Ni urugendo rwabanjirijwe n’ikiganiro kigaruka ku itegurwa rya Jenoside yakorewe Abatutsi muri Mata 1994 cyatanzwe na Madame Mukaburasanzwe Marthe umwalimu wigisha isomo ry’amateka muri iki kigo ndetse na Bwana Siborurema Mathias umurezi uhagarariye abandi mu mashuli yisumbuye.

Basobanuriye abanyeshuli uko Jenoside yateguwe aho kuva mu gihe cy’ubukoroni abakoroni bazanye politiki yo guacamo abanyarwanda ibice no gutoteza Abatutsi kugeza ku ishyirwa mu bikorwa rya Jenoside yakorewe Abatutsi mu 1994 yahitanye Abatutsi barenga miliyoni.

Nyuma y’iki kiganiro iri tsinda ryerekeje ku rwibutso rwa Jenoside rwa Kigali aho abanyeshuli biga mu mashuli yisumbuye bagera kuri 80 baherekejwe n’abarezi babo babashije kwibonera n’amaso yabo ingaruka z’ubugome ndengakamere bwavukije ubuzima inzirakarengane aho babashije kwiga amasomo y’ibyabaye binyuze muri filimi (documentaire).

Nyuma yo kureba iyi filimi babashije gusura ibindi byumba birimo icyumba cy’amafoto agaragaza itegurwa rya Jenoside yakorewe Abatutsi mu 1994 kugeza ku ishyirwa mu bikorwa ryayo ndetse n’imbwirwaruhame zakanguriraga Abahutu kwica Abatutsi.

Hanasuwe ibindi byumba birimo icyumba cy’abana kigaragaramo amafoto y’abana bicanywe umutima wa kinyamaswa basoreza mu cyumba kigaragaza izindi Jenoside zabaye mu bindi bihugu harimo iyakorewe Abayahudi mu 1945 yateguwe na Adolphe Hitler aho yifashishije Aba NAZI kurimbura Abayahudi.

Nyuma yo gusura ibi byumba aba barezi n’abanyeshuli bashyize indabo ku mva bunamira inzirakarengane zirenga ibihumbi 250 ziruhukiye muri uru rwibutso zishwe urw’agashinyaguro muri Jenoside yakorewe Abatutsi mu 1994.

Aganira na Paradise, Madame Mukangemanyi Mamille umuyobozi w’Urwunge rw’Amashuli rwa GS Gisozi II yavuze ko kwibuka Jenoside yakorewe Abatutsi mu 1994 bikwiye kuba umuco hagamijwe kwimakaza amahoro.

Kuba urubyiruko rw’abanyeshuli bavutse nyuma ya Jenoside yakorewe Abatutsi bari mu bitabiriye uru rugendo, yavuze ko bifite ubusobanuro bukomeye.

Ati: "Ku ishuli abanyeshuli bacu bigishwa amateka ugasanga aya mateka akeneye inyunganizi. Rero gusura urwibutso rwa Jenoside bituma aba bana barushaho kumenya ubukana bwa Jenoside yakorewe Abatutsi yaba mu itegurwa ndetse no mu ishyirwa mu bikorwa".

Yavuze ko ibi bizafasha aba banyeshuli mu gufata ingamba zo kurwanya ingengabitekerezo ya Jenoside no kwamaganira kure uwo ari we wese washaka kubacengezamo izindi nyigisho zibayobya.

Jean d’Amour Mugisha umunyeshuli uhagarariye abandi (Head Boy) ubwo yabazwaga isomo yakuye muri uru rugendo yagize ati: "Isomo nakuyemo ni uko niboneye ukuri kuruta ibyo abantu bajyaga bambwira ku bukana n’ishyirwa mu bikorwa rya Jenoside yakorewe Abatutsi mu 1994."

Arakimeza ati: "Nanone nize kwirinda ingenga bitekerezo ya Genocide nkaba ngomba gusangiza ukuri abanyeshuli mpagarariye batabashije kugera hano."

Ikigo cya GS Gisozi II kibarizwa mu karere ka Gasabo mu murenge wa Gisozi kikaba kibarizwamo abanyeshuli bakabakaba 1900.

Abarezi n’abanyeshuli bo muri GS Gisozi II basuye urwibutso rwa Jenoside rwa Kigali