Umuramyi Sharon Gatete wongeye guhembura imitima y’abakunzi be mu ndirimbo "Ntutinye", yavuze imvano y’iyi ndirimbo yahuriyemo n’abavandimwe be Shamman Gatete na Shekhinah Gatete.
Ni indirimbo yashimishije abakunzi ba Gospel nk’uko bigaragara mu butumwa bwatanzwe n’abakunzi b’uyu muramyi by’umwihariko ku rubuga rwa YouTube. Aganira na Paradise, Sharon Gatete yavuze imvano y’iyi ndirimbo.
Mu ijwi rye bwite, Sharon ati: "Title y’indirimbo irabyivugira ariko ubutumwa nyamukuru ni ukwibutsa abantu amasezerano Imana yaduhaye inshuro nyinshi, zimwe muri zo nshuro ikaba iri muri Yesaya 41:10 itubwira iti "Ntutinye kuko ndi kumwe nawe, ntukihebe kuko ndi Uwiteka Imana yawe. Nzajya nkukomeza, nikoko nzajya nkutabara kandi nzajya nkuramiza ukuboko kw’iburyo, ariko gukiranuka kwanjye!"
Ni indirimbo yahuriyemo n’abavandimwe be nk’uko byavuzwe haruguru. Ubwo yabazwaga niba kuyitirira "Les Gatete" bifitanye isano no kuyikorana n’abagize umuryango we, yagize ati: "Yego iyi ndirimbo nayikoranye na barumuna banjye babiri bitwa Shammah Gatete na Shekhinah Gatete.
Abajijwe ku mishinga afite ya vuba muri uyu muhamagaro, yagize ati: "Imishinga myinshi nzagenda nyibagezaho mu gihe kiri imbere, gusa gukorera Imana turakomeje kandi ubudasiba! Album ya mbere irimo kugera ku musozo mu gusohoka, mwitege ibindi bikorwa n’imishinga irimbere".
Sharon Gatete kuri ubu ari kubarizwa mu gihugu cya Kenya aho ahugiye mu masomo y’ibijyabye na Muzika. Ni umwe mu baramyi b’abahanga bakunzwe kwiyambazwa n’abahanzi banyuranye ahanini bitewe n’ijwi rye ryuje ubuhanga n’imiririmbire yo ku rwego rwo hejuru.
Ubwo yasozaga amasomo y’icyiciro cya mbere cy’amashuri yisumbuye, yafashe umwanzuro wo gukomereza amasomo ku ishuri rya Muzika ryo ku Nyundo rizwiho kuba ryaranyuzemo abahanzi b’ibyamamare barimo Yverry, Igor Mabano, Ariel Ways, Kenny Sol, Peace Hozy n’abandi.
Sharon Gatete yaje gukomereza ubuzima bw’umuziki mu gihugu cya Kenya aho kuri ubu arimo kwiga amasomo ya muzika ku rwego rwa Kaminuza, akaba afite inzozi zo kuziga umuziki kugeza ku rwego rwa ’Doctorat’ (PhD).
Mu kiganiro yigeze kugirana na Paradise, yavuze ko yifuza kujya aririmba abantu bagakira indwara. Ati: "Ndifuza kuba umunyamuziki urenze kuririmba gusa, ahubwo ndifuza kuba umuganga uvuza umuziki (Muzic Therapist) n’umucuruzi wa rwiyemezamirimo wa muzika (Music Business Woman)."
Kuri ubu amaze gushyira hanze indirimbo zikunzwe zirimo "Inkuru nziza", "Nzategereza", "Umukunzi", "Inzira ukuri n’ubugingo", "Kumbuka yakoranye na Yves B na Rodhah", "Rwanda Shima Imana" n’izindi.
RYOHERWA N’INDIRIMBO "NTUTINYE" YA SHARON GATETE FT LES GATETE
RYOHERWA N’INDIRIMBO "INKURU NZIZA" YA SHARON GATETE
