Korali Christus Regnat yamenyekanye cyane mu ndirimbo zo gusingiza Imana nka Kuzwa Iteka, Twarakuyobotse, ndetse n’izindi nk’ Igipimo cy’Urukundo na Mama Shenge, igiye gukora igitaramo gikomeye yatumiyemo Josh Ishimwe.
Iki gitaramo cyiswe i Bweranganzo cyateguwe n’iyi Korali, kizaba tariki 19 Ugushyingo 2023 muri Camp Kigali KCEV kuva Saa kumi z’umugoroba. Aba baririmbyi biyambaje Josh Ishimwe wa ADEPR Samuduha uherutse gukora igitaramo cy’amateka muri Camp Kigali ari nacyo cya mbere yari akoze.
Igitaramo cya Ishimwe Joshua w’imyaka 23 y’amavuko, cyabaye tariki 20 Kanama 2023. Cyaritabiriwe mu buryo buhambaye kuko Camp Kigali yari yuzuye no hejuru. Yashyigikiwe n’ibyamamare nka Massamba Intore, Aline Gahongayire, Bosco Nshuti, Tonzi, Yvan Ngenzi, Bamenya n’abandi. Muri iki gitaramo cye yari yatumiye Christus Regnat, none nayo iramutumiye.
Kwinjira muri iki gitaramo cya Christus Regnat ni 5,000 Frw mu myanya isanzwe, 10,000 Frw muri VIP, 20,000 Frw muri VVIP naho table y’abantu batandatu ni 150.000 Fw. Ibyo biciro ari ni ku bantu bagura amatike mbere y’igitaramo. Amatike ari kuboneka kuri www.christusregnat.rw
Ku bazagura amatike ku munsi w’igitaramo, itike ya make azaba ari 8,000 Fw mu myanya isanzwe, 15,000 Frw muri VIP na 25,000 muri VVIP. Ameza y’abantu 6 ni 150,000 Frw. Ushobora kugura itike kuri MoMo ukoresheje Code: 666600 (Regina Pacis).
"Nta yindi nteguza muzaze dutarame agati gaturike #iBweranganzo ni iwabo w’inganzo ku gicumbi aho abasizi, abahanzi, ab’agahogo keza n’abakirigitananga bazagukumbuza gutaramira Imana! Ntuzahabure rero!!! Turabakunda" byavuzwe na Bizimana Jérémie, Umuyobozi wungirije ushinzwe ibya tekiniki n’imyitwarire muri Christus Regnat.
Korali Christus Regnat yatangiye mu mwaka wa 2006. Umwe mu bahaye amakuru Imvaho Nshya yavuze ko iyi Korali ifite abaririmbyi basaga 100.
Chorale Christus Regnat imaze kugira imizingo 7 y’indirimbo zayo. Mu 2019, Kolari Christus Regnat yahimbiye indirimbo Cardinal Antoine Kambanda yise “Intambwe y’intore” Ruhamyantego!
Ni mu gihe indirimbo “Ishema ry’umushumba’ yahimbwe inaririmbwa na Chorale Christus Regnat ubwo Cardinal Antoine Kambanda yagirwaga Umwepisikopi wa Kigali.
Josh yatumiwe mu gitaramo cya Chorale Christus Regnat
Chorale Christus Regnat irataramira abakunzi bayo mu mpera z’uyu mwaka
