Ku munsi wa mbere w’ukwezi kwa Mata 2026, abizera Imana batangiye uru rugendo rushya rw’ukwezi bashyize umutima ku isengesho rikomeye ryibutsa urukundo rw’Imana n’amasezerano yayo atajya asubira inyuma.

Ni isengesho ryuzuyemo ibyiringiro, gusabira abandi no kwegurira Imana ubuzima bwose, nk’uko ryayobowe na Pastor Christian Gisanura, ashingiye ku magambo ari mu gitabo cya Yesaya 62:1-12.

Iri sengesho ritangirira ku murongo ugaragaza urukundo rw’Imana rudacogora, ahanditswe ngo: “Ku bw’urukundo nkunda i Siyoni sinzatuza, kuko ngiriye i Yerusalemu sinzaruhuka, kugeza ubwo gukiranuka kwaho kuzatambika nko gutangaza k’umuseke, n’agakiza kaho kakamera nk’itabaza ryaka” (Yesaya 62:1).

Aha, abizera basabwe kwizera ko Imana itazatuza itabasohojeho ibyo yabasezeranyije, kandi ko gukiranuka kwayo kuzagaragarira bose.

Mu gukomeza gusenga, habayeho gusabira ko ubuhamya bw’Imana bugaragarira amahanga yose, nk’uko ijambo ribivuga ngo: “Nuko amahanga azabona gukiranuka kwawe, n’abami bose bazabona icyubahiro cyawe, maze uzitwa izina rishya rihimbwe n’Uwiteka” (Yesaya 62:2). Pastor Christian Gisanura yakomerejeho asabira abizera kuba ibikoresho by’Imana, aho bazabera abandi urugero rwiza rw’ubuntu n’amahoro yayo.

Iryo jambo rikomeza rivuga ngo: “Kandi uzaba ikamba ry’ubwiza riri mu ntoki z’Uwiteka, n’igisingo cy’ubwami kiri mu ntoki z’Imana yawe” (Yesaya 62:3). Ibi, Pastor Christian Gisanuran yabigarutseho nk’isezerano ry’uko Imana izashyira icyubahiro ku bantu bayo, ikabahindura ab’agaciro n’abafite umumaro mu isi.

Mu rwego rwo gukomeza gutanga ibyiringiro, yasomye ahanditswe ngo: “Ntuzongera kwitwa Intabwa, n’igihugu cyawe ntikizongera kwitwa Umwirare, ahubwo uzitwa Inkundwakazi n’igihugu cyawe kizitwa Uwashyingiwe, kuko Uwiteka akwishimiye kandi igihugu cyawe kizashyingirwa” (Yesaya 62:4). Pastor Christian Gisanura yateye abizera imbaraga zo kwizera ko ibihe bibi birangiye, kandi ko Imana igiye kubahindurira amateka muri Mata.

Isengesho ryakomeje yibutsa uburyo Imana inezererwa abantu bayo, asenga ngo: “Nk’uko umusore arongora umukobwa, ni ko abahungu bawe bazakurongora, kandi nk’uko umukwe anezererwa umugeni, ni ko Imana yawe izakunezererwa” (Yesaya 62:5). Yasabye ko ibyo abizera bashoyemo imbaraga byazabagirira akamaro, kandi ko Imana izabaha ibyishimo nk’iby’umukwe.

Abizera banasabwe gukomeza gusenga badacogora, kuko handitswe ngo: “Yewe Yerusalemu, nshyize abarinzi ku nkike zawe, ntibazaceceka ku manywa na nijoro. Yemwe abibutsa Uwiteka, ntimugatuze” (Yesaya 62:6), ndetse ngo: “Kandi ntimukamuhwemere kugeza ubwo azakomeza i Yerusalemu, akahahindura ishimwe mu isi” (Yesaya 62:7). Aha ni ho Pastor Christian Gisanura yashimangiye gukomeza gusenga no gusabira abandi mu buryo budacogora.

Mu gusaba uburinzi n’umutekano, yagarutse ku isezerano rikomeye ngo: “Uwiteka yarahiye ukuboko kwe kw’iburyo n’ukuboko kw’imbaraga ze ati ‘Ni ukuri sinzongera guha abanzi bawe amasaka yawe ngo bayaye, n’abanyamahanga ntibazakunywera vino waruhiye’ ” (Yesaya 62:8). Ibi byakurikiwe n’isezerano ryo gusarura ibyiza by’imirimo yakozwe, nk’uko bivugwa ngo: “Ahubwo abazayasarura ni bo bazayarya bahimbaza Uwiteka, kandi abazayiyengera ni bo bazayinywera mu bikari by’ubuturo bwanjye bwera” (Yesaya 62:9).

Isengesho ryakomeje ritanga icyizere cy’uko Imana igiye gutegura inzira, kuko handitswe ngo: “Nimusohoke munyure mu marembo mutunganirize abantu inzira, mutumburure, mutumburure inzira nyabagendwa muyikuremo amabuye, mushingire amahanga ibendera” (Yesaya 62:10). Ibi byasobanuwe nk’ihamagarwa ryo gukuraho inzitizi zose mu buzima bw’abizera.

Mu gusoza, Pastor Christian Gisanura yagarutse ku isezerano rikomeye ryatanzwe ry’uko Umukiza aje, nk’uko Ijambo ribivuga ngo: “Dore Uwiteka arategetse, ageza ku mpera y’isi ati ‘Nimubwire umukobwa w’i Siyoni muti Dore Umukiza wawe araje, azanye n’ingororano kandi inyiturano yo kwitura imuje imbere’ ” (Yesaya 62:11). Maze bigasozwa n’icyizere cy’uko abizera bazahinduka abantu b’Imana b’ukuri: “Bazabita ubwoko bwera, abacunguwe n’Uwiteka, kandi uzitwa Ahashatswe, Umurwa utatawe” (Yesaya 62:12).

Iri sengesho rya Pastor Christian Gisanura ryabaye nk’iritangiza ukwezi kwa Mata mu mbaraga zidasanzwe, rishyira abizera mu maboko y’Imana, ribaha ibyiringiro by’igihe gishya, ribasaba gukomeza kwizera no gusenga badacogora, no gutegereza isohozwa ry’amasezerano yayo mu buzima bwabo.