Ariko, nk’uko Dr. Ted Baehr, washinze urubuga Movieguide, akunda kubivuga, "Inkuru nziza ni uko inkuru mbi ari impimbano."

Ibi byemejwe n’ubushakashatsi bushya bwakozwe n’ishyirahamwe ry’abanyamakuru b’iyobokamana muri Amerika, National Religious Broadcasters (NRB), bufatanyije n’ikigo kizwi mu gukora ubushakashatsi, Barna Group. Ubu bushakashatsi bwagaragaje ko benshi mu baturage ba Amerika bakoresha itangazamakuru rya gikirisitu.

Raporo yasohowe na NRB yiswe “Abanyamerika benshi bakoresha itangazamakuru rya gikirisitu”, igaragaza ko hejuru ya 60% by’abakuze muri Amerika bakurikirana porogaramu z’itangazamakuru rya gikirisitu — binyuze kuri televiziyo, radiyo, podcasts, imbuga nkoranyambaga, YouTube cyangwa imbuga z’amakuru [Ibinyamakuru].

Ikirushijeho gutangaza ni uko muri abo bakoresha iryo tangazamakuru, 50% barikurikira nibura rimwe mu cyumweru.

Ubushakashatsi bwa Barna busobanura abakoresha itangazamakuru rya gikirisitu nk’abareba, bumva, cyangwa basoma ibiganiro bifite inyigisho za gikirisitu, uhereye kuri radiyo na televiziyo, kugeza kuri podcasts n’ibinyamakuru, ndetse n’abakurikira ibikubiyemo ku mbuga nkoranyambaga.

Troy Miller, umuyobozi wa NRB, yabwiye umunyamakuru mu kiganiro kuri radiyo ati:
“Tuvugishije ukuri, icyo gipimo cyarantangaje. Twatekerezaga ko kiri hasi cyane kurusha uko cyagaragaye.”

Yongeyeho ati: “Iyo urebye mu bakirisitu b’ukuri — abemera ko Bibiliya ari ijambo ry’Imana, bajya mu rusengero kenshi, basoma Bibiliya kenshi — usanga hafi ya bose bakurikirana itangazamakuru rya gikirisitu buri munsi.”

Ibyo si byo gusa. NRB ivuga ko hari icyizere kinini abaturage bagirira iri tangazamakuru kurusha ayandi. Igaragaza ko 2 kuri 3 mu baturage muri rusange bafata itangazamakuru rya gikirisitu nk’irifite agaciro kandi ryizewe.

Iyo urebye mu barikoresha kenshi, abagera kuri 80% bararyizera cyane. Ndetse n’abatari abakirisitu bavutse ubwa kabiri (born again), hafi kimwe cya kabiri babona iryo tangazamakuru mu buryo bwiza.

Icyakora, hari n’abagaragaza impungenge. Bamwe mu barikoresha kenshi bavuze ko hari aho baribona nk’irishobora gutanga amakuru yuje ivangura cyangwa ribogamye. Abatari abakirisitu nabo bagaragaje ko badakunze kuryizera cyane.

Amateka y’itangazamakuru rya gikirisitu muri Amerika

Mu gihe igihugu cya Amerika cyashingwaga, itangazamakuru ryari rifite uruhare runini. Nk’uko umwanditsi Stacy Schiff abigaragaza mu gitabo cye The Revolutionary: Samuel Adams (2022), The Boston Gazette yari ikinyamakuru cyubashywe cyane, aho Samuel Adams yakundaga kwandika akoresheje amazina mpimbano kugira ngo yirinde gufatwa.

Adams kandi yakoresheje "Committees of Correspondence" kugeza ku bandi batuye muri za koloni amakuru y’ukuri yerekeye ibibera i Boston.

Hari n’irindi tangazamakuru rikomeye ritakunze kugarukwaho muri iki gihe: inyigisho za gikirisitu n’amasengesho. Mu gihe cy’Intambara y’Ubwigenge, hafi 80% by’impapuro zandikwaga mu buryo bw’inyandiko zasohokaga, zari inyigisho za gikirisitu zasubiwemo.

Dr. Donald S. Lutz, wo muri Kaminuza ya Houston, yigeze kuvuga ati: “Mu myaka ya 1700, nta bitangazamakuru bikomeye byabagaho nk’ibi dufite ubu. Abantu basomeraga ku bipapuro byanditse. Muri ibyo bipapuro, 80% byari inyigisho za gikirisitu.”

Ubwisanzure bwo gutangaza ibitekerezo: Impano ikwiye kurindwa

Amerika yabonye ubwisanzure bwo gutangaza ibitekerezo n’itangazamakuru, cyane cyane kubera uruhare rukomeye rw’iyobokamana mu ishingwa ryayo. Ariko nk’uko Troy Miller wa NRB yabitangaje vuba aha kuri RadioWorld: “Ubwisanzure bwo gutanga ibitekerezo si amahitamo — ni ryo shingiro rya demokarasi yacu. Iyo ijwi ry’umwe riciwe, buri wese aba agezweho.”

Ibi bituma uburyo benshi muri Amerika bari kwitabira itangazamakuru rya gikirisitu bifatwa nk’ikimenyetso cy’uko abantu batangiye kongera gushishikarira amajwi ashingiye ku kwemera no ku ndangagaciro z’ijambo ry’Imana.

Src: The Christian Post