Korali Abatoranijwe ikorera umurimo w’Imana ku itorero rya ADEPR Kimisagara paruwase ya Muhima mu mujyi wa Kigali iri mu giterane gikomeye yise "Guhembuka Live Concert".
Korali Abatoranijwe bateguye igiterane kiswe "Guhembuka live Concert" gifite intego iri mu Ibyakozwe n’Intumwa 3:19 "Nuko mwihane muhindukire, ibyaha byanyu bihanagurwe ngo iminsi yo guhemburwa ibone uko iza ituruka ku Mmwami Imana".
Ni igiterane cyatangiye ku wa Mbere tariki 11 Ukuboza 2023. Uwo munsi hataramye korali yo mu Kiyovu "Simuruna Choir", ndetse umuvugabutumwa yari Ev.J.Paul w’i Nyarugenge agabura ijambo ry’Imana. Habaye ibihe byiza hihana abantu 17, abandi benshi barahembuka.
Ku munsi wa kabiri w’igiterane "Guhembuka Live Concert" hari Korali Naziri yo kuri ADEPR Nyakabanda nabwo habwirije J Paul hihana abagera kuri 13.
Ku wa 3 haje korali Sayuni yaturutse kuri ADEPR Cyahafi n’umuvugabutumwa Rev.Claude ushinzwe ivugabutumwa n’ubuzima bw’itorero muri ADEPR.
Abacunguwe yo kuri ADEPR Rutonde ndetse na La Source Choir y’ i Rubavu kuri ADEPR Mbugangari nabo bakoze umurimo w’Imana muri iki giterane.
Ku wa 4 haje korali Abacunguwe guturuka mu karere ka Rulindo mu murenge wa Shyorongi mu itorero rya Rutonde ndetse hagaruka Rev.Claude.
Kuwa 5 igiterane cyarakomeje. Hataramye korali ltabaza guturuka muri paruwasi ya Muganza ku itorero rya Karama n’umuvugabutumwa Ev.Nshizirungu guturuka mu majyaruguru, abantu benshi barihana ndetse abandi barahembuka.
Kuwa Gatandatu ku wa 16 Ukuboza na tariki 17 Ukuboza 2023 haje La Source Choir guturuka i Rubavu ndetse n’umuvugabutumwa Nshizirungu nawe arakomeza kuri iki cyumweru ku munsi wo gusoza.
Mu kiganiro na Paradise, Niyongira Andre umuyobozi wa korali Abatoranijwe yagize ati: "Turishimye abantu barimo barafashwa, igiterane cyacu cyagenze neza ndetse Imana iri gukora ibirenze cyane ibyo twatekerezaga y’uko izakoramo.
Twifuzaga ko abantu bahembuka ndetse bakihana ibyaha kugira ngo bahindukire maze iminsi yo guhembuka ibone uko iza iturutse ku Mana. Turanezerewe kuko guhera ku munsi wa mbere urusengero ruruzura" .
"Icyo twabwira abanyarwanda guhembuka biri mu uburyo 3 , uburyo bw’umwuka nk’abakirisito bakihana ibyaha, uburyo bw’amarangamutima ari igihe umuntu aba yarahuye n’ibikomere agakomereka cyane ku buryo aba mu buzima bwigunze bukomeye;
Ariko iyo Imana yohereje guhembuka muri we na bya bikomere Imana igenda ibyomora akagubwa neza muri Kristo Yesu. lkindi guhembuka nta muntu wahembuka ashonje no guhembuka mu buryo bw’ubuzima busanzwe bwo mufuka kuba hari ikintu ufite kigutunze nabyo ni byiza kandi Imana yacu ishobora byose ijya irengera umuntu akagira icyo abona ikimutunga mu buzima.
Guhembuka ibyo tugomba kubisengera ariko tunashishikariza abantu gukora kugira ngo bahembuke mu buryo bwose kandi lmana yacu izadushyigikira muri byose."
Korali Abatoranijwe yatangiye ivugabutumwa mu 1995. Batangiye ari urubyiruko ariko ubu baravanze babaye abantu bakuru, ubu ni abaririmbyi 83.
Iyi korali ifite alubumu 3 z’amajwi ndetse na alubumu 2 z’amashusho, gusa ubu bari gukora indi alubumu y’amajwi n’amashusho ndetse n’umusozo w’iki giterane bazaha abakunzi babo indirimbo 2 nshya.
Umuyobozi w’iyi korali yakomeje agira ati: "Nasoza ndarika abantu mbabwira ngo ni muze nta muntu udakeneye guhembuka. Guhembuka mu buryo butatu: ushobora kuba warahembutse mu buryo bw’umwuka ariko warahuye n’ibikomere bikomeye ngwino Yesu aguhembure;
Ushobora kuba warahembutse mu buryo bw’umwuka ndetse n’amarangamutima ariko ufite ikibazo cy’ubukungu (mu mufuka) ngwino usenge lmana iguhe umugisha.
Ibi si igipindu Yabesi yarasenze lmana agira ati "Icyampa ukampa umugisha rwose ukagura imbago zanjye ukandinda ibyago ntibimbabaze nuko lmana yumva icyo Yabesi yayisabye irabimuha"
"Ubundi izina Yabesi risobanura agahinda uyu nawe ni ikitegererezo cyiza twakagombye kureba ho ko hari ibintu lmana ijya ihindura, ijya ihindura amateka igakora ibyiza iyo uyibaye hafi."
Benshi bahembukiye mu giterane "Guhembuka Live Concert"
