Kuri ubu couple igezweho y’abaramyi aribo Jado Sinza na Umulisa Esther bagiye kurira ukwezi kwa buki muri Tanzania mu gitaramo batumiwemo n’umuramyi Zoravo.
Kwa Kane tariki 20/09/2024 ahagana saa kumi n’igice i Kigali ku butaka bw’i Nyarugenge hacicikanye inkuru ivuga ko aba baramyi bafite ubukwe kuri uyu wa Gatandatu tariki ya 21/09/2024 bazahita berekeza mu gihugu cya Tanzania mu gitaramo batumiwemo n’umuramyi Zoravo.
Mu kiganiro yagiranye na Paradise ku murongo wa telefone, Jado Sinza yemeje aya makuru. Yagize ati: "Ni byo koko nyuma y’ubukwe bwacu buteganyikwe kuwa 21/09/2024 tuzahita twerekeza mu gihugu cya Tanzania mu gitaramo twatumiwemo n’umuramyi Zoravo kikaba giteganyijwe kuwa 27/09/2024". Yaboneyeho no kongera gutumira inshuti n’abavandimwe gutaha ubukwe bwabo.
Nk’uko bigaragara kuri affiche, iki Gitaramo kizabera ahitwa CCC Upanda ndetse n’amatike yo kwinjira akaba yashyizwe ku isoko.
Niba hari abantu bahuye bagahuza ni Jado Sinza na Zoravo! Amazina ye bwite ni Harun Laston umwe mu baramyi beza bakunzwe muri East Africa.
Ikinyamakuru cya Unless Mag cyatangaje ko izina Zoravo ryaba ryaraturutse ku kiganiro yaba yaratanze ku idini ry’Abayahudi ubwo yigaga mu mashuri yisumbuye. Nyuma y’iki kiganiro (presentation) akaba yarahawe iri zina n’umu misiyoneri witwa M.r Erin.
Imikoranire y’aba bombi Zoravo na Jado Sinza yatangiriye mu gitaramo cyiswe "Redemption live concert" cyabaye kuwa 17 Werurwe 2024 muri Camp Kigali. Iki gitaramo cyamurikiwemo album ya 3 ya Jado Sinza yagitumiyemo Zoravo aza no kunezeza imitima y’abitabiriye iki gitaramo. Ntibyarangiriye aha kuko aba bombi banakoranye indirimbo bise "Bwana Nasubiri" yasohotse nyuma y’iki gitaramo .
Zoravo uzwi mu ndirimbo zirimo "Majeshi ya Malaika", "Neema Yako yanitosha", "Anarejesha" yakoranye n’icyamamare Neema Simfukwe na "Ameniona" yahuriyemo na Bella Kombo.
Jado Sinza na Umulisa Esther baherutse gusezerana mu murenge mu birori byabaye kuwa 04/09/2024 aho bagiranye igihango imbere y’ubuyobozi bw’Umurenge wa Kimironko mu birori byitabiriwe n’inshuti n’abavandimwe.
Kuri ubu Jado Sinza na Esther Umulisa barakora ubukwe bw’akataraboneka mu birori bibereye ijisho biteganyijwe uyu munsi kuwa 21/09/2024 aho gusaba no gukwa no kwakira abatumirwa bibera i Kinyinya ahazwi nka Mez Park mu gihe aba bombi bari busezerane imbere y’Imana mu rusengero rwa ADEPR Remera.
Jado Sinza na Esther bategerejwe muri Tanzania
Jado na Esther barataramira muri Tanzania nyuma y’ubukwe bwabo
