Amazina ye y’ukuri ni Irigukunze Eric, akaba atuye i Huye mu Ntara y’Amajyepfo. Uyu muhanzi umaze imyaka myinshi asenga kandi akorera Imana, afite umuryango, aho avuga ko afite umugore bakundana kandi basangiye ukwemera.

Uburyo yatangiye umuziki
John Key yinjiye mu muziki mu mwaka wa 2016, ubwo yageragezaga kuririmba nk’igikorwa kimushimisha. Gusa, ntibyatinze kuko mu mwaka wa 2019 yahisemo gufata umuziki nk’igice cy’ivugabutumwa rye bwite, agatangira gutunganya indirimbo zibanda ku gukomeza ukwemera no kwegera Imana.

Yagize ati: "Ndi umugabo wubatse, mfite umugore dukundana twumva ibintu kimwe. Ntuye i Huye mu Ntara y’Amajyepfo, ariko indirimbo nabashije kuririmba harimo iyitwa Maria Mubyeyi, Mukunzi Mwiza, Roho w’Imana, Abantu Bo Mu Isi n’izindi zitandukanye. Sindagera igihe cyo gushyira album hanze."

Indirimbo ze n’icyo zivuze
Indirimbo za John Key zigizwe ahanini n’izo guhimbaza Imana, ariko akagaragaza cyane isengesho n’icyubahiro gikwiye guhabwa Bikiramariya, umubyeyi wa Yezu Kristu.

Mu ndirimbo ye Maria Mubyeyi, yihaye intego yo kwibutsa abantu agaciro k’uyu mubyeyi mu buzima bw’Umukristu. Muri iyi ndirimbo, agira ati:

"Mama Maria mubyeyi, w’Isi n’Ijuru, nyina wa Yezu Kristu, Mubyeyi w’abantu bose, horana ikamba yera... Kwa Data ni mu Ijuru, natwe tuzagusangayo Mama Mariya."

Aha agaragaza ko Bikiramariya ari we mubyeyi w’isi yose, agahora atakambira Imana ku bw’abana bayo. Mu ndirimbo ye, akomeza agira ati:

"Shinjagirana ishema n’isheja n’urukundo, rumwe ukunda abantu bose ubatoza kumera nkawe."

Aya magambo agaragaza uburyo John Key yumva ko abantu bakwiye gukura mu busabaniramana bwabo, bagakurikiza urugero rwa Bikira Mariya mu rukundo n’ubugwaneza.

Ubutumwa bwe ku bantu n’icyerekezo cy’umuziki we
John Key akomeje gukora umuziki we mu buryo bwuje ubusabaniramana n’ubutumwa bwiza. Nubwo atarateganya gushyira hanze album ye ya mbere, abamukunda bakomeje kuryoherwa n’indirimbo ze zisesuye ukwemera.

Ku rundi ruhande, avuga ko yifuza gukomeza gukoresha impano ye mu gukomeza imitima y’Abakristu, by’umwihariko abemera idini Gatulika, bakarushaho kwegera Imana.

Uyu muhanzi, utuye i Huye, ashimangira ko mu rugendo rwe rw’umuziki, umuryango we umushyigikira cyane.
Mu gihe umuziki wa Gospel ukomeje gukura mu Rwanda, John Key ari mu bahanzi barimo gutanga umusanzu ukomeye mu gutuma Ijambo ry’Imana rigera kure binyuze mu bihangano bye.

Abakunda indirimbo zifite ubutumwa bwimbitse bw’ukwemera Gatulika, John Key ni umwe mu bahanzi bakwiye kumva no gushyigikira.

Impano ye ntikwiriye kwirengagizwa, nawe mushyigikire ureba igihangano cye,uratuma Ubutumwa Bwiza bugera kure