Mu gihe isi ikomeje gushakisha amahoro yo mu mutima, umutekano w’imbere muri bo n’ahabakikije, n’impamvu irambye yo kubaho, abantu benshi barimo bareba ku madini nk’inzira z’ubuzima burambye. Mu madini atandukanye, Itorero ry’Abadivantisite b’Umunsi wa Karindwi rikomeje kugenda ritera imbere ku rwego mpuzamahanga ndetse no mu Rwanda.
Ni iki gituma abantu barenga miliyoni 22 ku isi bahitamo gukomeza kuba Abadivantisite? Dore ibintu bitanu by’ingenzi byatuma buri wese yifuza kwinjira muri uyu muryango ukomeje kwaguka:
1. Kwisunga Ijambo ry’Imana nk’ishingiro rya byose
Itorero ry’Abadivantisite rizwiho gukomeza umurongo wa Bibiliya uko iri, nta gushaka kuyihindura cyangwa gukurikira imigenzo yashyizwemo n’abantu. Bafata Bibiliya nk’Ijambo ryera ry’Imana ryuzuye kandi ridahinduka. Benshi mu bayoboke baryo bavuga ko babonye igisubizo cy’ukuri ku bibazo byinshi by’ubuzima n’imibereho, binyuze mu gusoma no gusobanukirwa Ijambo ry’Imana buri munsi.
2. Guhimbaza Imana ku Isabato – Umunsi w’umugisha n’ikiruhuko
Mu gihe benshi bizihiza umunsi w’ikiruhuko ku Cyumweru, Abadivantisite bizihiza Isabato kuva ku mugoroba wo ku wa Gatanu kugeza ku wa Gatandatu nimugoroba, nk’uko bitegetswe mu Mategeko icumi (Kuva 20:8-11). Ni igihe bita icy’Imana, kitarangwamo akazi cyangwa umuvundo w’isi, ahubwo kigenewe isengesho, kuruhuka no kwishimira ibyaremwe n’Imana.
3. Imibereho isukuye, ubuzima burambye, bitewe no kwirinda indwara
Abadivantisite bamenyekanye ku rwego rw’isi nk’abafite ubuzima bwiza kandi burambye. Ubushakashatsi bwakorewe muri “Blue Zones” bwagaragaje ko bamwe mu Badivantisite b’i Loma Linda (USA) baba mu buzima burambye cyane kurusha abandi ku isi, bitewe no kurya indyo yuzuye, kwirinda ibiyobyabwenge, inzoga, itabi no kubaho mu mahoro. Ibi byatumye benshi bagira amatsiko yo kumenya iyo myemerere ibafasha kuramba.
4. Gukunda amahoro no kwirinda politiki y’amacakubiri
Itorero ry’Abadivantisite b’Umunsi wa Karindwi rigendera ku ndangagaciro yo kutivanga muri politiki y’amacakubiri, ahubwo ryigisha abayoboke baryo kuba ba Ambasaderi b’amahoro, ubufasha, ubudahemuka n’urukundo. Ibi bituma benshi baryiyumvamo nk’ahantu ho kubonera umuryango w’amahoro kandi utarangwa n’urwikekwe.
5. Kubaho mu buzima bategereje Yesu
Umudivantisite yibera mu buzima bumutegurira kuzaba ahagaze yemye mu kugaruka kwa Yesu Kristo. Iyi ntego ihora imbere y’abayoboke b’itorero, bikabafasha kubaho ubuzima bufite icyerekezo, kwirinda uburangare, bakabaho birinda iby’isi. Uyu mutima wabo udasanzwe, ni wo utuma bamenyekana nk’abantu bagira ikinyabupfura, ubuntu no gukunda abandi.
Umuhanzikazi Jeanne Dufashwanayo uherutse guhindura izina rya channel ye rikava kuri Dufashwanayo Jeanne rijya kuri Jeanne Nayo Official, wamamaye mu ndirimbo nka Hari Umunsi n’iyitwa Ubushake Bwawe, na we ahamya ko ibi ari ukuri.
Kuri we no ku bandi babarirwa mu mamiriyoni, Abadivantisite ni abantu batanga icyizere. Babaho mu kuri, barakundana, baratuje, kandi babaho nk’abategereje igihugu cy’ijuru.
Niba warigeze wibaza niba hari ahantu wakwiberaho ufite amahoro y’umutima, intego mu buzima, ubuzima buzira umuze n’icyerekezo cy’ukuri, ushobora kugerageza kureba uko Abadivantisite babaho. Wenda ni ryo torero wari umaze igihe ushakisha.
Paradise tukwifurije kugira ubushishozi mbere yo gufata umwanzuro wo kwizera cyangwa guhindura imyemerere, no kwishimira itorero urimo.
Icy’ingenzi si idini, icy’ingenzi ni ukuri ko mu Ijambo ry’Imana no kukubahiriza, ariko nanone gukorera Imana ufatanyije n’abantu wizeye, ukunda, bituma byoroha kurushaho. Ese aho usengera hatuma gukorera Imana bikorohera?
Uru ni urusengero rw’Abadivantisite b’Umunsi wa Karindwi! Ese aho usengera hatuma urushaho kwegera Imana?
Ubutaha tuzagaruka no ku yandi madini
