Kamala Devi Harris, umugore uzahagararira ishyaka ry’Abademokarate muri Amerika nk’umukandida uhatanira umwanya w’umukuru w’igihugu mu matora azaba muri uyu mwaka wa 2024, afite indangagaciro za gikristo zituma akundwa cyane.
Uyu mugore Kamala Devi Harris wavutse ku ya 20 Ukwakira 1964, akavukira ahitwa Oakland, i California muri Leta Zunze Ubumwe z’Amerika, ni umwe mu bagize umuryango w’Ababatisita b’Abanyafurika, kandi kwizera kwe kwagize ingaruka nziza ku ndangagaciro ze no ku mikorere ye rusange.
Kamala Harris, asanzwe ari Visi Perezida wa Leta Zunze Ubumwe z’Amerika. Yavuze ku myizerere ye ya gikristo inshuro nyinshi, ariko ubusanzwe nta bwo ari byo byibandwaho cyane mu bantu be, nubwo indangagaciro akuramo ari zo zituma aba uwo ari we.
Yavuze uburyo kwizera kwe kwagize uruhare mu bitekerezo bye, bigatuma agira uko yitwara mu bijyanye n’ubutabera n’imibereho myiza y’abaturage. Urugero, yavuze uburyo inyigisho z’itorero rye zamuteye inkunga mu gukemura ibibazo bikomeye nko kuvugurura ubutabera mpanabyaha no gushyigikira imiryango itishoboye.
Imyizerere ya gikristo ya Harris iri mu bigize ubumuntu bwe mu buryo bwagutse, cyane ko imibereho ye yo mu mwuka n’umuco na yo ikubiyemo umurage we w’Ubuhinde ndetse n’ubunararibonye bwe nk’umushinjacyaha n’umunyapolitiki.
Icyakora, birakwiye ko tumenya ko nubwo kwizera kwe kugira uruhare mu buzima bwe bwa buri munsi, umwuga we wa politiki urangwa no kwibanda ku bibazo bitandukanye bya politiki birenze ukuba yakwibanda cyane cyane ku idini.
Kuba Kamala Harris ari mu kwizera kw’Ababatisita, nanone bihishura ko ibikorwa bye bya gikristo bifitanye isano n’uburere bwe n’ubuzima bwe bwite aho kuba ibintu byihariye cyangwa ibintu byabayeho gutyo gusa. Yakuriye mu muryango uvanze n’umuco n’amadini. Nyina, Shyamala Gopalan, yari Umuhindu, naho se, Donald Harris, akomoka muri Afro-Jamayike kandi afite inkomoko mu miryango ya gikristo.
Harris yavuze ku ruhare rw’ukwizera kwe kwa gikristo mu buzima bwe, cyane cyane mu myaka ye amaze gukura, avuga ko kuba yarifatanije n’umuryango w’Ababatisita, harimo no kugira uruhare mu bikorwa by’itorero n’ibindi bikorwa byabo, biri mu byamufashije mu rugendo rwe rwagutse rwo kuba umucamanza wo mu mwuka no kwiyemeza ubutabera buzira uburyarya.
Nubwo atagaragaje amatariki cyangwa uko ibikorwa bye byo kuba umunyedini byabaye, kwizera kwe kwabaye igice cy’ingenzi mu buzima bwe bwite ndetse n’ubuzima rusange bw’ibyo akora, mbese ni mu buzima bwe bwose.
Kamala Harris ariko nta bwo ari umushumba. Ni umunyamategeko akaba n’umunyapolitiki, kuri ubu akaba ari Visi Perezida wa Amerika, bikiyongeraho no kuba yarahawe na Perezida wa Amerika, Joe Biden, kumusimbura akaba umukandida mu mwanya we, akaba ari we wiyamamariza kuyobora igihugu nka Perezida muri manda y’imyaka ine ikurikira.
Mu ijoro rya tariki 20 Nyakanga 2024, Perezida wa Leta zunze Ubumwe za Amerika, Joe Biden, yatangaje ko yafashe umwanzuro wo kutaziyamamaza mu matora ya Perezida, inshingano aziharira Kamala Harris wari Visi-Perezida we, ngo azahagararire ishyaka ry’ Abademokarate ahangana na Donald Trump w’Abarepubulikani.
Joe Biden yagize ati: “Uyu munsi ndashaka guha ubufasha bwanjye, n’amahirwe Kamala akaba ari we uzahagararira ishyaka ryacu uyu mwaka. Ba Demokarate ni cyo gihe ngo twunge ubumwe, ubundi dutsinde Trump. Mureke tubikore.”
Yabyawe n’ababyeyi binjijuke kuko nyina yari umuganga n’umushakashatsi kuri Kanseri y’Ibere naho se yabaye umwarimu w’ubukungu muri kaminuza ya Stanford. Kamala yakuriye mu myizere y’Abahindu dore ko ari byo nyina yamutoje ndetse buri myaka ibiri yajyaga mu Buhinde.
Ku myaka irindwi y’amavuko, ababyeyi ba Kamala Harris baratandukanye, maze abana na nyina baza kwimukira i Quebec muri Canada, ari na ho yigiye amashuri yisumbuye muri Westmount ahamenyera n’Igifaransa.
Yakomeje kuzamuka, aba Umushinjacyaha Mukuru wa Los Angeles, aba umugore wa mbere ufite uruhu rw’irabura ugiye muri uwo mwanya, nyuma aza kwinjira muri Sena ya Leta Zunze Ubumwe za Amerika atsinze Loretta Sanchez nk’uhagarariye Leta ya California, mu mwaka wa 2020 afatanya na Joe Biden kwiyamamariza kuba perezida, Joe Biden atsinze amatora, yungirizwa na Kamala Harris, tariki ya 20 Mutarama 2021, arahirira kuba Visi-Perezida, aba abaye umugore wa mbere w’irabura ufite inkomoko muri Aziya y’Amajyepfo ugeze kuri uwo mwanya.
Mu gihe cyose yavuze ku myizerere ye ya gikristo n’ingaruka zayo ku ndangagaciro na serivisi rusange atanga, ntibyigeze bikuraho ko umwuga we wibanze ari uwo kwibanda ku mategeko, politiki rusange n’imiyoborere, atari umurimo w’idini, uretse ko indangagaciro arikuramo ari zo zituma aba umuyobozi mwiza ukundwa n’abantu.
Kamala Devi Harris ni umuyobozi mwiza ubikesha indangagaciro akura mu idini
