iyi minsi turasabwa ‘Kwimuka’ bigereranwa no ‘Kwihana’ nta muntu turebeyeho ahubwo turebeye kuri Kristo we rugero rwiza. Izindi mfatiro zose wakubakiraho mu gakiza zitari Kristo ni ukubaka ku musenyi.

Mu ndirimbo aririmba agira ati: “Kwimuka nta we usanga birakanyagwa. Nowa yagombaga guhera ku busa, akubaka agendeye ku mabwiriza yari yahawe n’Imana. Nawe uyu munsi urararikirwa kwimuka, ukubaka ugendeye ku mabwiriza y’Imana… Kwimuka mvuga ni ukwihana Ntutekereze ko Satani abikunda, urasabwa kugenda nk’utorotse, ukagenda utareba inyuma. Emerera Yesu nonaha akubakire.”

Uyu muhanzi Elsa Cruz ari mu bakomeye muri Korali Yesu Araje yo mu Itorero ry’Abadiventisiti b’Umunsi wa Karindwi riherereye Kacyiru Merdien, ku rusengero rwitwa LMS Kamukina.

Kuri uyu munsi, ni umugabo akaba n’umubyeyi w’umwana umwe. Yashyingiranywe na Bayiramye Chantina ku wa 20 Ukwakira 2019, bakaba bafitanye n’indirimbo ziri ku muyoboro wabo wa YouTube wa El Music Rwanda.

Indirimbo aheruka gushyira ari kumwe n’umugore we ni iyitwa Burya imaze ukwezi kurenga isohotse.

Uretse iyi nshyashya yise Kwimuka, azwi mu zindi ndirimbo zirimo iyitwa Si Ubusa, Sinabona Ituro ikurikiwe n’iyi Kwibuka, n’izindi nyinshi zakoze ku mitima ya benshi mu bakunda indirimbo zo kuramya no guhimbaza Imana.

Kuririmba abifitemo impano, si ibyo ashakisha

Elsa Cruz ari kumwe n’umugore we Chantina n’umwana wabo