Israel Mbonyi uzwi na benshi nk’umuhanzi uririmba indirimbo zamamaza Ubutumwa Bwiza, ntubyamushobokeye ko yegukana igikombe mu bihembo bya “African Entertainment Awards USA 2024” byatangiwe muri Leta Zunze Ubumwe za Amerika ku nshuro ya 10.

Ibi bihembo byatanzwe mu ijoro ryo ku wa Gatandatu tariki 9 Ugushyingo 2024, bitangirwa mu nyubako ya Hilton Hotel mu Mujyi wa New York. Byahuje ibyamamare mu ngeri zinyuranye, yaba abanyamideli, abahanzi, abafite aho bahurira na Politiki yo guteza imbere ubuhanzi n’umuco n’ibindi.

Ibi bihembo byatanzwe mu byiciro 45. The Ben wamamaye mu ndirimbo ziramya Imana zirimo ‘Thank You, Ndaje’, ‘n’izindi’ nubwo asanzwe aririmba izisanzwe, yegukanye igikombe cy’umuhanzi mwiza wo mu Karere k’Afurika y’Iburasirazuba, Amajyepfo ndetse n’Amajyaruguru ya Afurika (Best Male Artist - East/South/North Africa).

Uretse The Ben wo mu Rwanda, ibi bihembo byari bihatanyemo na Israel Mbonyi ndetse na Okkama na Nkotanyi Fleury batabashije kugira igikombe na kimwe batwara.

Ibi bihembo bitegurwa hagamijwe gutera imbaraga abahanzi bo muri Afurika no gushyigikira ibikorwa byabo. Bihuzwa n’ibirori byo kumurika imideli, kugaragaza umuco wa buri gihugu, hagamijwe muri rusange kuzamura inganda ndangamuco za buri gihugu.

Ababitegura bavuga ko ibi bihembo byabaye urubuga rwiza rwo kugaragaza impano z’abahanzi bakomeye muri Afurika, ndetse n’abari kuzamuka. Mu gutanga ibi bihembo, hanatumirwa abahanzi baririmba, mu rwego rwo gususurutsa abitabiriye ibi birori.

Byarangiye Israel Mbonyi atabashije gutsindira igikombe muri Amerika