Uyu munsi ushingiye ku nkuru y’ukwemera no kumvira Imana umuhanuzi Ibrahim (Aburahamu) yagaragaje.

Mu myemerere ya Islam, Eid al-Adha yibutsa igihe Allah yageragezaga Ibrahim amutegeka gutamba umwana we yakundaga cyane, Isimayeli (Ishmael).

Ibrahim yemeye kumvira itegeko ry’Imana nta gushidikanya, ndetse n’umwana we agaragaza ukwemera gukomeye ko kwemera ibyo Imana yashakaga.

Ariko mu gihe gikomeye cyo gutanga igitambo, Allah yaje gutabara. Aho gutamba umwana, yohereje intama nini ngo ibe igitambo cyasimbuye Isimayeli.

Ibi byabaye ikimenyetso gikomeye cy’uko Imana ishima ukwemera, kumvira no kwicisha bugufi imbere yayo.

Ni muri urwo rwego Eid al-Adha iba umunsi wo kwibuka uwo mugenzo: Abayisilamu bica amatungo bagasangira n’abatishoboye, bakibuka ko ukwemera no kugira neza ari byo shingiro ry’uyu munsi mukuru.

Ariko hari itandukaniro rizwi hagati y’amadini atatu ya Abrahamu (Islam, Ubukristo n’Abayahudi). Muri Bibiliya, cyane cyane mu gitabo cy’Itangiriro igice cya 22, havuga ko Imana yategetse Aburahamu gutamba Isaka (Isaac), si Isimayeli.

Abayahudi n’Abakristo bemera ko Isaka ari we mwana w’isezerano, akaba n’inkomoko y’uruhare rukomeye mu mateka ya Isirayeli n’umurongo ugera no kuri Yesu mu myemerere ya gikristo.

Mu Islam ho, inkuru ishingiye kuri Korowani (Surat As-Saffat 37:99–113), aho nubwo izina ry’umwana ritavugwa mu buryo bweruye, imigenzo ya kiyisilamu n’abasobanuzi benshi bavuga ko uwo mwana yari Isimayeli, umuhungu mukuru wa Ibrahim, akaba afatwa nk’umukurambere w’Abarabu ndetse n’inkomoko y’umurongo w’igisekuruza kivukamo Intumwa Muhammad (Imana imuhe amahoro n’imigisha).

Iri tandukaniro rituruka ku buryo buri dini ryubatse imigenzo yaryo n’umurongo waryo w’amateka. Abashakashatsi bamwe bavuga ko Ubukristo n’Ubuyuda byashyize imbere Isaka kubera isano ry’isezerano ryabo rigera kuri Mesiya, mu gihe Islam yashimangiye Isimayeli kubera isano ifitanye n’umurongo w’Intumwa Muhammad n’amateka y’Abarabu.

Nubwo hari icyo batandukaniyeho ku izina ry’umwana, intandaro y’inkuru ihurirwaho: Ibrahim ni urugero rukomeye rw’ukwemera no kumvira Imana kugeza ku rwego rwo gutanga icyo akunda cyane.

Ni yo mpamvu Eid al-Adha ikomeza kuba umunsi w’isi yose wibutsa abantu ko ukwizera, kwitanga no kugirira abandi neza bifite agaciro gakomeye kurusha byose.