Ni ibintu byakiriwe neza n’abaturage babifata nk’urugero rwiza rw’ubumwe n’ubwiyunge aho uyu munsi banahaye inka y’ishimwe Ugabanumva Desire watanze iyo mpyiko.

Mukamuyoboke Vestine umubyeyi warokotse Jenoside yakorewe abatutsi mu 1994 aragaragaza uko nyuma yo gusigwa iheruheru na yo ubuzima na bwo bwari bugiye kumucika.

Uyu mubyeyi uyu munsi araho arakomeye nyuma yo guhabwa impyiko n’umuturanyi we Desire akabikora atayimusabye, amufitiye ishimwe rikomeye ndetse ngo ntacyo kumwitura yabona.

Ugabanumva Desire wahaye uyu mubyeyi impyiko ubu ni Umunyamabanga Nshingwabikorwa w’Akagari ka Mutongo banatuyemo bombi. Avuga ko iyi mpyiko yayihaye uyu mubyeyi kuko yari ababajwe n’ubuzima bwe ariko kandi ngo yumvaga yifuza no gutanga isomo ry’urukundo ku Banyarwanda bose.

Iri somo rya gahunda ya Ndi Uunyarwanda n’ubumwe n’ubwiyunge ni na byo urubyiruko rwamenye iby’iki gikorwa rugaragaza ko rwize, kandi ngo byanabasigiye umukoro.

Abaturage bamenye ubwitange bw’uyu mugabo bavuga ko iki gikorwa ari urugero rwiza rw’igihugu cyifuzwa bagasaba Abanyarwanda bose kubyigiraho no kongera gukangura muri bo amarangamutima y’urukundo n’ubupfura nkuko igihugu kibibasaba.

Abarokotse Jenoside bakomoka muri aka gace k’icyahoze ari komine Gatare ubu irimo imirenge ya Macuba na Karambi bakaba bageneye uyu Desire inka y’ishimwe ry’ubutwari no gukomeza gushyigira ubumwe n’ubwiyunge.

Kugeza ubu mu Karere ka Nyamasheke hari amatsinda y’ubumwe n’ubwiyunge 588, aho kuri buri mudugudu rihari n’andi 180 ari mu bigo by’amashuri hakaba n’amatsinda y’isanamitima 9 rimwe kuri buri paruwasi gatorika.

Src: RBA