Umusizi Umurerwa Uwimbabazi Nadia uzwi nka Umurizabageni Nadia yasohoye igisigo gikomeye ku marangamutima cyibutsa amateka ya Jenoside yakorewe Abatutsi mu Rwanda, mu rwego rwo kwifatanya n’Abanyarwanda mu gihe cyo Kwibuka ku nshuro ya 32 Jenoside yakorewe Abatutsi.

Iki gisigo yise “Ibuka Nanjye Nibuke Rwanda” cyashyizwe hanze ku wa 7 Mata 2026, umunsi u Rwanda n’Isi yose bitangiriraho Kwibuka ku nshuro ya 32 Jenoside yakorewe Abatutsi mu 1994.

Mu magambo yuzuye amarangamutima, uyu musizi agaruka ku mateka mabi igihugu cyanyuzemo, agaragaza ubukana Jenoside yakoranywe, ubuzima bwari bwugarijwe n’urwango n’amacakubiri, ndetse n’agahinda Abanyarwanda banyuzemo muri icyo gihe.

Mu gice kimwe cy’igisigo, agira ati:

“Ibuka nange nibuke Rwanda,
Ibuka cya gihe umwijima ubuditse,
Imihoro ibaga imihogo y’Abatutsi,
Imiborogo yuzuye iminwa y’abahigwaga.”

Aya magambo agaragaza ubukana Jenoside yakorewe Abatutsi yakoranywe, aho abantu bishwe bazira uko bavutse, bakicwa mu buryo bw’agashinyaguro.

Nadia ntiyagarukiye gusa ku mateka y’akaga, ahubwo yibutsa Abanyarwanda uruhare rwabo mu kwiyubaka no gukomeza kubaka Igihugu gishingiye ku bumwe n’ubwiyunge.

Mu kindi gice cy’igisigo, agira ati:

“Twibuke Twiyubaka, kwibuka si inzika Banyarwanda,
Dushimire Inkotanyi zatugobotse,
Ahari umwijima hazanywe umucyo udakomwa mu nkokora.”

Aya magambo ashimangira uruhare rw’Inkotanyi mu guhagarika Jenoside no kongera gusubiza Igihugu mu murongo w’amahoro, ndetse n’icyizere cy’ejo hazaza cyongeye kugaruka mu Banyarwanda.

Uyu musizi kandi agaragaza uko u Rwanda rwavuye mu icuraburindi rukagera ku iterambere rirambye, aho ubu abaturage bafite umutekano, ubwisungane mu kwivuza, ibikorwa remezo n’ubuyobozi bufite icyerekezo.

Ati: “Nta Munyarwanda ukigendana impungenge,
Yabonye ubwigenge n’ubwisungane mu kwivuza,
Inzira y’ubumwe n’ubwiyunge yabaye nyabagendwa.”

Igisigo cya Umurizabageni Nadia kirangizwa n’ubutumwa bwibutsa Abanyarwanda kudasubira inyuma, ahubwo bagakomeza kwiyubakira Igihugu cyiza, bashingiye ku ndangagaciro z’ubumwe, kwibuka no kwiyubaka.

Ati: “Banyarwanda Banyarwandakazi, intero ni Ndi Umunyarwanda,
Twese hamwe Twibuke Twiyubaka.”

Mu kiganiro yagiranye na Paradise, Umurizabageni Nadia yagize ati: “Iki gisigo gifite uburemere mu butumwa gitanga, kuko gikangurira urubyiruko kumenya amateka y’Igihugu, kuyasobanukirwa neza no kuyigiraho, mu rwego rwo kurinda ko Jenoside yakongera kubaho ukundi.”

Mu gihe cyo Kwibuka ku nshuro ya 32, ibikorwa nk’ibi by’ubuvanganzo bikomeje kugira uruhare runini mu kubika amateka no gufasha Abanyarwanda gukomeza urugendo rwo kwiyubaka, bakomeza kubaka u Rwanda rufite amahoro arambye n’iterambere rishingiye ku bumwe bw’abaturage barwo.

Twibuke Twiyubaka. Reba igisigo cya Umurizabageni Nadia kuri YouTube, “Ibuka Nanjye Nibuke Rwanda”