Mu kiganiro yagiranye na Paradise, Job Batatu yatangaje ko iyi ndirimbo ifite ubutumwa buhumuriza abantu, ibibutsa ko nubwo ubuzima bwo kuri iyi si bubamo ibibazo bikomeye, muri Gakondo y’ijuru bazahorana amahoro.

“Nari maze igihe kinini ntakora umuziki, noneho rimwe ndimo ndagenda, numva ijwi muri njye rimbaza riti: ‘Ubuzima bwawe bushingiye kuki? Wishingikirije iki, ko ubuzima buhora hasi hejuru?’

Naratekereje, maze niha amahoro mvuga nti: Imana ni yo nkingi y’ubuzima bwanjye, ni yo imbera umucyo mu mwijima. Nuko mbona igitekerezo cy’uko nitugera muri Gakondo, tutazibuka ibibazo by’iyi si.”

Iyi ndirimbo ni igice cy’urugendo rwe rw’umuziki arimo gukomeza, ndetse ngo ihamya isezerano yihaye ryo kuririmbira Imana kugeza avuye kuri iyi si. “Nihaye isezerano ryo kuririmbira Imana kugeza mvuye kuri iyi si. Ni yo mpamvu ntatezuka kuri iyi nzira.”

Job Batatu yatangiye umuziki akiri ku ishuri, aho yasengaga asaba Imana ko yamushoboza gutsinda, akayitura indirimbo z’ishimwe.

Ati: “Natangiye kwitabira amakorali yo mu bigo nigagamo, hanyuma muri 2015 ubwo nari i Byumba, ni bwo nasohoye indirimbo yanjye ya mbere yitwa ‘Ishimwe’.”

Nubwo atabaye muri korali igihe kirekire, yakunze gucuranga muri Worship Team, aho yanyuze mu matorero atandukanye arimo:

• Restoration Church i Byumba, Ruyenzi na Nyacyonga
• Life Givers mu Gakinjiro
• Inkuru Nziza i Kigali
• Bethesida Holly Church kwa Rugamba

Kuri ubu, asengera mu Itorero ry’Ubumwe bw’Ababatisita mu Rwanda (UEBR).

Indirimbo ye yashyize hanze ifite n’amashusho ni “Ndi Hano”, aho amajwi yayo yasohotse mu wa 2019, hanyuma amashusho akaza gukorwa mu wa 2021.

Mu mwaka wa 2017, Job Batatu yamuritse album ye ya mbere mu Itorero Inkuru Nziza, icyo gihe akaba yari yatumiye abahanzi bakomeye barimo Bosco Nshuti, Serge Iyamuremye, ndetse n’itsinda rya The Power of the Cross.

Mu bihe biri imbere, arateganya gukomeza gukora cyane, agasohora indirimbo nshya zifite amashusho, live recording, ndetse byakunda agakora ibitaramo.

Asaba abakunzi b’umuziki wa Gospel gukomeza gushyigikira abahanzi bawo, ntibumve gusa abamaze igihe mu muziki.

“Ndabasaba ko bakomeza kudushyigikira, batugira inama, badusengera, ndetse n’aho bishoboka bakadutera inkunga mu buryo bufatika."

Job Batatu (Batatu ryavuye ku kuba yaravukanye n’abandi bana babiri b’impanga, gusa nyuma y’amezi icumi bakabura ubuzima akaba ari we ukomeza kubaho, ayo akaba amazina ari ku ndangamuntu, ari na yo akoresha nk’umuhanzi) Ari hafi gusohora indirimbo yise "Gakondo"

Nubwo urugendo rwe rutari rworoshye, Job Batatu, umugabo wituriye i Nyamirambo we n’uwo bashakanye n’abana babo babiri, akomeje kwihangana no gukora cyane, kuko yemera ko umuhamagaro yahawe na Yesu utazamupfira ubusa